ވެލާނާ އިންޓަރނޭޝަނަލް އެއާޕޯޓުގައި ދެވަނަ ރަންވޭއެއް ސަރުކާރުން ނޭޅިނަމަ އެ އެއާޕޯޓު ނެތުނީސް ކަމަށް މަޝްހޫރު ވިޔަފާރިވެރިޔާ މުހައްމަދު އުމަރު މަނިކު ވިދާޅުވެއްޖެއެވެ.
ޕީއެސްއެމް އިން މިހާރު ދައްކަމުން ގެންދާ "މައި ނޭޝަން މައިފިއުޗަރ" ޕްރޮގްރާމުގައި ވާހަކަ ދައްކަވަމުން އޭނާ ވިދާޅުވީ ޖީއެމްއާރުން އެތަން ހިންގިއިރު އެތަނުގައި ރަންވޭއެއް އެޅުމަށް ހަމަޖައްސާފައި ނުވާކަމަށެވެ.
ސަރުކާރުން އެތަނުގައި ދެވަނަ ރަންވޭއެއް އަޅުއްވަނީ މީގެ އެތައް ދުވަހެއް ކުރިން ފެށިގެން އެތަނުގެ ގެރެންޓީ ވެސް ހަމަވެފައި ވަނިކޮށް ކަމަށް އޭނާ ވިދާޅުވިއެވެ. އެއާޕޯޓުގައި ހެދި ޓެސްޓުތަކުންވެސް އެތަނަށް ބޯޓު ފަހަރު ޖެއްސުން ރަނގަޅު ނޫންކަމަށް ދައްކާފައިވާ ކަމަށް ވެސް އޭނާ ވިދާޅުވިއެވެ. 2004 ވަނައަހަރު އެރި ސުނާމީގެ އަސަރުވެސް ވަރަށްބޮޑަށް އެއާޕޯޓުގެ ރަންވޭއަށް ކޮށްފައިވާ ކަމަށް އޭނާ ވިދާޅުވިއެވެ.
މުހައްމަދު އުމަރުމަނިކު ވިދާޅުވީ އެއާޕޯޓު ތަރައްގީ ކުރުމަށް ސަރުކާރުން އެއްބިލިއަން ޑޮލަރު އިންވެސްޓް ކުރެއްވުމަކީ އެއްވެސް މައްސަލައެއް ނޫންކަމަށާއި އެއީ ކުރައްވަން ޖެހޭ ކަމެއް ކަމަށެވެ. އެ މަޝްރޫއުއަކީ އިންވެސްޓްމެންޓް ކަވަރު ކުރެވޭނެ ވަރުގެ މަޝްރޫއެއް ކަމަށް ވެސް އޭނާ ވިދާޅުވިއެވެ. އެވަރުގެ އިންވެސްޓެއް ކޮށްގެން އެއާޕޯޓަށް ޒަމާނީ ކުރިއެރުން ގެނެސް ވަސީލަތްތައް އިތުރުކޮށް މިޒަމާނީ ފެންވަރަށް ކަންކަން ބަދަލު ކުރެވޭނެ ކަމަށް ވެސް ވިދާޅުވިއެވެ.
