މިއަދު އިސްލާމީ އުންމަތް މިވަނީ ނުރައްކާތެރި ހާލަތެއްގައި ކަމަށާއި މިހާލަތުން އުންމަތް ސަލާމަތްކުރުމަށް އެންމެ މުސްލިމުން އެއްބަޔަކު އަނެއްބަޔަކަށް އެހީތެރިވެ އަތުގުޅާލަންޖެހޭކަމަށް މިއަދު ޙަރަމްފުޅުގައި އިއްވެވި ޙައްޖު ޚުޠުބާގައި ގޮވާލައްވައިފިއެވެ.
މިއަދުގެ ޙައްޖު ޚުޠުބާ ވިދާޅުވީ ޙަރަމްފުޅުގެ އާ އިމާމު ޑރ.އަބްދުއްރަޙުމާނު އަލް ސުދައިސް އެވެ.
މިއަދުގެ ޚުޠުބާގައިވަނީ މިއަދުގެ އިސްލާމީ ދުނިޔޭގެ ޙާލަތުގެ މައްޗަށް ބައްލަވާލައްވާފައެވެ. އެގޮތުން އިސްލާމްދީނުގެ ނަމުގައި ދުނިޔޭގެ އެތައް މިތާގައި ހިންގާ ހައްދުފަހަނައަޅާފައިވާ ޢަމަލުތަކައި، ޓެރަރިޒަމާއި، ޒުވާނުންނަށް މަގު އޮޅުވާލަން ބަޔަކު ކުރަމުންދާ މަސައްކަތްތަކުގެމައްޗަށްވެސް މިއަދުގެ ޚުޠުބާގައިވަނީ އަލިއަޅުވާލައްވާފައެވެ.
އެއްވެސް އުސޫލެއްނެތި މުސްލިމުން ކާފަރުކުރުމާއި، ކަންކަން ބިދުޢަކުރުމާއި، ހިތަށްއެރިގޮތކަށް މީހުންނާމެދު ޙުކުމްކުރުމާއި، ކުށެއް މީހުން ޤަތުލުކުރުންފަދަ އެތައްކަމެއް ދީނުގެ ނަމުގައި މިއަދު ކުރެވެމުންދާކަން ފާހަގަކުރައްވައި، ޚުޠުބާގައި ވިދާޅުވެފައިވަނީ، މިއީ އިސްލާމްދީން މަނާކުރައްވާފައިވާ ކަންކަންކަމަށެވެ.
މިފަދަ ނުރައްކާތެރިކަންކަމުން އުންމަތް ސަލާމަތްކުރުމަށް އިސްލާމީ ޤައުމުތަކުގެ ވެރިން އެކަތިގަނޑަކަށް ވާންޖެހޭކަމަށާ އިސްލާމީ އެއްޤައުމުން އަނެއް ޤައުމަށް އިހތެރިވުމަށްވެސް މިއަދުގެ ޚުޠުބާގައި ޙަރަމްފުޅުގެ އިމާމުވަނީ އިލްތިމާސްކުރައްވާފައެވެ.
މީގެ އިތުރުން ވަކިވަކި އިސްލާމީ ޤައުމުތަކުގެ ޙާލަތުގެ މައްޗަށް ބައްލަވާލައްވަމުން، ފަލަސްތީނުގެ މަސްޖިދުން އަގުސާއަށް ދިމާވެފައިވާ ހާލަތާއި އިރާގާއި ޔަމަނާއި ސުރިއާއަށް ކުރިމަތިވެފައިވާ ހާލަތުގެމައްޗަށް އިމާމު ވަނީ ބައްލަވާލައްވާފައެވެ.
މީގެ އިތުރުން އަނިޔާވެރިކަމާއި ހަރުކަށިކަން ދޫކޮށްލައި ސުލްޙަވެރިކަމާއެކު މަޝްވަރާކޮށްގެން ކަންކަން ނިންމުމަށް އިސްލާމީ ޤައުމުތަކުގެ ވެރިންނަށް ޙަރަމްފުޅުގެ އިމާމުވަނީ އިލްތިމާސްކުރައްވާފައެވެ.
