ނެޝަނަލް ރިފޯމް ޕާޓީ އުފެއްދުމަށް ކުރަންޖެހޭ މަސައްކަތް ކުރުމަށް އިލެކްޝަންސް ކޮމިޝަން (އީސީ) އިން ހުއްދަ ދީފިއެވެ.
އެޕާޓީއަކީ އިސްލާމިކް އެފެއާޒު މިނިސްޓްރީގެ ކުރީގެ ސްޓޭޓު މިނިސްޓަރު އައްޝައިޚް މުޙައްމަދު ދީދީ އިސްވެ ހުންނަވައިގެން އުފައްދަވާ ޕާޓީއެކެވެ. އޭނާއަކީ ނިމިދިޔަ ރިޔާސީ އިންތިޚާބުގައި ޢިލްމުވެރިން ކޮޅު ނެންގެވިއިރު ރައީސް ޔާމީނާއި، އެމަނިކުފާނުގެ ރަނިންމޭޓް ޑރ. މުޙައްމަދު ޝަހީމް ޢަލީ ސަޢީދުގެ ކޮޅު ނެންގެވި ބޭފުޅެކެވެ.
އެއިންތިޚާބު އެދެބޭފުޅުންނަށް ކާމިޔާބުކޮށް ދެއްވުމަށް މުޙައްމަދު ދީދީ ވަނީ ޑރ. ޝަހީމްގެ އަރިހުގައި ގިނަ ރަށްރަށަށް ޒިޔާރަތް ކުރައްވައި ކެމްޕޭން ކުރައްވައިފައެވެ. މުޙައްމަދު ދީދީ އަކީ މަދަނީ އިއްތިޙާދުގެ ނަމުގައި ޙަރަކާތްތައް ހިންގެވި ދުވަސްވަރު އެ އިއްތިޙާދުގެ ރައީސްކަން ވެސް ކުރެއްވި ބޭފުޅެކެވެ.
އީސީން ވިދާޅުވެފައިވަނީ ކަރިޝްމާ ޕާޓީ މޯލްޑިވްސްގެ ނަމުގައި ސިޔާސީ ޕާޓީއެއް އުފެއްދުމަށް އެކޮމިޝަނަށް ހުށަހަޅައިފައިވާ ހުށަހެޅުން މިހާރު އަނބުރައި ގެންގޮސްފި ކަމަށެވެ. މި ޕާޓީ އުފައްދަން ހުށަހަޅައިފައިވަނީ މ. ކެލަމް މުޙައްމަދު އިސްމާޢީލެވެ. މިޕާޓީ ރަޖިސްޓްރީ ކުރުމަށް އެދި ހުށަހަޅައިފައިވަނީ މިދިޔަ ބުރާސްފަތި ދުވަހުއެވެ. އެހެންނަމަވެސް އެ ހުށަހެޅުން އަނބުރައި ނެގި ސަބަބެއް އެނގިފައެއް ނުވެއެވެ.
