ދުނިޔޭގެ އެންމެ ބޮޑު ފަރު، ދަ ގްރޭޓް ބެރިއާ ރީފް ހިމާޔަތްކުރުމުގެ ބޭނުމުގައި އޮސްޓްރޭލިޔާގެ ސައިންސުވެރިން ތައްޔާރުކޮށްފައިވާ ރޮބޮޓެއް އެގައުމުން ދައްކާލައިފިއެވެ.
އެ ރޮބޮޓަކީ ފަރުތަކަށް ގެއްލުންދޭ ސްޓާފިޝްއެއް ކަމަށްވާ ކަރައުން އޮފް ތޯންސް ހޯދައި އެ މަރާލާ ރޮބޮޓެކެވެ.
ކުއީންސްލޭންޑް ޔުނިވަސިޓީ އޮފް ޓެކްނޮލޮޖީ (ކިޔުުޔޫޓީ) ގެ ސައިންސުވެރިން ބުނި ގޮތުގައި، ގްރޭޓް ބެރިޔާ ރީފްގެ ބޮޑު ބައެއް ބަލަހައްޓާނީ ގޫގްލް އިން ޚަރަދުކޮށްގެން އުފެއްދި ރޭންޖާބޮޓުގެ ނަންދެވިފައިވާ އެ ރޮބޮޓު ބޭނުން ކޮށްގެންނެވެ.
ރޭންޖާބޮޓަކީ ކުރިން ދުވަހަކުވެސް ބެލިފައިވާ ނުވާ ވަރަށް ފަރު ބަލައި، ރައްކާތެރިކުރުމުގެ ގާބިލުކަން ލިބިގަންވާ، އަށް ގަޑިރު ބެޓެރީގެ ބާރު ހިފަހައްޓާ ރޮބޮޓެކެވެ.
"ރޭންޖާބޮޓަކީ މުރަކަ ފަރުތަކުގެ މާހައުލާ ގޮޅޭގޮތަށް ކަނޑުއަޑީގައި މަސައްކަތްކުރުމަށް ތައްޔާރުކުރި ފުރަތަމަ ރޮބޮޓް." އެ ރޮބޮޓު ތައާރަފުކުރެއްވި ކުއީންލޭންޑް ޔުނިވަސިޓީ އޮފް ޓެކްނޮލޮޖީގެ ޕްރޮފެސަރު މެތިއު ޑަންބަބިން ވިދާޅުވިއެވެ.
"ގިނަ މަސައްކަތްތަކެއް ކުރެވޭ ކަނޑުގެ މި ޑްރޯން އަށް ފަރުތަކަ ތިމާވެފައިވާ ގިނަ މައްސަލަަތަކެއް ބަަލައި ދިރާސާކުރުމުގެ ގާބިލުކަން ލިބިގެންވޭ. އޭގެ ތެރޭގައި ފަރުތައް ހުދުވުމާއި، ލޮނުގަނޑު ތަޣައްޔަރުވުމާއި، ފަރުތަކަށް ނުރައްކާކުރާ ދިރުންތަކާއި، ތިމާވެށީ ނުސާފުވުމާއި، ކިސަޑުގިނަވުމުގެ މައްސަލަަތައް ހިމެނޭ." އޭނާ އިތުރަށް ވިދާޅުވިއެވެ.
ފަރުގެ މުރަކަތައް ކާ ކޮރައުން އޮފް ތޯންސް ސްޓާފިޝް ދެނެގަނެ އެއަށް ހަމަލާ ދިނުމުގެ ގާބިލުކަން ލިބިފައިވާ ރޮބޮޓުން އެ ސްޓާފިޝް މަަރާލާކަހަލަ އިންޖެކްޝަނެއް ފޮނުވާލައެވެ. އެއިންޖެކްޝަނަކީ ފަރުގެ އެހެން ދިރުންތަކަށް ގެއްލުންދޭ އެއްޗެއް ނޫނެވެ.
ތިމާވެށި ނުސާފުވުމާއި، ދަނޑުވެރިކަމުން ކަނޑަށްދޫކުރާ މާއްދާތަކުގެ ސަބަބު ސްޓާފިޝް ވަނީ އާދަޔާ ޚިލާފަށް ގިނަވެފައެވެ. ތަޖުރިބާކާރުން ގަބޫލުކުރާ ގޮތުގައި ގްރޭޓް ބެރިޔާ ރީފުގެ 2300 ކިލޯމީޓަރު ދިގެ އެ ފަރަށް ވަނީ ފަރު ހުދުވުމާއި، ކްރައުން އޮފް ތޯންސްގެ ސަބަބުން އިއާދަ ނުކުރެވޭ ވަރުގެ ގެއްލުންތަކެއް ލިބިފައެވެ .
