ފަލަސްޠީނުގެ ރެފިއުޖީންގެ ކަންތައް ބަލަހައްޓާ އދ. ގެ އިދާރާ، ޔުނައިޓެޑް ނޭޝަންސް ރިލީފް އެންޑް ވާކްސް އެޖްންސީ ފޯ ޕެލެސްޓައިން ރެފިއުޖީސް އިން ދަ ނިޔާ އީސްޓް (އަންރުވާ) އަށް އެމެރިކާއިން ދެމުން އައި އެހީ މުޅިން ކަނޑާލަން ރައީސު ޑޮނާލްޑް ޓްރަމްޕް ނިންމަވައިފި ކަމަށް ފޮރިން ޕޮލިސީ މަޖައްލާއިން ބުނެފިއެވެ. ފާއިތުވި ޖޫން މަހު އެމެރިކާންއިން ވަނީ، އަންރުވާއަށް ދޭ އެހީއާމެދު ގޮތެއް ނިންމަންދެން އެ ޖަމާއަތަށް މިއަަހަރު ދޭން ކަނޑައަޅާފައި އޮތް އެހީގެ ތެރެއިން 125 މިލިއަން ޑޮލަރުވެސް ހިފަހައްޓާފައެވެ.
އެ މަޖައްލާއިން ބުނި ގޮތުގައި މި ނިންމުން އައިސްފައިވަނީ ރައީސު ޓްރަޕްމާއި، އޭނާގެ އެޑްވައިރު އަދި ދަނބިދަރިކަލުން ޖެރަޑް ކުޝްނާއާއި، ޚާރިޖީ ވަޒީރު މައިކް ޕޮމްޕެއޯއާ ތިންބޭފުޅުން ކުރެއްވި މަޝްވަރާތަކަކަށް ފަހުގައެވެ. އަދި ވަރަށް ގިނަ ގައުމުތަކުގެ ސަރުކާރުތަކަށް އެމެރިކާގެ މި ނިންމުން މިހާރު އަންގާފައިވާ ކަމުގައި އެ މަޖައްލާއިން ބުނެފައި ވެއެވެ.
އެ ތިންބޭފުޅުގެ މިފަދަ ނިންމުމެއް ނިންމިކަން ސްޓޭޓް ޑިޕާޓްމަންޓުން (ޚާރިޖީ ވުޒާރާއިން) އިންކާރުކުރި ނަމަވެސް، އެ ޑިޕާޓުން ބުނީ އަންރުވާއާ މެދު އެމެރިިކާ ގެންގުޅޭ ސިޔާސަތަކީ އަބަދުވެސް މުރާޖައާކުރެވެމުންދާ ސިޔާސަތެއް ކަމުގައެވެ.
އެމެރިކާއަކީ އަންރުވާއަށް އެންމެ ބޮޑު އެހީއެއް ދެމުން އައި ގައުމެވެ. އެއީ އަހަރަކު 350 މިލިއަން ޑޮލަރެވެ. މިއަދަދާ ގާތްކުރާ އަދަދަކަށް ވެސް އެހެން ގައުމަކުން އެހީ ނުދެއެވެ. އެމެރިކާއިން ދޭ އެހީއަކީ އަންރުވާގެ އަހަރީ ބަޖެޓު ކަމުގައިވާ 1.2 ބިލިއަން ޑޮލަރުގެ ހަތަރުބައިކުޅަ އެއްބައެވެ.
އަންރުވާއަކީ ޖޯޑަން، ސީރިޔާ، ލެބެނާން، ހުޅަނގު އައްސޭރި އަދި ޣައްޒާގައި ދިރިއުޅޭ ފަލަސްޠީނުގެ ރެފިއުޖީންގެ ކަންތައް ބެެލެެހެއްޓުމުގެ މަގުސަދުގައި 1949 ވަނަ އަހަރު އުފެއްދި އިދާރާއެކެވެ.
ޑޮނާލްޑް ޓްރަމްޕް އެމެރިިކާގެ ރައީސުކަމާ ހަވާލުވެވަޑައިގަތް ފަހުން، އެމެރިކާގެ ސިޔާސަތު ކުރިއަށް ވުރެވެސް ބޮޑަށްއިސްރާއީލުގެ ކޮޅަށް ޖެހެމުން ދާކަން ފާހަގަކުރެވެއެވެ. މިގޮތުން، ފާއިތުވި ޑިސެންބަރު މަހުގެ 6 ވަނަ ދުވަހު އެމެރިކާއިން ވަނީ ޤުދްސަކީ އިސްރާއީލުގެ ވެރިރަށްކަމުގައި ނިންމައި، އެމެރިކާގެ އެންބަސީ ޤުދްސަށް ބަދަލުކޮށްފައެވެ.
