ސުލްޙައިގެ މަޝްވަރާތަކުގައި ސޫރިޔާގެ އިދިކޮޅު ފަރާތްތައް ތަމްސީލުކުރާ އިސް ބޭފުޅާ މަޝްވަރާތަކުންވަކިވެވަޑައިގެން އިސްތިއުފާދެއްވީ ސޫރިޔާގެ ހަމަނުޖެހުން ހުއްޓުވުމާއި ސުލްހަ ޤާއިމުކުރުމުގައި، މިމަޝްވަރާތައް ފެއިލްވެފައިވާކަމަށް ވިދާޅުވެއެވެ.
ސޫރިޔާގެ ހަމަނުޖެހުމަށް ސިޔާސީ ޙައްލެއް ގެނައުމަށް އދ.އިން އިސްނަގައިގެން ޖެނީވާގައި ބާއްވާ ސުލްޙައިގެ ވާހަކަތައް ފެއިލްވެފައިވާކަމަށާ، އެއިން އެއްވެސް ނަތީޖާއެއް ނުނުކުންނަކަމަށް ވިދާޅުވެ، މި މަޝްވަރާތަކުގައި ސޫރިއާގެ އިދިކޮޅު ފަރާތްތައް ތަމްސީލުކުރައްވާ އިސް މަންދޫބު މުޙަންމަދު އަލުޝް އިސްތިއުފާ ދެއްވައިފި އެވެ.
އިސްތިއުފާދެއްވުމަށްފަހު އަލޫޝް މީޑިއާއަށް ދެއްވި އިންޓަވިއުއެއްގައި ވިދާޅުވެފައިވަނީ، އިދިކޮޅުފަރާތްތަކުން ބޭނުންވަނީ މިޙާރުން މިހާރަށް ސޫރިޔާގައި ހިނގަމުންދާ ލޭއޮހޮރުވުންބޮޑު ހަމަނުޖެހުންތައް ހުއްޓުވައި، ބައްޝާރުލް އަސަދުގެ އަނިޔާވެރި ޢަމަލުތަކުން ސޫރިޔާގެ ނިކަމެތިރައްޔިތުން ސަލާމަތްކުރުމަށްކަމަށެވެ. އަދި ވިހާވެސް އަވަހަކަށް ބައްޝާރު ނުހިމެނޭގޮތަށް ސޫރިޔާގެ ސަރުކާރު ބަދަލުވެގެން ދިއުމަކީ އިދިކޮޅުފަރާތްތަކުން ބޭނުންވާ ގިތްކަމަށާ، މިއިން އެއްވެސް ކަމަކަށް މި މަޝްވަރާތަކުން އަލިމަގެއް ފެނިފައި ނުވާކަމަށެވެ.
އދ. އިން އިސްނަގައިގެން، ސޫރިޔާގެ އިދިކޮޅު ހުރިހާ ފަރާތްތައް ގުޅިގެން އުފައްދާފައިވާ ހައި ނިގޯޝިއޭޝަންސް ކޮމިޓީ (އެޗްއެންސީ) ގެ ފަރާތުން މަޝްވަރާތައް، ވަނީ އެޕްރީލް މަހުން ފެށިގެން ވަގުތީގޮތުން ހުއްޓާލާފައެވެ. މަޝްވަރާތައް އަލުންފަށާނެ ތާރީޚެއް ވެސް ހާމަކޮށްފައެއް ނުވެ އެވެ. ޖުމުލަ ތިން ބުރެއްގެ މަތިން މި މަޝްވަރާތައް ބޭއްވި އިރު ވެސް އެއްވެސް ނަތީޖާއެއް ނުކުމެފައެއްނުވެއެވެ.
