އިލްމު އުނގެނުމަކީ މާތްވެގެންވާ އިސްލާމްދީނުގެ އަސާސެއް ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒިޔާދު ބާގިރު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ މިރޭ އިސްލާމީ މަރުކަޒު ހޯލުގައި އިމާމުންނާއި ޚަޠީބުން ތާޒާކުރުމުގެ ގޮތުން ބޭއްވި 10 ވަނަ މަސައްކަތު ބައްދަލުވުމުގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ކޮންމެ މުސްލިމަކީވެސް ޢިލްމު އުނގެނުމަށް އަޒުމް ކަނޑައަޅާ ބަޔަކަށްވާންޖެހޭ ކަމަށާއި، ގިނައިން ކެއުމުން މިހެއްގެ ހަށިގަނޑު ބޮޑުވެގެންދާފަދައިން ޢިލްމު އުނގެނުމުގެ ސަބަބުން އިންސާނާގެ ސިކުނޑި ތަނަވެސް ވެގެންދާނެ ކަމަށްވެސް މިނިސްޓަރ ވިދާޅުވެފައެވެ. އަދި މީގެ އިތުރުން މިސްކިތްތަކުގެ އިމާމުންނަކީ ރައްޔިތުންނަށް ޢިލްމު އުނގަންނައި ދިނުމުގެ މަސްއޫލިއްޔަތު އަދާކުރާ ބަޔަކަށްވާންޖެހޭ ކަމަށާއި އިމާމުންނަކީ އަބަދުވެސް ޢިލްމުގެ އަހުލުވެރިންނަށް ވާންޖެހޭކަމަށް މިނިސްޓަރ ވަނީ ވިދާޅުވެފައެވެ.
މި ރަސްމިއްޔާތުގައި މިނިސްޓަރުގެ ނާއިބުން ކަމަށްވާ އަބުދުލްޣަފޫރު އަޙްމަދާއި، ޑެޕިއުޓީ މިނިސްޓަރ އަދި އިސްލާމީ ފަތުވާދޭ އެންމެ މަތީ މަޖްލީހުގެ ނައިބު ރައީސް އައްޝައިޚް އިބްރާހިމް އަޙްމަދާއި އދ. އަތޮޅު ކައުންސިލްގެ ޑިރެކްޓަރ އަލީ ފަހުމީ ވާހަކަފުޅު ދެއްކެވިއެވެ.
މި މަހު 11 އިން 12 އަށް ކުރިއަށްގެންދިޔަ މި މަސައްކަތު ބައްދަލުވުމުގެ މަޤްޞަދަކީ، އިމާމުންނާއި ޚަޠީބުންނަކީ މުޖްތަމަޢުގައި ވަރަށް މުހިންމު ދައުރެއް އަދާކުރާ ބަޔަކަށް ވެފައި، އިމާމުންނާއި ޚަޠީބުންގެ މަސައްކަތަށް ޒަމާނާ ގުޅިގެން އަންނަންޖެހޭ ބަދަލުތައް އޮޅުންފިލުވައިދީ ހޭލުންތެރި ކުރުވުމެވެ. މި މަސައްކަތު ބައްދަލުވުމުގައި 133 އިމާމުންނާއި ޚަޠީބުންވަނީ ބައިވެރިވެފައެވެ.
އިމާމުންނާއި ޚަތީބުން ތާޒާކުރުމުގެ ގޮތުން މީގެ ކުރިން ދިވެހިރާއްޖެ އެކި ކަންކޮޅުތަކަށް އަމާޒުކޮށް 9 މަސައްކަތު ބައްދަލުވުމެއްވަނީ ބާއްވާފައެވެ. އަދި ކުރިއަށް އޮތް ތަނުގައިވެސް މިފަދަ އިތުރު ވޯކްޝޮޕްތައް ރާއްޖޭގެ އެކި ސަރަޙައްދު ތަކުގައި ކުރިއަށް ގެންދިއުމަށްވަނީ ހަމަޖެހިފައެވެ.
