ޕީޕީއެމް ކައުންސިލް މެމްބަރު ރައްޔިތުންގެ މަޖިލީހުގެ ރ.މަޑުއްވަރީ ދާއިރާގެ މެމްބަރު މުޙަންމަދު އަމީތު ކައުންސިލުގެ މެމްބަރުކަމުން މިއަދު އިސްތިއުފާދެއްވައިފިއެވެ.
ބައެއް މީޑިއާތަކަށް މަޢުލޫމާތުދެއްވަމުން އަމީތް ވިދާޅުވީ، އޭނާ ހިމެނިވަޑައިގަންނަވާގޮތުން ޕީޕީއެމްގެ ޕާލަމެންޓްރީ ގުރޫޕުން އެޕާޓީގެ ކައުންސިލަށް 10 މެމްބަރު ހޮވާފައިވާއިރު، އެއީ އަނގަބަހުން ވެވުނު އެއްބަސްވުމެއްގެދަށުން ހޮވާފައިވާ މެމްބަރުންކަމަށެވެ. އެ މެމްބަރުން ހޮވީ އެއް އަހަރު ދުވަހަށް އެއްބަސްވެގެންކަމަށާ، ޕާލަމެންޓްރީ ގްރޫޕުގެ ފަރާތުން ކައުންސިލަށް ހޮވޭ މެމްބަރުންނަކީ ދައުރުވާގޮތަށް ތިއްބަވާ ބައެއްކަމަށް އޭރު އެއްބަސްވެފައިވާކަމަށްވެސް އަމީތް ވިދާޅުވިއެވެ.
އޭނާ ވިދާޅުވީ އެއުސޫލުން ބަލާއިރު، މިދިޔަ އޭޕްރީލް 30 ވަނަދުވަހަށް، ޕީޖީ ގްރޫޕުން ކައުންސިލަށް ހޮވިވަޑައިގަތް މެމްބަރުންގެ މުއްދަތު ހަމަވެފައިވާކަމަށެވެ. އެހެންކަމުން ޕީޖީ ގްރޫޕުގެ އެހެން މެމްބަރުންނަށް ފުރުސަތު ދިނުމުގެ ގޮތުން އިސްތިއުފާދެއްވީކަމަށްވެސް އަމީތް ވިދާޅުވިއެވެ.
ޕީޕީއެމްގެ ޕާލަމެންޓްރީ ގްރޫޕުގެ ފަރާތުން އެ ޕާޓީގެ ކައުންސިލްގައި މިހާރު ތިއްބަވަނީ 8 މެމްބަރުންނެވެ.
