އެމެރިކާގެ ރައީސު ޑޮނާލްޑް ޓްރަމްޕްގެ އެދިވަޑަގަތުމަށް އިޖާބަދެއްވުމުގެ ގޮތުން، ބޭނުން ޖެހިއްޖެ ހިނދެއްގައި ތެޔޮ އުފައްދާ މިންވަރު އިތުރުކުރައްވަން ސައޫދީ ރަސްގެފާނު ސަލްމާން ބިން ޢަބްދުލްޢަޒީޒު އެއްބަސްވެވަޑަގެންފައިވާ ކަމުގައި ވައިޓް ހައުސްއިން ބުނެފިއެވެ. ސައޫދީން ބޭނުންވެއްޖެ ހިނދެގައި ދުވާލަކު ދެ މިލިއަން ފީފާ ތެޔޮ އިތުރަށް އުފެއްދުމުގެ ގާބިލުކަން ލިބިގެންވާ ކަމަށް ވެއެވެ.
"ސައޫދީންނަށް ދުވާލަކު ދެ މިލިޔަން ފީފާ ތެޔޮ އުފެއްދުމުގެ ޤާބިލުކަން ލިބިގެންވާ ކަމަށާއި، ބޭނުން ޖެހިއްޖެ ހާލަތެއްގައި ތެލުގެ ބާޒާރުގެ ހަމަ ޖެހުމަށްޓަކައި، ވިސްނުންތެރިކަމާއެކު ތެޔޮ އުފައްދާ މިންވަރު އިތުރުކުރެވިދާނެކަމަށް ސަލްމާން ރަސްގެފާނު ވިދާޅުވިއެވެ." ވައިޓް ހައުސްގެ ބަޔާނުގައި ވެއެވެ.
އެހެންނަމަވެސް، ސައޫދީ ތެލުގެ ސިނާއަތުގެ އިސް ފަރާތްތަކާ ގާތް މިހަކާ ހަވާލާދީ ރޮއިޓާސް އިން ބުނެފައި ވަނީ، ސައުދީ ވިސްނަމުން ދަނީ މިމަހުގެ ތެރޭގައި ދުވާލަކު 2 ލައްކަ ފީފާ އިތުރުކުރުމަށެވެ.
ފާއިތުވި ޖޫން މަހުގެ 22 ވަނަ ދުވަހު ސައޫދީންނާއި، އޮގަނައިޒޭޝަން އޮފް ޕެޓްރޯލިއަމް އެކްސްޕޯޓިން ކަންޓްރީސް (އޯޕެކް) އެހެން ގައުމުތަކާއި، އޯޕެކްގައި ނުހިމެނޭ، ތެޔޮ އުފައްދާ ރަޝީޔާ ފަދަ ގައުމުތަކުން އެއްބަސް ވެފައިވަނީ ތެލުގެ އަގު ކޮންޓްރޯލްކުރުށްޓަކައި ހުރިހާ ގައުމަކުން އެކުގައި ދުވާލަކަށް 7 ލައްކައާއި 2 މިލިޔަން ފީފާއާއި ދެމެދު އަދަދަކަށް އިތުރުކުރުމަށެވެ. ސައޫދީން 2 މިލިއަން އިތުރުކޮށްފިއްޔާ މިއަދަދު ދެގުނަވެގެން ދާނެއެވެ.
މިކަމާ ގުޅިގެން އީރާނުން ވަނީ ސައޫދީންނަށް އިންޒާރުދީފައެވެ. އީރާނުގެ ރައީސުގެ އިސް ނާއިބު އިސްޙާޤު ޖަހާންގީރީ ވިދާޅުވީ އެއްވެސް ފަރާތަކަށް އީރާނުތެ ތެލުގެ ހިއްސާއިން ވައްކަން ކުރުމުގެ ފުރުސަތު ނުދޭނެ ކަމުގައެވެ. އޭނާ އެކަން ސިފަކުރެއްވީ "އެންމެ ބޮޑު ޚިޔާނާތު" ގެ ގޮތުގައެވެ. ޖަހާންގީރީ ވިދާޅުވީ އެފަދަ ކަމެއް ކުރި ބަޔަކު "ކޮންމެވެސް ދުވަހަކު އެކަމުގެ އަގުދައްކަން ޖެހޭނެ" ކަމުގައެވެ.
ޖަހާންގީރީ އިތުރަށް ވިދާޅުވީ އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކާ ކުރިމަތިލުމުގެ ގޮތުން އަމިއްލަ ފަރާތްތަކަށް އީރާނުގެ ބާޒާރުން ތެޔޮ ގަނެގެން ބޭރަށް ވިއްކުމުގެ ހުއްދަ ދޭނެ ކަމުގައެވެ.
