މިއީ ރާއްޖޭގައި ތިބި ޚާއްސަ އެހީއަށް ބޭނުންވާ މީހުންގެ ތެރެއިންވެސް، ވަކިން ޚާއްސަކޮށް ހިނގުމުން މަޙްރޫމް ވެފައިވާ މީހުން ގޮވައިގެން ދިވެއްސަކު ފަށައިގަންނަން އުޅޭ ދަތުރުގެ ވާހަކައެވެ. މުޅިން ތަފާތު ދަތުރެއްގެ ވާހަކައެވެ. "އެމީހުންނަށް އެކަން ވާނެހެއްޔޭ" ބުނެ އެތައް ބަޔެއްގެ ސުވާލު ކުރިމަތި ވަމުންދާއިރުވެސް "އާނއެކޭ، އެމީހުންނަށް އެކަން ނުވާންވީ ކީއްވެހެއްޔޭ" ބުނެ ރާއްޖޭގައި ތިބި ޚާއްސަ އެހީއަށް ބޭނުންވާ މީހުން ގޮވައިގެން ބައިނަލް އަގްވާމީ އެތްލެޓިކްސް ޓްރެކަށް ނުކުންނަން ދިވެހިންގެ ބަޔަކު ވަރުގަދަ އަޒުމެއްގައި ތައްޔާރުވެ ދުއްވައިގަންނަން ރޮނގަށް އަރައިތިބި ވާހަކައެވެ.
ރާއްޖޭގައި ތިބި ޚާއްސަ އެހީއަށް ބޭނުންވާ މީހުންގެ ތެރެއިން އެކަމަށް ކުރިމަތިލާ ހިތްވަރުގަދަ ކޮންމެ ދިވެއްސަކު ގޮވައިގެން އެތްލެޓިކްސް ޓްރެކަށް ނުކުންނަން ތައްޔާރުވާ މި ދަތުރުގެ އެންމެ އިސް މީހަކަށް ހުރީ އަބްދުﷲ މަސްއޫދެވެ. ތިޔަ ހީކުރީ ހެޔޮކޮށެވެ. ގިނަބަޔަކަށް މަސްއޫދަކީ އާ މޫނެކެވެ. އާންމުނަށް މަސްއޫދު އަލަސް، އެތްލެޓިކްސްގައި މަސްއޫދަކީ އާމޫނެއް ނޫނެވެ. އަހަރެންނަށް ވަރަށް ކުރިއްސުރެވެސް މަސްއޫދު ފަރިތައެވެ. ރާއްޖޭގެ ކުޅިވަރު ޚަބަރުތައް ކަވަރު ކުރުމަށް ކުޅިވަރު ނޫސްވެރިޔަކަށް އަހަރެން އުޅުނު ދުވަސްވަރުއްސުރެ މިއަދާ ހަމައަށްވެސް މަސްއޫދުއާ ބައްދަލުވެ ގުޅުން އޮވެއެވެ. ކުޅިވަރު ނޫސްވެރިކަން ދޫކޮށް ސިޔާސީ އަދި އިޖުތިމާއީ އެހެންވެސް ޚަބަރުތަކަށް ޚާއްސަ ވިއެއްކަމަކު ކުޅިވަރުގެ މީހުންނާ ކުރިން އޮތް ގާތްކަމާއި ރަޙްމަތްތެރިކަން އަހަރެން މިހާރުވެސް ބާއްވާތީ އޭރު ކުޅިވަރު އެސޯސިއޭޝަން ތަކުގެ ހަރަކާތްތަކުގައި ބޭރުން އާންމުންނަށް އެހާބޮޑަށް އަޅައިނުގަނެ، އެތެރޭގެ މަސައްކަތް ތަކުގައިތިބި މީހުންނާވެސް އަހަރެން އަދިވެސް ނިކަން ގާތްކަމެއް ބަހައްޓަމެވެ. އޭގެ އެއް މިސާލަކީ މަސްއޫދެވެ.
އެންމެ ފުރަތަމަ މަސްއޫދަކީ ކާކުކަން ކުޑަކޮށް ބުނެލަދޭނަމެވެ. މީގެއަހަރުތަކެއް ކުރިން މަސްއޫދުގެ ރަސްމީ ވަޒީފާ ސްޓެލްކޯގައި އޮތަސް އޭނާއަކީ ކުޅިވަރުގައި އުޅެމުން އައި ޒުވާނެކެވެ. އޭނާ ކުޅިވަރުގެ ތެރެއަށް އެންމެ ފުރަތަމަ ނުކުތީ އެތްލެޓިކްސް ދަނޑަކަށް ނޫނެވެ. އެތްލެޓިކްސް އެސޯސިއޭޝަނުގެ ފައިސާއާބެހޭ ޝެކްޝަނަށެވެ. އެސޯސިއޭޝަނުގެ ފައިސާއާބެހޭ ބައިގައި އުޅެމުން މަސްއޫދު ހެދިވަޑާމަކީ މަޑުމަޑުން މަސައްކަތް ބޭރަށް ކޮށްޕާލީއެވެ. އެތްލެޓިކްސްގެ ތެރެއަށް ފިސާރި ރަނގަޅަށް ވަދެގަތީއެވެ. އެއާރކޮންޑިޝަންގެ ފިނީގައި ފައިސާއާބެހޭ މަސައްކަތް ކޮށްލަކޮށްލާ އިނުމުގެ ބަދަލުގައި އެތްލެޓިކްސް ކޯޗަކަށް ވުމަށް މަސައްކަތް ފެށީއެވެ. އޭނާގެ އެ ދަތުރުވެސް ކިހާ ކާމިޔާބު ހެއްޔެވެ. އޮފީހުގެ އެތެރެއިން ބޭރަށް ނުކުމެ އެތްލެޓިކްސް ކޯޗިންގ ކޯސް ހަދައި ކުރިޔަށް ގޮސް، ރާއްޖޭގެ ޖޫނިއަރ އެތްލެޓިކްސް ޓީމުތަކުގެ ހެޑް ކޯޗުކަން ކުރުމަށް ފަހު ރާއްޖޭގެ ސީނިއަރ ގައުމީ އެތްލެޓިކްސް ޓީމުގެ ހެޑް ކޯޗު ކަންވެސް އޭނާ ކުރިއެވެ. އެއަށް ފަހު އެތްލެޓިކްސް އެސޯސިއޭޝަނުން މާލެ އާއި އަތޮޅުތަކުގައި ހިންގި އެތްލެޓިކްސްގެ ކާމިޔާބު މުބާރާތްތައް ރާވައި ހިންގުމުގެ އެންމެ އިސްމީހަކަށްވެސް އޭނާ ހުއްޓެވެ. އަދި ރާއްޖެއިން ބޭރަށްދިޔަ އެތްލެޓިކްސް ޓީމުތަކާއެކުވެސް އޭނާ ގޮސްފައިވެއެވެ. އެތްލެޓިކްސްގައި މަސްއޫދުގެ ފުރަތަމަ ދަތުރުވެސް ވަރަށް ކާމިޔާބު ނޫން ހެއްޔެވެ. ދެންއޮތީ މިހާރު އޭނާ އެފަށާ މުޅިން ތަފާތު އެތްލެޓިކްސް ދަތުރުގައި ގޮސް ހުއްޓޭނެ ހިސާބެއް ބަލަން ތިބުމެވެ.
"އޮންދިގޯ މޯލްޑިވްސް" ގައި މިހާރު ވަޒީފާ އަދާކުރަމުން އަންނަ މަސްއޫދު އިސްވެހުރެ މިހާރު އެފަށާ މަސައްކަތަކީ ރާއްޖޭގައި މުޅިން އަލަށް ފަށާ ކަމެކެވެ. ނަމަވެސް ދުނިޔޭގެ ވަރަށްގިނަ ގައުމުތަކުގައި ރަސްމީ މުބާރާތްތައްވެސް ބާއްވަމުން އަންނަ ކަމެކެވެ. އަދި ބައިނަލް އަގްވާމީ މުބާރާތްތައްވެސް ނުކުޅެދޭ މީހުންނަށް ދަނީ ބާއްވަމުންނެވެ. ރާއްޖޭގައި މިއީ މުޅިން އާ ކަމަކަށްވާތީ ކުރިމަތިވާނެ ގޮންޖެހުންތައްވެސް މަސްއޫދަށް ވިސްނެއެވެ. ނަމަވެސް އޭނާ އާއި އޭނާގެ އަނެއް އެކުވެރިޔާގެ އަޒުމަކަށް ބަދަލެއް ނާދެއެވެ. މަސްއޫދު ބުނަނީ "މިކަންވާނެ" ކަމަށެވެ.
"ނުކުޅެދޭ މީހުންނާއެކު އެތްލެޓިކްސްގެ ތެރެއަށް ނުކުންނައިރު އަހަރެމެން ހަގީގަތުގައި އެންމެ ބޭނުން ވަނީ ތަފާތު ޙާދިސާތައް ދިމާވެގެން ފައި ބުރިކޮށްލަންޖެހި ހިންގުމުން ނުކުޅެދިފައިވާ މީހުންނާއި، އުފެދުމުގައިވެސް ހިންގުމުން ނުކުޅެދިފައިވާ މީހުންނާއި ވާގިނެތުމުގެ ސަބަބުން ހިނގުމުން ނުކުޅެދިފައިވާ މީހުން މި ކުޅިވަރުގެ ތެރެއަށް ވައްދަން. އެކަމަކު ފަށައިގަންނައިރު ހަމައެކަނި އެފަދަ މީހުން ލިބުން އަދި ދަތިވުމުން ލޮލަށް ނުފެންނަ މީހުންވެސް އަހަރެމެން ބައިވެރި އެބަކުރަން" މަސްއޫދު ބުންޏެވެ.
މަސްއޫދު މިކަމުގައި އެ ޚާއްސަ ވަނީ އެމީހުން ގޮވައިގެން ހަމައެކަނި އެތްލެޓިކްސްއަށް ނުކުންނާށެވެ. އެހެން ކުޅިވަރުތަކެއް އޭނާގެ ލިސްޓަކު ނެތެވެ. އެތްލެޓިކްސްގައި އޮންނަ ހުރިހާ އިވެންޓެއްގައި އެމީހުން ގޮވައިގެން ބައިވެރިވާން މަސްއޫދު ވަނީ ނިންމާފައެވެ. ނަމަވެސް އެފަދަ ބަޔަކު ގޮވައިގެން އެތްލެޓިކްސްއަށް ނުކުންނައިރު ރާއްޖޭގައި އެފަދަ ވަސީލަތްތަކެއް އަދި ނެތެވެ. އެފަދަ ހޭލުންތެރިކަމެއްވެސް އަދި ނެތެވެ. އެހެންނަމަވެސް ލިބެން ހުރި ވަސީލަތްތަކެއް ބޭނުންކޮށްގެންވެސް މަސްއޫދުގެ މިހާރުގެ އެންމެ ބޮޑު އަމާޒަކީ ރާއްޖެއިން ބޭރުގައި އޮންނަ އެތްލެޓިކްސް މުބާރާތެއްގައި ދިވެއްސަކު ގޮވައިގެން ގޮސް ބައިވެރި ކުރުމެވެ.
މި މަސައްކަތުގެ އަމަލީ ބައި މިހާރުވެސް މަސްއޫދު ވަނީ ފަށާފައެވެ. އެގޮތުން ދިރާގު ރޭހުގައި ނުކުޅެދޭ މީހަކު ގޮވައިގެން މަސްއޫދު ވަނީ މީގެކުރިން ދުވެފައެވެ. މިރިޕޯޓުގައިވާ ފޮޓޯއިން އެފެންނަނީ އެމަންޒަރެވެ. މިކަމުގައި މަސްއޫދަށް މިހާތަނަށް އެންމެ ބޮޑު އެހީތެރިކަމެއް ލިބެމުން ދަނީ ޖަޕާނާއި މޯލްޑިވްސް އޮލިމްޕިކް ކޮމިޓީންނެވެ. މަސްއޫދާއި އޭނާގެ އަނެއް އެކުވެރިޔާ މިހާރު ވަނީ ޖަޕާނަށް ދަތުރެއްވެސް ކޮށްފައެވެ. އެއީ ޓްރޭނިންގ ދަތުރެކެވެ. އަދި މިހާރުވެސް އެ ދެމީހުން އެ ތައްޔާރު ވަމުން ދަނީ އިންޑޮނޭޝިޔާއަށް ފުރުމަށެވެ. އެއީވެސް ޓްރޭނިންގ ދަތުރެކެވެ. އިންޑޮނޭޝިޔާ ދަތުރުގައި އެގައުމުގައި އޮންނަ ޚާއްސަ އެހީއަށް ބޭނުންވާ މީހުންގެ ކުޅިވަރު މުބާރާތެއް ބަލަންގޮސް، އެކުޅުންތެރިންނާއެކު ކައި، ބޮއި، ނިދައިހެދުންވެސް ހިމެނެއެވެ.
"އަހަރެންގެ އުންމީދަކީ ބޭރުގައި އޮންނަ މުބާރާތްތަކުގައި ދިވެހިން ބައިވެރި ކުރުން، މިހާރުވެސް އެކަހަލަ ހަތަރު ދިވެއްސަކު އެބަތިބި ޝައުގުވެރިކަން ހުންނަ، ބަޔެއް މީހުން ޖެހިލުންވޭ އެތްލެޓިކްސްއަށް ނުކުންނަން، އަހަރެން މިގެންގުޅެނީ ހަމައެކަނި އެތްލެޓިކްސް، އަހަރެމެން އަދި މަސައްކަތް މިކުރަނީ އަމިއްލަ ގޮތުން، ނަމަވެސް އަހަރެމެންގެ އުންމީދެއް، އަހަރެމެން ޓްރޭންކުރާ އެންމެ ދިވެއްސަކު ނަމަވެސް ބައިނަލް އަގްވާމީ މުބާރާތެއްގައި ބައިވެރި ކުރުން، އެވަރަށް ޓްރޭން ކުރެވިއްޖެނަމަ އެތްލެޓިކްސް އެސޯސިއޭޝަނުގެ ތެރެއިން ގޮސް އިންޓަރނޭޝަނަލް މުބާރާތެއްގައި ބައިވެރިވެވިދާނެ" މަސްއޫދު ބުންޏެވެ.
މިވަގުތު އެޓީމާ ގުޅިފައިވާ ހަތަރު އެތްލީޓުންގެ ތެރޭގައި ހިމެނެނީ ހިނގުމާއި، ލޮލުގެ ފެނުން ގެއްލިފައިވާ ދިވެހިންނެވެ. އޭނާގެ އެޓީމަށް ޚާއްސަ ޓްރޭނިންގ ހޯދައި ދެމުންދާ ޖަޕާނުގެ އަމާޒަކީވެސް އަންނަ އަހަރު އިންޑިޔާގައި އޮންނަ ނުކުޅެދޭ މީހުންގެ ކުޅިވަރު މުބާރާތުގައި މަދުވެގެން އެންމެ ދިވެއްސަކު ނަމަވެސް ބައިވެރި ކުރުމެވެ. ފެށުމެއްގެ ގޮތުންނެވެ.
މިއީ ކާމިޔާބަކާ ހަމައަށް ދިޔުމަށް ގޮންޖެހުންތައް ހުރި މަސައްކަތެކެވެ. ދުވަސް ނަގާނެ ކަމެކެވެ. ނަމަވެސް އޭނާގެ ޓީމަށް މިހާތަނަށް ލިބުނު ހިތްވަރަކީ ޖަޕާނުން އެމީހުންނަށް ޓްރެއިނިންގގެ ޚިދުމަތް ފޯރުކޮށްދިނުމާއި، މޯލްޑިވްސް އޮލިމްޕިކް ކޮމިޓީގެ އެހީތެރިކަންވެސް ލިބުމެވެ. ނަމަވެސް މިއީ ބޮޑު މަސައްކަތެއް ކަމުން މިކަމުގައި އޭނާގެ ޓީމަށް އިތުރު ފަރާތްތަކުގެ އެހީތެރިކަންވެސް ބޭނުންވެއެވެ. ސަރުކާރާއި އަމިއްލަ ފަރާތްތަކުގެ އެހީތެރިކަމެވެ. ސްޕޮންސަރުންނާ ނުލައި މިވަރުގެ ބޮޑު ކަމެއް ކާމިޔާބުކަމާއެކު ގެންދަން އުދަނގޫ ވާނެއެވެ. އެތްލެޓިކްސްވީމާ މި ކުޅިވަރުގެ އެކިއެކި އިވެންޓުތަކުގައި ކުޅުންތެރިން ބޭނުންކުރާ އާލާތްތަކަކީވެސް އެމީހުންނަށް ޚާއްސަ އަގުބޮޑު އެއްޗެއްސެވެ.
ސްޕޮންސަރުންގެ އެހީގެ އިތުރުން މިކަމަށް ހޭލުންތެރިކަން އުފައްދައި އެތްލެޓިކްސްއަށް ނުކުންނަން ޖެހިލުންވެފައި ތިބި ނުކުޅެދޭ މީހުންނަށް ހިއްވަރު ހޯދައިދީ ގިނަމީހުން މިކުޅިވަރުގެ ތެރެއަށް ނެރެންވެސް ގިނަބަޔެއްގެ އެހީތެރިކަން މަސްއޫދު ބޭނުންވެއެވެ. ސްޕޮންސަރުން ލިބުނަސް މީހުން ނުލިބިވެސް މިކަމެއް ނުވާނެތާއެވެ.
