ކެނެޑާގެ އަލްބާޓާގައި އޮންނަ ފޯޓް މެކްމަރޭގެ ޖަންގައްޔެއްގައި ރޯވި އަލިފާންގަނޑު ބޮޑު ސަރަހައްދަކަށް ފެތުރުމުގެ ސަބަބުން އެ ސަރަހައްދުގައި ދިރިއުޅޭ ގިނަ ޢަދަދެއްގެ ރައްޔިތުން ސަލާމަތީ ސަރަހައްދުތަކަށް ބަދަލުކޮށްފިއެވެ.
ކަމާއި ބެހޭ ފަރާތްތަކުން ހާމަކޮށްފައިވާ ގޮތުގައި، މީހުން ސަލާމަތްކުރުމަސް ކުރި މަސައްކަތުން މިހާތަނަށް ވައިގެ މަގުން، އަށްހާހަށްވުރެގިނަ މީހުން ސަލާމަތީ ސަރަހައްދުތަކަށް ވަނީ ބަދަލުކޮށްފައެވެ.
އަލިފާނުގެ ހާދިސާގެ ސަބަބުން ނުރައްކަލަށް ހުށަހެޅިދާނެކަމަށް ބެލެވޭ ހިސާބުތަކުގައި ތިބި އިތުރު ސަތާރަހާސް މީހުން ރައްކާތެރި ސަރަހައްދުތަކަށް ގެންދިއުމުގެ މަސައްކަތް ވެސް މިޙާރު ކުރަމުންދާކަމަށް ކަމާ ބެހޭ ފަރާތްތަކުން ހާމަކުރެއެވެ.
އަލްބާޓާގައި ހިނގި އަލިފާނުގެ ހާދިސާއާއި ގުޅިގެން މިހާރުވަނީ ކުއްލި ހާލަތު އިއުލާންކޮށްފައެވެ.
މި ހާދިސާގައި އެއްވެސް މީހަކަށް ހާނީއްކައެއް ވެފައި ނުވިނަމަވެސް މި ހާދިސާގެ ސަބަބުން އިއްޔެގެ ނިޔަލަށް، އެއްހާސް ހަސަތޭކައަށްވުރެ ގިނަ އިމާރާތް ވަނީ އަނދާ ހުލިވެފައެވެ.
މިހާދިސާގެ ސަބަބުން ފޯޓް މެކްމަރޭގެ ބޮޑު ބައެއް އަނދައިގެން ދިޔުމަކީ އެކަށީގެންވާ ކަމެއް ކަމަށް ކަމާބެހޭ އިދާރާތަކުން ހާމަކުރެއެވެ.
