ސ.ހިތަދޫ މަޝްހޫރު ފިހާރައެއް ކަމަށް "ކައްޓި ހިތްވަރު" ގައި އަލިފާނުގެ ހާދިސާއެއް ހިނގައި އަނދައި ހުލިވެއްޖެއެވެ.
ރޭ ފަތިހު 4:47 އެހައިކަންހާއިރު ހިނގި މިހާދިސާގައި އެފީހަރަ ހިންގަމުންދިޔަ އިމާރާތުގެ ފާރުތައްވެސް ވަނީ ވެއްޓިފައެވެ. އެ ހާދިސާގެ ރިޕޯޓް ލިބުމުން ސ.ހިތަދޫ ފަޔަރ ސްޓޭޝަންގެ ސިފައިން ވަނީ އެ ސަރަޙައްދަށް ގޮސް އަލިފާން ނިއްވައިފައެވެ. އަލިފާން ނިވިފައިވަނީ ފަތިހު 05:25 ގައެވެ.
މިހާދިސާގައި އެ ފިހާރައިގެ 90 އިންސައްތަ ވަނީ އެއްކޮށް އަނދައިގެން ގޮސްފައެވެ. އަދި ހާދިސާއާ ގުޅިގެން އެއްވެސް މީހަކަށް ގެއްލުމެއް ލިބިފައެއް ނުވެއެވެ. މައުލޫމާތު ލިބިފައިވާ ގޮތުގައި ފިހާރަ އަނދައި ދިޔުމުން މާލީ ގޮތުން ވަރަށްބޮޑު ގެއްލުމެއް ވެރިފަރާތަށް ލިބިގެންދާނެއެވެ. އެހެންނަމަވެސް މާލީ ގޮތުން އެފިހާރަށް ލިބިފައިވާ ގެއްލުމުގެ އެއްވެސް މައުލޫމާތެއް އަދި ލިބޭގޮތެއް ނުވެއެވެ.
ފުލުހުން ގެންދަނީ މިމައްސަލަ ބަލަމުންނެވެ. މިހާރު ވެސް އެތަންހުރީ ފުލުހުންގެ ބެލުމުގެ ދަށުގައެވެ. އެއްވެސް މީހަކަށް އެސަރަހައްދަށް ނުވަދެވޭ ގޮތަށްވަނީ ބަންދު ކޮށްފައެވެ.
