ދިވެހި ޤައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) ގެ ޚިދުމަތް މުޅި ރާއްޖެއަށް ފުޅާކުރުމަށް އެބޭންކުން ކުރިއަށް ގެންދާ މަޝްރޫއުތަކަށް މިހާތަނަށް 150 މިލިޔަން ރުފިޔާ ޚަރަދުވެފައިވާކަމަށް، ބީއެމްއެލްގެ ސީއީއޯ އެންޑްރޫ ހީލީ ވިދާޅުވެއްޖެއެވެ.
ހީލީ މިހެން ވިދާޅުވީ، މޯބައިލް ފޯނު މެދުވެރިކޮށް ޕޭމެންޓު ހެދޭ ޚިދުމަތް، ބީއެމްއެލް މޯބައިލް ޕޭ، މޯބައިލް އެޕްލިކޭޝަން ތައާރަފު ކުރުމަށް ރޭ ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ހީލީ ވިދާޅުވީ، އެބޭންކުގެ އާ ބްރާންޗުތައް ހުޅުވުމާއި، ސެލްފް ސާވިސް ބޭންކިން ސެންޓަރުތައް ގާއިމުކުރުމާއި، ރާއްޖޭގެ މީހުން ދިރިއުޅޭ ހުރިހާ ރަށެއްގައި ކޭސް އޭޖެންޓުން ހަމަޖެއްސުމާއި ޓެކްނޮލޮޖީ އަޕްގްރޭޑު ކުރުން ފަދަ ކަންކަމަށް ގާތްގަނޑަކަށް 150 މިލިޔަން ރުފިޔާ ޚަރަދު ކުރެވިފައިވާ ކަމަށެވެ.
