ރާއްޖޭގެ ސިޔާސީ މަސްރަޙުގައި މިދެދުވަހު އެންމެ އަޑުހަރުކޮށް ދެކެވެމުންދާ އެއްވާހަކައަކީ، ޕީޕީއެމްގެ ރިޔާސީ ޓިކެޓުގެ ވާހަކައެވެ. ނުވަތަ 2018 ވަނަ އަހަރު ބާއްވާ ރިޔާސީ އިންތިޚާބަށް ވާދަކުރެއްވުމަށް ޕީޕީއެމްގެ ޓިކެޓް މިހަރުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމަށް އަރުވާނީ، ޕާޓީގެ ޕްރައިމަރީއަކާ ނުލައިތޯ؟ ނުވަތަ ޕްރައިމަރީއެއް ބާއްވާނީތޯ ކުރެވޭ ސުވާލުގެ އަޑެވެ.
މިވާހަކަ ގޮތްގޮތަށް ފެންމަތިކޮށް ފަރުތަނީ މީޑިއާގައި އެކަންޏެވެ. ޕީޕީއެމްއިން މިމައްސަލާގައި އެއްވެސް އެއްޗެއް ނުބުނެއެވެ. އެޕާޓީގެ ރައީސްވެސް މިކަމުގައި އެއްޗެއް ވިދާޅެއްނުވެއެވެ.
އެހެންނަމަވެސް ސަރުކާރުގެ ބައެއް ވަޒީރުންނާއި، ޕީޕީއެމްއަށް ނިސްބަތްވާ ރައްޔިތުންގެ މަޖިލީހުގެ ބައެއް މެމްބަރުން މިކަމުގައި ވާހަކަފުޅުދައްކަވާފައިވެއެވެ. އެބޭފުޅުންގެ ތެރެއިން މިމައްސަލާގައި މިހާތަނަށް ވާހަކަފުޅުދެއްކެވި ހުރިހާ ބޭފުޅުންވެސް ވިދާޅުވެފައިވަނީ، ޕްރައިމަރީއަކާނުލައި 2018 ވަނަ އަހަރުގެ ޕީޕީއެމްގެ ރިޔާސީ ޓިކެޓު ރައީސް ޔާމީނަށް އެރުވިދާނެކަމަށެވެ. ނުވަތަ އަރުވަން ޖެހޭކަމަށެވެ.
މީޑިއާގައި ފެތުރިގެން އުޅޭ ވާހަކަތައް ފެށިފައިވަނީ ޕްރައިމަރީއަކާނުލައި ރިޔާސީ ޓިކެޓު ރައީސް ޔާމީނަށްދެއްވުމަށް ޕީޕީއެމްގެ ރައީސް އަލްއުސްތާޛު މައުމޫނު އަބްދުލްޤައްޔޫމު ބޭނުންފުޅު ނުވާ ކަމަށް ބުނެއެވެ.
މިވާހަކަ ފެތުރި މީޑިއާތަކުން އެވާހަކަ ބިނާކޮށްފައިވާ މަސްދަރަކީ، ރައީސް މައުމޫނު ޕީޕީއެމްގެ ބައެއް މެމްބަރުންނަށް ފޮނުއްވިކަމަށްބުނާ އެސްއެމްއެސް އެކެވެ. އެހެންނަމަވެސް ޕްރައިމަރީގެ ވަހަކައެއް، ރިޔާސީ ޓިކެޓުގެ ވާހަކައެއް، ނޫންނަމަ ރައީސް ޔާމީނުގެ ވާހަކައެއްވެސް އެ އެސްއެމްއެސް އަކު ނުވެއެވެ. އޭގައި ވަނީ ޕާޓީގެ ހަމަޖެހުމާއި، މަސްލަޙަތަށް، އަދި ކުރިމަގަށްޓަކައި، ޕާޓީގެ އަސާސީ ޤަވާޢިދާ އެއްގޮތަށް ޢަމަލުކުރުމުގެވާހަކައެވެ.
މި މެސެޖު މިޑިއާތަކުން ބޭނުންވާގޮތަށް މާނަކޮށް ތަފާތު ރިޕޯޓުތައް އެކުލަވާލަމުން ދެއެވެ.
ޕީޕީއެމްގެ އަސާސީ ގަވައިދުގައިވަނީ "ރިޔާސީ އިންތިހާބުގައި ވާދަކުރާ ކެންޑިޑޭޓަކު ހޮވާނީ ހުރިހާ މެމްބަރުންގެ މެދުގައި ބާއްވާ ޕްރައިމަރީއަކުންކަމަށެވެ." އަދި އެ ޕްރައިމަރީ ބާއްވަން ޖެހެނީ ރިޔާސީ އިންތިހާބު އޮންނަ ތާރީޚުގެ ކުރިން ތިން މަހާއި ހަ މަހުގެ މުއްދަތެއްގެ ތެރޭގައިކަމަށްވެސް އެޤަވާއިދުގައި ވެއެވެ.
މިއީ އެޕާޓީގެ ރިޔާސީ ޓިކެޓު ކެނޑިޑޭޓަކަށް ދިނުމުގެ ޢާއްމު އުސޫލެވެ.
ހަމަ އެޤަވާޢިދުގައި އެހެން އުސޫލެއްވެސް ވެއެވެ. އެއުސޫލަކީ " ޕީޕީއެމްގެ ޓިކެޓުގައި ރައީސުލްޖުމްހޫރިއްޔާގެ މަގާމަށް އިންތިޚާބުވެ، 5 އަހަރު ދުވަހުގެ ދައުރެއް އަދާކުރައްވާ ބޭފުޅަކު، ދެވަނަ ދައުރަކަށް ޕާޓީގެ ޓިކެޓްގައި ވާދަކުރައްވަން އެދިވަޑައިގަންނަވާ ނަމަ، ޕްރައިމަރީއަކަށް ނުގޮސް އެ ބޭފުޅަކަށް އެ ޓިކެޓް ދެވިދާނެ ކަމަށެވެ." މިއީ ދެވަނަ އުސޫލެވެ.
ތިންވަނަ އުސޫލެއްގެ ގޮތުގައި ޕީޕީއެމްގެ އަސާސީ ޤަވާއިދުގައިވަނީ "ޕާޓީގެ ޓިކެޓުގައި ރައީސުލްޖުމްހޫރިއްޔާކަން އަދާކުރައްވާ ބޭފުޅާއާ، ވާދަކޮށް، ޓިކެޓް ހޯދަން އިތުރު ބަޔަކު ޝައުގުވެރިކަން ފާޅުކޮށްފި ނަމަ، ޕްރައިމަރީއެއް ބާއްވަން ފެނޭތޯ ބަލަން ޕާޓީގެ ކޮންގްރެސް ނުވަތަ ގައުމީ ޖަލްސާއަކަށް ދާން ޖެހޭކަމަށް" ބުނެފައިވާ އުސޫލެވެ.
އެހެންކަމުން ރައީސް މައުމޫނުގެ މެސެޖުގައި އެވިދާޅުވަ ޕާޓީގެ އަސާސީ ޤަވާއިދުގެ ދަށުން ރައީސް ޔާމީނަށް 2018 ޕީޕީއެމްގެ ރިޔާސީ ޓިކެޓު އަރުވަން ޖެހޭނީ ޕްރައިމަރީއަކާ ނުލައެވެ. ޕްރައިމަރީއެއް ބާއްވަން ޖެހުމުގެ ސުވާލު އުފެދޭނީވެސް ރައީސްޔާމީނާ ވާދަކުރައްވަން އެހެން ބޭފުޅަކު އިއުލާން ކުރެއްވުމުންނެވެ. އެފަދަ ކަމެއް އަދިނެތެވެ. އެފަދަ ކަމެއް މެދުވެރިވިޔަސް އެކަން ނިންމާނީ ޕާޓީގެ ކައުންސިލުންނެވެ.
ދެން މީޑިއާތަކުން ނުސީދާކޮށް ކުރާ ތުހުމަތަކީ ރައީސް މައުމޫނު ރައީސް ޔާމީނަށް ތާޢީދު ނުކުރައްވާކަމުގެ ވާހަކައެވެ.
ރައީސް މައުމޫނަކީ ރައީސް ޔާމީނުގެ ބޭބޭފުޅެވެ. ރައީސް ޔާމީން އެހުންނެވީ ރައީސް މައުމޫނުގެ ޕާޓީގެ ފުރަތަމަ ރައީސުލްޖުމްހޫރިއްޔާކަމުގެ މަޤާމުގައެވެ. އެމަނިކުފާނުގެ ދެ ބޭފުޅަކު މިހާރުވެސް ވަނީ ސަރުކާރުގެ އިސްމަޤާމުތަކުގައި އެބަތިއްބެވިއެވެ. އެއްބޭފުޅަކީ ސަރުކާރުގެ އެންމެ މުހިންމު އެއް ވުޒާރާގެ ވަޒީރެވެ. ރައީސް ޔާމީނަށް ރިޔާސީ ޓިކެޓު އެރުވުމަށް މިދެބޭފުޅުން މިހާރުވެސް ތާޢީދުކުރައްވައިފިއެވެ. ސުވާލަކީ ރައީސް މައުމޫނުގެ ވިސްނުންފުޅާ ޚިލާފަށް އެމަނިކުފާނުގެ ބޭފުޅަކު ޚިޔާލުފަޅުކުރައްވަފާނެބާއެވެ؟ އަޅުގަނޑަކަށް ޤަބޫލެއް ނުކުރެއެވެ.
ދެން އުފެދޭ ސުވާލަކީ މި ބަޙުސް މިހާ ބޮޑަށް މީޑިއާގައި ފެތުރެމުންދާއިރު، ރައީސް މައުމޫނު ބަސްފުޅެއް ވިދާޅުނުވަނީ ކީއްބެގެންބާއެވެ؟
ޖަވާބަކީ އެމަނިކުފާނު ބަސްފުޅެއް ވިދާޅުވާކަށް ނުޖެހެއެވެ. އެންމެފަހުން ބޭއްވި ޕީޕީއެމްގެ ރިޔާސީ ޕްރައިމަރީއަށް ނަޒަރު ހިންގާލަމާ ހިނގާށެވެ. ޕްރައިމަރީގައި ވާދަކުރެއްވީ، މިހާރުގެ ރައީސް ޔާމީނާއި، ހޯމްމިނިސްޓަރު ޢުމަރު ނަސީރެވެ. އެދުވަސްވަރު މީޑިއާތަކުން ތަފާތު އެތައް ސުވާލެއް ރައީސް މައުމޫނަށް ދެންނެވިއެވެ. އޭރު އެމަނިކުފާނު ތާޢީދުކުރެއްވީ ރައީސް ޔާމީނަށް ކަމަށް ބައެއް މީޑިއާތަކުން ތުހުމަތުކުރިއިރު، އަނެއްބައި މީޑިއާތަކުން ތުހުމަތުކުރީ، ޢުމަރަށް ތާޢީދުކުރައްވާކަމަށެވެ.
ރައީސް މައުމޫނުގެ ޖަވާބަކަށްވީ، ޕާޓީގެ ޕްރައިމަރީ ވަކިގޮތަކަށް ނުނިމެނީސް ޕްރައިމަރީއާގުޅޭ އެއްވެސް ވާހަކަފުޅެއް ޕާޓީގެ ރައީސް ވިދާޅުވުމަކީ ހަމަޖެހޭ ކަމެއްނޫންކަމުގައެވެ.
މިފަހަރުވެސް ކަންއޮތީ އެހެންނެވެ. ޕާޓީގެ ރިޔާސީ ޓިކެޓުގެ ކަންކަން ވަކިގޮތަކަށް ނިމުމުގެކުރިން ރައީސްމައުމޫން އެކަމާގުޅޭގޮތުން ވާހަކަފުޅުދެއްކެވުމަކީ ދުރުކަމެކެވެ.
ދެން އޮތް ސުވާލަކީ ޕާޓީގައި މިފަހަރު ރިޔާސީ ޕްރައިމަރީއެއް ބާއްވަން ޕީޕީއެމް ތައްޔާރުބާއެވެ؟ އެންމެފަހުން ބޭއްވި ޕްރައިމަރީގެ ތަޖުރިބާއަށްބަލައިރު، މިވަގުތު ޕްރައިމަރީއެއް ބޭއްވުމަކީ ޕީޕީއެމްއަށް އެންމެ މަސްލަޙަތުހުރި، ފައިދާހުރި ކަމެއްކަމަށް ޤަބޫލެއްނުކުރެވެއެވެ. ޕީޕީއެމްގެ ސަރުކާރު ދެމެހެއްޓުމާއި، އެސަރުކާރުގެ މަޝްރޫޢުތައް ކުރިއަށް ގެންދިއުން ޕާޓީއަށް މާ މުހިންމެމެވެ.
ވެރިކަމުގެ ފުރަތަމަ ދައުރު ދެބައިވީއިރު، ރާއްޖޭގެ ވެރިކަމުގެ މުޅި ހަޔާތުގައި ކުރިމަތިލާން ނުޖެހޭފަދަ ބޮޑެތި ގިންޖެހުންތަކާއި، ހާދިސާތައް ކުރިމަތިވެއްޖެއެވެ. އެހެންކަމުން ދެން އިތުރަށް އެފަދަ ހަލަބޮލިކަކަމަށް ޕީޕީއެމްއިން ތަންދޭނެކަމަކަށް ޤަބޫލެއްނުކުރެއެވެ.
އެހެންކަމުން ޕީޕީއެމްގެ ރިޔަސީ ޓިކެޓު މިފަހަރުވެސް ރައީސް ޔާމީނަށް ޔަޤީން ކަމުގައި ޤަބޫލުކުރެވެއެވެ.
