އެމެރިކާގެ ކޮންގްރެސްގެ މެންބަރުކަމަށް ހޮވިވަޑައިގަންނަވާ ފުރަތަމަ މުސްލިމް އަންހެނަކަށް ރަޝީދާ ޠުލައިބު ވެވަޑައިގަންނަވާނެކަން ގާތްގަނޑަކަށް ޔަގީންވެއްޖެއެވެ.
މިޗިގަން ސްޓޭޓްގެ ވެރިރަށް ޑިޓްރޮއިޓުން ބައެއް ހިމެނޭ 13 ވަނަ ދާއިރާއިން ކޮންގްރެސްއަށް ވާދަކުރާ ކެންޑިޑޭޓަކު ހޮވުމަށް ބޭއްވި ޕްރައިމަރީ އޭނާ ވަނީ ކާމިޔާބުކުރައްވާފައެވެ. ޑިމޮކްރެޓިކް ޕާޓީގެ ވާދަވެރިކަން ބޮޑު ޕްރައިމަރީ އޭނާ ކާމިޔާބުކުރެއްވީ 5 ކެންޑިޑޭޓަކާ ވާދަކުރައްވައިގެންނެވެ. ނޮވެމްބަރު މަހު، ދައުރުގެ މެދުތެރެއިން ބާއެްވާ ކޮންގެރެސްގެ އިންތިޚާބު އޭނާއާއި ވާދަކުރައްވާނެ ރިޕަބްލިކަން ކެންޑިޑޭޓަކު ނެތުމުން އޭނާގެ ގޮނޑި މިވަނީ ގާތްގަނޑަކަށް ޔަގީންވެފައެވެ.
ޓްރަމްޕް ގެންގުޅުއްވާ ނަސްލީ އަދި ދީނީ ތަފާތުކުރުމުގެ ސިޔާސަތުތަކާ ދެކޮޅަށް 2016 ވަނަ އަހަރުގެ ރިޔާސީ އިންތިޚާބުގައި އޭރުގެ ރިޔާސީ ކެންޑިޑޭޓު ޑޮނާލްޑް ޓްރަމްޕް ދެއްވި ކެއުމެއްގައި ހަރުއަޑުން އަޑުއުުފުއްލަވައިގެން އޭނާ އެތަނުން ބޭރުކޮށްލެވިފައި ވެއެވެ. އެފަހުން އޭނާ ވެވަޑައިގެންފައި ވަނީ ޓްރަމްޕުގެ ސިޔާސަތުތަކަށް އެންމެ ބޮޑަށް ފާޑުވިދާޅުވާ އެެއް ބޭފުޅަކު ކަމުގައެވެ.
ފަލަސްޠީނުން ޑިޓްރޮއިޓަށް ހިޖުރަަކުރި ދެމަފިރިންނަށް ލިބުނު 14 ކުދިންގެ ތެރެއިން އެންމެ ދޮށީ ރަޝީދާ ހަރްބީ ޠުލައިބަކީ ސިޔާސީ ދާއިރާއަށް އާ ބޭފުޅެއް ނޫނެވެ. ވޭން ސްޓޭޓް ޔުނިވަސިޓީން ޕްލިޓިކަލް ސައިންސުން ޑިގްރީ ހާސިލުކުރެއްވުމަށް ފަހު އޭނާ ވަނީ ސިޔާސީ ދާއިރާއަށް ނުކުމެވަޑައިގެންފައެވެ. އޭނާ ވަނީ 2008، 2010 އަދި 2012 ގައި މިޗިގަން ސްޓޭޓް އެސެންބްލީގެ ޑިޓްރޮއިޓްގެ ގޮނޑިއަކަށް ޖެހިޖެހިގެން 3 ފަހަރު ހޮވިވަޑައިގެންްފައެވެ. އަދި ތިން ދައުރަށްވުރެ ދިގުމުއްދަތަށް މެންބަރުކަން ނުކުރެވޭތީ 2014 ވަނަ އަހަރު އޭނާ ކުރިމަތިނުލައްވައެވެ.
ހުރިހާ ދީނަކާއި ނަސްލެެއްގެ މީހުންނަށް އެމެރިކާގައި ހަމަހަމަކަން ހޯއްދަވައިދެއްވުމަށް ވަކާލާތުކުރައްވާ ޠުލައިބު ވަނީ އޭނާ ކޮންގްރެސްގެ މެންބަރަކަށް ވެވަޑައިގަތުމަށް ފަހުވެސް އެކަންކަމަށް ވަކާލާތުކުރައްވާނެކަމަށް ވިދާޅުވެފައެވެ.
އިސްރާއީލުން ހިފާފައިވާ ހުޅަނގު އައްސޭރީގެ ކުޑަ އަވަށެއްގައި ދިރިއުޅޭ ރަޝީދާ ޠުލައިބުގެ އާއިލާއިން ވަނީ އޭނާގެ ކާމިޔާބީ ފާހަގަކުރުމަށް ކުޑަ ހަފުލާއެއް ބާއްވާފައެވެ.
އެމެރިކާގެ ތާރީޚުގައި މިހާތަނަށް ކޮންގްރެސްގެ މެންބަރުކަމް ކުރައްވާފައި ވަނީ މުސްލިމް ދެބޭފުޅުންނެވެ. އެއީ ފިރިހެން ދެބޭފުޅުން ކަމުގައިވާ ކީތު އެލިސަން އާއި އަންޑްރޭ ކާސަންއެވެ. އެ ދެބޭފުޅުން ހޮވިވަޑައިގަތީ 2006 އާއި 2008 ގައެވެ.
