މޯލްޑިވިއަންއިން އެތެރޭގެ އުދުހުންތަކުގެ އަގުހެޔޮކޮށްފައިވަނީ "އަމާކީތީ ފަރަށްދާ އުސޫލުން" ކަމަށް ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަދި ޕީޕީއެމްގެ ކުރީގެ ސެކްރެޓަރީޖެނެރަލް ޑރ. ޢަބްދުﷲ ޚަލީލް ވިދާޅުވެއްޖެއެވެ.
ބަދަލު ގެނައި އަގުތަކާއެކު އޭނާ ކުރައްވައިފައިވާ ޓްވީޓެއްގައި ވިދާޅުވެފައިވަނީ އަމާބުނީތީ ފަރަށްދާ އުސޫލުން ޓިކެޓުގެ އަގުހެޔޮ ކުރުމުން ރައްދުވަނީ މަލާމާތް ކަމަށެވެ. އޭނާ މިހެން ވިދާޅުވީ މާލެއާއި އެހެން އެއާޕޯޓުތަކުގެ ދުރުމިނަށް ބަލާއިރު މާބޮޑު ތަފާތެއް ފެންނަން ނެތުމުންނެވެ. "ކުޑަހުވަދުއާއި ތިންގުނަ ދުރުމިންހުރި މާލެ، އައްޑޫ-ފުވައްމުލައް-ހަނިމާދޫ ދަތުރުގެ އަގަށްބައްލަވާ،" ޑރ. ޚަލީލް ވިދާޅުވެފައިވެއެވެ.
އެތެރޭގެ އުދުހުންތަކުގެ އަގުހެޔޮކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވަޢުދެކެވެ. މޯލްޑިވިއަންއިންވަނީ މޯލްޑިވިއަން އުދުހޭ މަންޒިލްތަކުގެ ދެކޮޅު ޓިކެޓުގެ އަގަށް ގެނައި ބަދަލުގެ އެންމެ ކުޑަމިނާއި ބޮޑުމިން ހާމަ ކުރައްވައިފައެވެ.
މޯލްޑިވިއަންގެ ނިންމުމަށް ޢަމަލު ކުރަން ފަށާނީ މިމަހުގެ 10 ވަނަ ދުވަހުން ފެށިގެންނެވެ.
