އައްޑޫ ސިޓީގައި އިއްޔެ ހަވީރު ފެށި "ހިންމަލާ ފެސްޓިވަލް 2018" ވަރަށް ކާމިޔާބު ކަމާއެކު ނިންމާލައިފިއެވެ. މިއީ އައްޑޫ ސިޓީ "އައްޑޫ ފްރެންޑްސް" އިސްވެ އޮވެ އެސިޓީގެ އެހެން ޖަމްޢިއްޔާތަކާ ގުޅިގެން ބޭއްވި ޚާއްސަ ފެސްޓިވަލެކެވެ.
ޑިސެމްބަރު 31 ވަނަ ދުވަހުގެ ހަވީރު 4 އިން އެރޭ 12 ކުރިއަށް ގެންދިޔަ ފެސްޓިވަލުގައިވަނީ ތަފާތު ކުޅިވަރު ޙަރަކާތްތައް ހިމަނައިފައެވެ. އޭގެ ތެރޭގައި، މޫދުކުޅިވަރާއި، ވާދެމުމާއި، މަސްރޭހާއި، ޢާއިލި ހަވީރަކާއި، ގަސް އިންދުމުގެ ޙަރަކާތެއް ވެސް ހިންގައިފައިވެއެވެ.
އައްޑޫ ފްރެންޑްސް ޖަމިއްޔާގެ ރައީސް އަލްއުސްތާޛު ޙުސައިން ޙަބީބް ވިދާޅުވީ މިއީ ގިނަދުވަސްތަކަށްފަހު މިފަދަ ކަމެއް އައްޑޫސިޓީގައި ބޭއްވި ފުރަތަމަ ފަހަރު ކަމަށެވެ. މީގެ ސަބަބުން ބޮޑު ޗުއްޓީއަށް ރަށުން ބޭރަށް ނުދެވިފައިތިބި މީހުންނަށް އުފާވެރި ވަގުތުކޮޅެއް ލިބިގެންދިޔަ ކަމަށް އޭނާ ވިދާޅުވިއެވެ. މިފެސްޓިވަލްގެ ސަބަބުން އިޖުތިމާޢީ ރޫޙު ވަރުގަދަވެ، އެކުވެރިކަން އަލާވެގެންދާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވިއެވެ.
ޙަބީބު ވިދާޅުވީ "އިރާދަ ކުރެއްވިއްޔާ" އަންނަ އަހަރުވެސް މިފަދަ ފެސްޓިވަލެއް މިއަށްވުރެ ފުޅާކޮށް ބޭއްވުމުގެ ވިސްނުން އައްޑޫ ފްރެންޑްސްއިން ގެންގުޅޭ ކަމަށެވެ. ހިންމަލާ ފެސްޓިވަލްގެ އެންމެ ފަހު ޙަރަކާތެއްގެ ގޮތުގައި ރޭ ބާއްވައިފައިވަނީ "މިޑްނައިޓް ރަން" އާއި، "ލެންޓަރން އެރުވުމެވެ.
