ކުރިޔަށް އޮތްތަނުގައި ރިޔާސީ އިންތިޚާބުގައި ވާދަކުރާ ކެންޑިޑޭޓުން ދައްކަންޖެހޭ އިދާރީ ފީގެ އަގު 1 ލައްކަ ރުފިޔާއަށް ބޮޑުކޮށް އިންތިޚާބުގެ ޤާނޫނަށް އެ އިސްލާހު އިތުރުކުރުމަށް ފަހު މިއަދު ރައްޔިތުންގެ މަޖިލީހުން ފާސްކޮށްފިއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި އެގޮތަށް އިސްލާހުކޮށް ފާސްކޮށްފައި ވަނީ 34 މެމްބަރުންގެ އިއްތިފާގުންނެވެ. އިދިކޮޅު އެއްވެސް މެމްބަރެއް ބައިވެރިނުވެ މިއަދުވެސް ކުރިޔަށްދިޔަ މަޖިލީހުގެ ޖަލްސާގައި އެ އިސްލާހު ފާސްކޮށްފައި ވަނީ ރައްޔިތުންގެ މައްޗަށް އަމަލުކުރަން ލާޒިމުކުރާ ކަންކަމުގައި ޤާނޫނުތައް ފާސްކުރާއިރު 43 މެމްބަރުން މަޖިލީހުގައި ނެތަސް ވޯޓަށް އެހޭނެކަމަށް ފާސްކުރުމަށް ފަހުއެވެ.
ސަރުކާރުގެ ފަރާތުން ފަރެސްމާތޮޑާ ދާއިރާގެ މެމްބަރު ޙުސައިން މުޙަންމަދު ލަތީފް ހުށަހެޅި އިސްލާހު މިއަދު ފާސްވުމާއެކު މި އިސްލާޙު ރައީސުލްޖުމްހޫރިއްޔާ ތަސްދީގު ކުރައްވާ ދުވަހުން ފެށިގެން އެއަށް އަމަލު ކުރެވޭނެއެވެ. އެހެންކަމުން މިއަހަރު އޮންނަ ރިޔާސީ އިންތިޚާބުގެ ކުރިން ރައީސް މި އިސްލާޙު ތަސްދީގު ކުރައްވައިފިނަމަ މި އަހަރުގެ އިންތިޚާބުން ފެށިގެން ރިޔާސީ ކެންޑިޑޭޓުން ކުރިމަތިލައްވާއިރު 1 ލައްކަ ރުފިޔާ ދައްކަން ޖެހޭނެއެވެ. މީގެކުރިން ރިޔާސީ ކެންޑިޑޭޓުން އިދާރީ ފީގެ ގޮތުގައި ދައްކަމުން އައީ 40 ހާސް ރުފިޔާއެވެ.
މިއަހަރުގެ ރިޔާސީ އިންތިޚާބު ސެޕްޓެމްބަރު 23 ވަނަ ދުވަހު ބާއްވަން ނިންމާފައި ވިޔަސް އިންތިޚާބުގައި ވާދަކުރައްވާ ކެންޑިޑޭޓުންނަށް ކުރިމަތިލުމުގެ ފުރުޞަތު އަދި ހުޅުވައެއް ނުލައެވެ. ނަމަވެސް ޕީޕީއެމްގެ ފަރާތުން މިހާރުގެ ރައީސް އަބްދުﷲ ޔާމީން ކުރިމަތިލައްވާނެކަން ކަށަވަރު ވެފައިވާއިރު އިދިކޮޅުން ހިންނަވަރު ދާއިރާގެ މެމްބަރު އިބްރާހިމް މުޙަންމަދު ސޯލިޙް (އިބޫ) އެމްޑީޕީގެ ޓިކެޓުގައި ކުރިމަތިލައްވާނެކަން މިހާރު ވަނީ އިއުލާނު ކޮށްފައެވެ. މީގެއިތުރުން އަމިއްލަ ކެންޑިޑޭޓެއްގެ ގޮތުގައި ކުރީގެ ހޯމް މިނިސްޓަރު އުމަރު ނަސީރުވެސް ކުރިމަތިލައްވާނެ ކަމަށް ވަނީ ވިދާޅުވެފައެވެ.
