އިތިއޯޕިޔާއާއި އެރިޓްރިޔާ މިހާރު ތިބީ ހަނގުރާމައިގެ ހާލަތެއްގައި ނޫންކަމަށް އެ ދެގައުމުން ބުނެފިއެވެ. އިރުމަތީ އެފްރިކާގެ އަވަށްޓެރި ދެގައުމުން މިހެން ބުނެފައި ވަނީ، ދެގައުމުގެ ދެމެދުގައި އެތައް އަހަރެއް ވަންދެން ހިނގަމުން އައި ހަމަނުޖެހުމާއި، ދެކޮޅުވެރިކަން ނިމުމަކަށް ގެނައުށް ދެގައުމުގެ ދެމެދުގައި އެރިޓްރިޔާގެ ވެރިރަށް އަސްމަރާއި ބޭއްވި ވާހަކަތައް ކާމިޔާބުކަމާއެކު ނިންމާލުމަށް ފަހުއެވެ.
އެރިޓްރިޔާގެ އިންފޯމޭޝަން މިނިސްޓަރު ޔެމާނޭ ގެބްރެމެސްކެލް ކުރެއްވި ޓުވީޓެއްގައި ވިދާޅުވީ އިތިއޯޕިޔާގެ ބޮޑުވަޒީރު އަބީ އަޙްމަދާއި އެރިޓްރިޔާގެ ރައީސު އަސާއިއަސް އަފްވާކީ ވަނީ "ސުލްހަވެރިކަމާއި ރަހުމަތްތެރިކަމުގެ ގުޅިފައިވާ ބަޔާނެއް" ގައި ސޮއިކުރައްވާފައެވެ.
އެބަޔާނުގައި ވާގޮތުގައި، "ދެގައުމުގެ ދެމެދުގައި އޮތް ހަނގުރާމައިގެ ހާލަތު ވަނީ ނިމުމަކަށް އައިސްފައެވެ. ސުލްހަވެރިކަމާއި، ރަހުމަތްތެރިކަމުގެ އައު ދައުރެއް ވަނީ ފެށިފައެވެ." އަދި "ސިޔާސީ، އިގުތިސާދީ، އިޖުތިމާއީ، ސަގާފީ އަދި ސަލާމަތީ ކަންކަމުގައި ދެގައުމުގެ ގުޅުން ބަދަހިކުރުމަށް ދެގައުމުން މަސައްކަތްކުރާނެއެވެ."
ރައީސު އަސާއިއަސް ދެއްވި ރޭގަނޑުގެ ފަރިއްކޮޅެއްގައި ވާހަކަފުޅު ދައްކަވަމުން ބޮޑުވަޒީރު އަބީ ވަނީ އެބަޔާނުގައިވާ ވާހަކަތައް ތަކުރާރުކުރައްވާފައެވެ. އޭނާ އިތުރަށް ވިދާޅުވީ ވިޔަފާރިއާއި، ދަތުރުފަތުރުގެ ގުޅުންތައް ގާއިމުކޮށް ސަރަހައްދީ ރޮނގު ހުޅުވާލާނެ ކަމުގައެވެ.
"އެއާލައިންތަކުގެ ދަތުރުތައް ފެށުމަށާއި، ބަނދަރުތައް ހުޅުވާލުމަށާއި، ދެގައުމުގެ ރައްޔިތުންނަށް އައިސް ގޮސް ވެވޭނެ ގޮތް ހެދުމަށާއި، އެމްބަސީތައް ހުޅުވުމަށް އަހަރުމެން ވަނީ އެއްބަސްވެފައި" ބޮޑުވަޒީރު އަބީ ވިދާޅުވިއެވެ.
އިތިއޯޕިޔާގެ ފާނާ ބްރޯޑްކާސްޓިންގ އިން ޚަބަރު ދިން ގޮތުގައި، އިތިއޯޕިޔަން އެއަރލައިންސް ގެ ދަތުރުތައް އަންނަ ހަފުތާގެ ތެރޭގައި އެރިޓްރިޔާގެ ވެރިރަށް އަސްމަރާއަށް ފަށާނެއެވެ. އަދި ވިހި އަހަރު ފަހުން ދެގައުމުގެ ދެމެދުގައި ފޯނުގެ ސީދާ ގުޅުންވެސް ވަނީ ގާއިމުކޮށްފައެވެ.
ދެގައުމުގެ ދެމެދުގައި ގުޅުން މީގެ މަހެއްހާ ދުވަސް ކުރިން ރަނގަޅުވާން ފެށީ، 2002 ވަނަ އަހަރު އދ. ގެ ސަލާމަތީ މަޖިލީހުން ފާސްކުރި ގަރާރަށް ބޯލަނބައި، ދެއަހަރުވަންދެން ދެގައުމުގެ ސަރަހައްދީ ރޮނގުގައި ހިނގި ހަނގުރާމައަށް ފަހު އިތިއޯޕިޔާގެ ދަށުގައި އޮތް ބަދްމޭ އަވަށް އެރިޓްރިޔާ އަށް ދޭނެކަމަށް އިތިއޯޕިޔާގެ ބޮޑުވަޒީރު އަބީ ވިދާޅުވި ފަހުންނެެވެ.
އެރިޓްރިޔާ ވަނީ އިތިއޯޕިޔާގެ އަތްދަށުން މިނިވަންވުމަށް 1961 ވަނަ އަހަރުން 1991 ވަނަ އަހަރާއި ހަމައަށް 30 އަހަރުގެ ހަނގުރާމައެއް ކޮށްފައެވެ. އެހެންކަމުން މިނިވަންވުމަށް ފަހު ދެގައުމުގެ ހަނގުރާމައި ހާލަތު އޮތީ ރަސްމީކޮށް ނުނިމިއެވެ.
މިހާރު ދެގައުމުން ސޮއިކުރި އެއްބަސްވުމަކީ ބައިގަނުރުވީ ހަނގުރާމައި ހާލަތު ރަސްމީކޮށް ނިންމި އެއްބަސްވުމެވެ.
