ރާއްޖޭގެ ރަށެއްގައި މިހައި ތަނަށް ހިންގާ އެންމެ އަގު ބޮޑު މަޝްރޫއުގެގޮތުގައި ފުވައްމުލަކުގެ ފެނާއި ނަރުދަމާގެ ނިޒާމުގެ މަޝްރޫޢު މިރޭ ރައީސުލްޖުމްހޫރިއްޔާ އިފްތިތާހުކޮށްދެއްވައިފިއެވެ.
މިރޭ މި ސިޓީގައި ބޭއްވި ޚާއްސަ ރަސްމިޔާތެއްގައި އިފްތިތާޙުކޮށްދެއްވި މި މަޝްރޫޢަކީ ކުވައިތު ފަންޑުން 155 މިލިއަން ރުފިޔާއާއި ދިވެހި ސަރުކާރުގެ ޕީއެސްއައިޕީ ބަޖެޓުން 142 މިލިއަން ރުފިޔާ ޚަރަދުކޮށްގެން ހިންގާ މަޝްރޫއެކެވެ.
ޖުމްލަ 297 މިލިއަން ރުފިޔާގެ މި މަޝްރޫޢަކީ މިހާތަނަށް ރާއްޖޭގެ އަތޮޅުތެރޭގެ ރަށެއްގައި ހިންގާ އެންމެ އަގުބޮޑު މަޝްރޫޢުކަމަށް މަޢުލޫމާތުލިބެއެވެ. މަޝްރޫއުގެ މަސައްކަތް ހަވާލުކޮށްފައިވަނީ ސްރީ ލަންކާގެ ކުންފުންޏެއް ކަމަށްވާ ސިއެރާ އާ އެވެ.
