ކުރިން އަޅުގަނޑުމެން ނަގާ ތުއްތު ކުދިންގެ ފޮޓޯތަކަކީ ހަނދާނަކަށް އަލްބަމްގައި ރައްކާކުރާއެއްޗެކެވެ. ނަމަވެސް މިހާރު އެފޮޓޯތައް އަޅުގަނޑުމެން މިވަނީ މުޅި ދުނިޔެއަށް ހުޅުވާލާފައެވެ. މިއީ އެކުދިން ބޮޑުވުމަށްފަހު އެކަމަށް ތަޢުރީފު ކުރާނެ ނުވަތަ ހިތްހަމަޖެހޭނެ ކަމެއްތޯ އެކަން ކުރުމުގެ ކުރިން ވިސްނާލާށެވެ.
ދަރިފުޅު ނެޕީއަށް ޕުއްޕުލައިގެން ރުޅިގަދަވެގެން އުޅޭ ވަގުތުގެ ފޮޓޯ ފޭސްބުކަށް ލުމުގެ ކުރިން ވިސްނާލާށެވެ. ގިނަ ބެލެނިވެރިން ޤަބޫލުކުރާ ގޮތުގައި އެބައިމީހުންގެ ޅަދަރިންގެ ތުއްތު ދިރިއުޅުމުގެ ކަންތައް ސޯޝަލް މީޑިއާގައި ހިއްސާ ކުރުމަކީ ތަރައްޤީއެވެ. އިނގިރޭސި ވިލާތުގެ އިންޓަރނެޓް ކުންފުންޏެއްކަމަށްވާ ނޮމިނެޓް އިން މިދިޔަ އަހަރު ކުރި ދިރާސާ އަކުން ދައްކާ ގޮތުން ޢުމުރުން ފަސް އަހަރުން ދަށުގެ ކުދިންގެ ދުއިސައްތަ އެއްހާ ފޮޓޯ ކޮންމެ އަހަރަކު ސޯޝަލް މީޑިއާގައި ހިއްސާކުރެއެވެ. އޭގެ މާނައަކީ ކުއްޖާގެ ޢުމުރުން ފަސް އަހަރުވެސް ނުފުރެނިސް އެކުއްޖާގެ 1000 އެއްހާ ފޮޓޯ އިންޓަރނެޓްގައި ދައުރުވުމެވެ.
"ތިބާއަށް އެންމެ ކަމުދާ ފޮޓޯއަކީ ދަރިފުޅު ފުރަތަމަ ފަހަރަށް ޕޮޓީގައި އިށީންނަ ފޮޓޯކަމަށް ވިޔަސް ކުއްޖާގެ ޢުއުމުރުން 13 އަހަރުގައި އެކުއްޖާއަށް އެންމެ ކަމުދާ ފޮޓޯއަށް، އެފޮޓޯ ނުވާނެއެވެ." ލިޔުން ތެރިއެއް އަދި ކުޑަކުދިންގެ ނަފްސާނީ ޢިލްމުވެރިއެއްކަމަށްވާ ކެތްރިން ސެޓެއިނާ- އެޑެއަރ ވިދާޅުވެފައި ވެއެވެ.
ޒުވާނުންނަކީ ސޯޝަލް މިޑިއާއާ ގުޅުންބޮޑު ބަޔަކަށްވާއިރު މިގޮތަށް ދައުރުވާ ކުދިންގެ ފޮޓޯތަކުގެ ނޭދެވޭ އަސަރު އެކުދިންނަށް ކުރުމުގެ ފުރުސަތު ވަރަށް ބޮޑެވެ. އެފަދަ ފޮޓޯތަކުގެ ޕްރައިވެސީ ނުވަތަ ރައްކާތެރިކަން ސޯސަލް މީޑިއާގައި އޮންނަ މިންވަރު އެއީ ކަންބޮޑުވާން ޖެހޭކަމެކެވެ. މިސާލަކަށް އެގޮތަށް ދައުރުވަމުންދާ ދަރިފުޅު ތުއްތު އިރުގެ ފޮޓޯތަކާއި މަޢުލޫމާތުތައް މީހަކު ވަގަށްނަގާ ކުއްޖާގެ އައިޑެންޓީޓީ ގެއްލުވާލައި، އެކުއްޖާއަށް ބުލީކުރުމަށް ފުރުޞަތު ހުޅުވާލަފާނެއެވެ.
މެންޗެސްޓަރ މެޓްރޯޕޮލިޓަން ޔުނިވަރސީޓީގެ ޕްރޮފެސަރެއްކަމުގައިވާ ނިކޯލާ ވިޓެން އަކީ މިފަދަ މައްސަލަތަކާ ކުރިމަތިލައްވަމުން ގެންދަވާ ބޭފުޅެކެވެ. އޭނާ ވިދާޅުވެފައިވަނީ އުފަންވީއްސުރެ ޒުވާނުންގެ ޙަޔާތުގެ ހުރިހާ ކަމެއް ސޯޝަލް މީޑިއާއިން ލިބެން ހުންނަކަން އެކުދިންނަށް އަންގައި ދޭންޖެހޭ ކަމަށެވެ. އަދި އެއީ އެކަންވާންޖެހޭ ގޮތްނޫންކަން ވެސް އެކުދިންނަށް އަންގައި ދޭންޖެހޭ ކަމަށެވެ.
ޔުނިވަރސީޓީ އޮފް މިޗިގަން އިން ދާދި ފަހުންކުރި ދިރާސާއަކުން ދައްކާ ގޮތުން ކުދިންގެ މަޢުލޫމާތު ސޯޝަލްމީޑިއާގައި ބެލެނިވެރިން ހިއްސާ ކޮށްފައިވާ ގޮތާމެދު، ޢުމުރުން 10 އަހަރާއި 17 އަހަރާ ދެމެދުގެ ކުދިން ހަޤީގަތުގައިވެސް ކަންބޮޑުވެއެވެ.
"ބެލެނިވެރިން އެކަން ކުރަނީ އެއީ އެމީހުންނަށް ލިބިގެންވާ ޙައްޤެއްކަމަށް ބަލައިގެން. އެކަމަކު އެބަ ޖެހޭ އެނގެން އެއީ އެހެންމީހެއްކަން. އެހެން އިންސާނެއްކަން. ފަނަރަ އަހަރުފަހުން ކުއްޖާ އެކަމަށްޓަކައި ބެލެނިވެރިންނަށް ޝުކުރެއް އަދާއެއް ނުކުރާނެ. " ޕްރޮފެސަރު ވިޓެން ވިދާޅުވިއެވެ. ވިޓެން ވިދާޅުވީ ކުއްޖާގެ ފޮޓޯތަކާމެދު ކުއްޖާއާ މަޝްވަރާކޮށް ގޮތެއްނިންމޭވަރަށް އެކުދިން ބޮޑުވާންދެކަށް އެކުދިންގެ އަމިއްލަ ދިރިއުޅުމުގެ ކަންކަން ސޯޝަލް މީޑިއާގައި ޙިއްސާ ނުކުރާށެވެ. އެއީ ފަހަރުގައި ބެލެނިވެރިން ނިންމަންޖެހޭ ވަރަށް އުދަނގޫ ނިންމުމެއްކަމަށްވެސް އޭނާފާހަގަ ކުރައްވައިފައިވެއެވެ.
ސޯޝަލް މީޑިއާގައި ކުޑަކުދިންގެ ފޮޓޯ އެކުދިންގެ ރުހުމަކާ ނުލައި ސާއިޢުކޮށްފިނަމަ، ފަރަންސޭސި ވިލާތުގައި ބެލެނިވެރިންނަށް ބޮޑު ޖުރިމަނާއަކާ ކުރިމަތި ލުމުގެ އިތުރުން ޖަލު ޙުކުމަކާ ކުރިމަތިލާން ޖެހޭނެއެވެ. އެ ޤައުމުގައި މިހާރު ޢަމަލުކުރަމުން ގެންދާ ހަރުކަށި ޕްރައިވެސީ ޤާނޫނުގެ ދަށުން 45،000 ޕެންސް ( 35،000 ޕައުންޑް) އިން ޖުރިމަނާ ކުރެވޭނެއެވެ. އަދި އަހަރު ދުވަހުގެ ޖަލުހުކުމަކާ ކުރިމަތިލާން ޖެހޭނެއެވެ.
ލަންޑަން ސްކޫލު އޮފް އިކޮނޮމިކްސްގެ ޕްރޮފެސަރެއްކަމުގައި ސޯނިއާ ލިވިންގްސްޓަން ވިދާޅުވީ ސޯސަލް މީޑިއާގައި ހިއްސާކުރާ ކޮންމެ ފޮޓޯއަކީ އޭގައި މާބޮޑު މާނައެއް ހިމެނޭ، ސީރިއަސް ވާހަކަތަކެއް ދެކެވޭ ފޮޓޯތަކެއް ނޫންކަމަށެވެ. ދަރިންގެ ފޮޓޯ ސޯޝަލް މީޑިއާގައި ހިއްސާކުރުމުގެ ކުރިން އެއީ ކާކަށް ކީއްކުރަން ހިއްސާކުރާ ފޮޓޯއެއްތޯ ނުވަތަ މަޢުލޫމާތެއްތޯ ވިސްނާލަންޖެހާކަމަށް އޭނާ ވިދާޅުވިއެވެ. އަދި އެމަޢުލޫމާތެއް އެންމެންނާ ޙިއްސާކުރުމުން ނިކުމެދާނެ ނަތީޖާއަކަށް ވެސް ވިސްނަންޖެހޭ ކަމަށް އޭނާ ވިދާޅުވިއެވެ.
ސޯޝަލްމީޑިއާގެ ރަޙްމަތްތެރިންގެ ލިސްޓްގައި ފަންސާހަކަށް މީހުން ތިބޭއިރު ތުއްތު ދަރިފުޅުގެ ދިރިއުޅުމުގެ ކަންކަން ނުވަތަ ފޮޓޯ ހިއްސާކުރާނީ ކޮންބަޔަކާއެކުގައިތޯ ބެލެނިވެރިން ރަނގަޅަށް ވިސްނަންޖެހޭ ކަމަށް ލިވިންގްސްޓަން ވިދާޅުވިއެވެ. ރަހްމަތްތެރިންގެ ލިސްޓްގައި ތިބި ފަންސާހަކަށް މީހުންނަށް އެއްފޮޓޯއެއް ހިއްސާކުރާނަމަ އެމީހުން ރަޙްމަތްތެރިންނަށް އެފޮޓޯ ނުވަތަ މަޢުލޫމާތު ހިއްސާކޮށް ފަންސާހުގެ ބަދަލުގައި އެމަޢުލޫމާތެއް 500 އެއްހާ މީހުންނަށް ޙިއްސާވެގެންދެއެވެ. ނޮމިނެޓް އިން ހެދި ދިރާސާއިން ހާމަވާ ގޮތުގައި 17 އިންސައްތަ ބެލެނިވެރިން އެބައިމީހުންގެ ފޭސްބުކް ޕްރައިވެސީ ސެޓިން އެއްގޮތަކަށްވެސް ނުބަލަހައްޓައެވެ.
"ހުރިހާ އެންމެންވެސް އެބަޖެހޭ ވިސްނަން ހުޅުވާލެވިފައިވާ ދުނިޔޭގައި ތިމާމެންނާ އެހެންމީހުން ބޭނުންވާ ގޮތް ބަދަލުވަމުން އަންނަކަން. ޕޯސްޓްކޮށްލެވޭ ފޮޓޯ ބޭނުންވި ގޮތާއި ޙާލަތާއި ނުގުޅޭ ހީވެސް ނުކުރާގޮތްގޮތަށް ބޭނުންކުރަމުންދާކަން" ލިވިންގްސްޓަން ވިދާޅުވިއެވެ.
"ސޯޝަލް މީޑިއާގައި ފޮޓޯ ހިއްސާކުރުމަކީ ކޮންމެ ޙާލަތެއްގައި ކުދިންނަށް ގޯސް އަސަރު ކުރާނެކަމެއް ނޫން، އެކަމުން ފައިދާތަކެއް ލިބޭނެ ކަމެއް. މިސާލަކަށް ކާފައާއި މާމަމެންނާއި އަދި ދެމެބެންގެ ދެދަރި ކުދިންފަދަ އާއިލާގެ މެންބަރުންނާ ދުރުގައި އުޅެންޖެހިފައިވާ ކުދިން އާއިލީ ގުޅުން ބަދަހި ކުރުމުގެ ގޮތުން ފޮޓޯ އާއި މަޢުލޫމާތު ޙިއްސާ ކުރުމަކީ ވަރަށް ރަނގަޅުކަމެއް." އޭނާ ވިދާޅުވިއެވެ.
ބެލެނިވެރިން ސޯޝަލް މީޑިއާގައި ހިއްސާކުރާ ފޮޓޯތަކާމެދު ކުއްޖާ ހިއްހަމަ ނުޖެހޭނަމަ އެތަކެތި ނެގުމަށް އެދޭށެވެ. އެގޮތަށް އެކަން ނުވާނަމަ ފޭސްބުކާއި ޓްވިޓަރގައި ހިއްސާކުރާ ފޮޓޯތައް ނައިގައި ދިނުމަށް އެދި ރިޕޯރޓް ކުރެވޭނެއެވެ. ނަމަވެސް ތިންވަނަ ފަރާތަކުން އެ ފޮޓޯ ޕޯސްޓްކޮށްފައި ވާނަމަ އެކަމަށް އިންކާރުކުރާނެއެވެ. ޢުމުރުން 13 އަހަރުން ދަށުގެ ކުދިންގެ ފޮޓޯތައް ނަގައި ދިނުމަށް ބެލެނިވެރިންނަށް އެދެވޭނެއެވެ. ސާދަ އަހަރު ނުވަތަ އެއަށްވުރު ބޮޑެތި ކުދިންނަށް އެކުދިން އަމިއްލަޔަށް ވެސް އެދެވޭނެއެވެ.
ކުދިންގެ ފަރާތުން ޕްރޮފެސަރ ސްޓެއިނަރ އަށް އާންމުކޮށް އިވޭ ޝަކުވާއަކީ ސޯޝަލް މީޑިއާގައި ހިއްސާކުރުމަށް ތަފާތު އެކި ގޮތްގޮތަށް އެކުދިންގެ ފޮޓޯ ނަގާތީ ހިތްހަމަ ނުޖެހުމުގެ ޝަކުވާގެ އަޑެވެ. ފޮޓޯ ނެގުމަށް އެކުދިންލައްވާ ތަފާތު އެކި ކަންތައް ކުރުވާކަމުގެ ޝަކުވާއެވެ. އެ ކުދިން ހޮބީ ގޮތުގައި ކުރާކަންތައްތަކުގެ އިތުރުން މަންމަ މެންނަށް އެހީތެރިވެދޭކަން ދައްކުވައިދޭ ގޮތަށް ފޯޓޯ ނެގުމަށް ކުދިންނަށް ޕްރެޝަރކުރުވާކަމުގެ ޝަކުވާއެވެ.
ކުދިންގެ ކުޅިވަރު ޙަރަކާތްތަކަށް ބެލެނިވެރިން ގޮސް އެކުދިންނަށް ސަމާލުކަން ދިނުމުގެ ބަދަލުގައި ފޮޓޯނެގުމަށް ސަމާލުކަންދޭކަން ކުދިން ފާހަގަ ކުރާކަމަށް ސްޓެއިނަރ ވިދާޅުވިއެވެ. " ކުޅިބަލަން ތިބޭމީހުންގެ ތެރެއިން އެކުދިން ބެލެނިވެރިން ކޮބައިތޯ ބަލާއިރު ފެންނަނީ، އެބެލެނިވެރިން ސްމާރޓް ފޯނުތަކަށް ބަލަން ތިބޭތަން. އެވަގުތު ކުދިން ބޭނުން ވާނީ ބެލެނިވެރިން ހެވިފައި، އެކުދިންނާ ދިމާއަށް ބަލަން ތިބެން" އޭނާ ވިދާޅުވިއެވެ.
އަމިއްލަ ދިރިއުޅުމުގެ ކަންތައްތައް ސޯޝަލް މީޑިއާގައި ހިއްސާކުރުމަކީ މިހާރު އަޅުގަނޑުމެންގެ ދިވެހިންގެ ތެރޭގައިވެސް ވަރަށް އާއްމުވަމުން އަންނަ ކަމެކެވެ. ޚާއްޞަ ގޮތެއްގައި ޅަދަރިންގެ ތުއްތު ދިރިއުޅުމުގެ ފޮޓޯތައް ޙިއްސާކުރުމަކީ މިހާރުވަރަށް އާންމު ވެފައިވާ ކަމެކެވެ. ކުއްޖާގެ ތުއްތު ދިރިއުޅުމުގެ ފޮޓޯތައް ސޯޝަލް މީޑިއާގައި އާންމުކޮށް އެކުއްޖާގެ މުސްތަޤްބަލު ބަނަކޮށްލާ ބަޔަކަށް އަޅުގަނޑުމެން ބެލެނިވެރިން ވެގެން ނުވާނެއެވެ.
- މަޢުލޫމާތު: ދަ ގާރޑިއަން
