ސަތިރީސް ވޯޓުން ފަނޑިޔާރުން އައްޔަން ކުރުމަކީ ދިވެހި އުންމަތަށް ބަދުބަސް ބުނުން: ނަޝީދު

ރައްޔިތުންގެ މަޖިލީހުގައި ހިމެނޭ 85 މެންބަރުންގެ ތެރެއިން 36 މެންބަރުންގެ ވޯޓު ލިބިގެން ސްޕްރީމްކޯޓުގެ ފަނޑިޔާރު ކަމަށް ބޭފުޅުން އައްޔަންވީ ކަމަށް ދެއްކުމަކީ ފަނޑިޔާރު ކަމަށް އައްޔަންވީ ކަމަށް ވިދާޅުވާ ބޭފުޅުންނަށާއި، ދިވެހި އުންމަތަށް ބުނާ ބަދުބަހެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

"އަށްޑިހަ ފަސް މެންބަރުންގެ މަޖިލީހަކުން 36 ވޯޓާއެކު ރާއްޖޭގެ ސްޕްރީމް ކޯޓަށް ފަނޑިޔާރުން އައްޔަންވީ ކަމަށް ދެއްކުމަކީ، ފަނޑިޔާރު ކަމަށް އައްޔަންވީ ކަމަށް ވިދާޅުވާ ބޭފުޅުންނަށާއި، އަދި މުޅިދިވެހި އުންމަތަށް ބުނާ ބަދުބަހެއް،" ރައީސް ނަޝީދު ކުރެއްވި ޓްވީތެއްގައި ވިދާޅުވެފައިވެއެވެ.

ރައީސް ނަޝީދު މިހެން ވިދާޅުވެ ޓްވީޓް ކުރެއްވީ ސްޕްރީމްކޯޓުގެ ފަނޑިޔާރު ކަމަށް ތިން ބޭފުޅަކު އަޔަން ކުރުމަށް މަޖިލީހުން ރޭ ފާސް ކުރެއްވުމުންނެވެ. ރޭ ވަނީ އުއްތަމަ ފަނޑިޔާރު ކަމަށް ސްޕްރީމްކޯޓުގެ ފަނޑިޔާރު ޑރ. އަހުމަދު އަބްދުﷲ ދީދީ އައްޔަން ކުރެއްވުމަށް ފާސް ކުރައްވައި ފައެވެ. މީގެ އިތުރަށް ހައި ކޯޓުގެ މިހާރުގެ އިސް ފަނޑިޔާރު އަބްދުﷲ ދީދީ އާއި އެކޯޓުގެ ފަނޑިޔާރު އަބްދުލްޣަނީ މުހައްމަދު، ސުޕްރީމް ކޯޓުގެ ފަނޑިޔާރުކަމަށް އައްޔަން ކުރަން ވެސް މަޖިލީހުން ވަނީ ފާސް ކުރައްވައިފިއެވެ.

މި ދެ ވޯޓުގައި ވެސް ބައިވެރިވެ ވަޑައިގެންފައިވަނީ ޕީޕީއެމް-އެމްޑީއޭ ކޯލިޝަންގެ މެންބަރުންނެވެ. މިދައުރުގެ ޖަލްސާތައް ފެށުނު ފަހުން އިދިކޮޅު މެންބަރުން މަޖިލީހަށް ވަޑައެއް ނުގަންނަވައެވެ. އެބޭފުޅުން މަޖިލިހަށް ވަޑައިނުގަންނަވަނީ މަޖިލީހުގެ ރައީސް އަބްދުﷲ މަސީހުގެ ސިޔާސަތުތަކާ ހިތްހަމަނުޖެހިގެންނެވެ.

އެންމެ ފަހުން ރާއްޖޭގައި ހުންނެވި އުއްތަމަ ފަނޑިޔާރު އަބްދުﷲ ސައީދުގެ މަގާމް ގެއްލުނީ ޖިނާއީ ކުށެއް ސާބިތުވުމުންނެވެ. އިސްތިއުނާފުގެ މަރުހަކާތައް ނިމުނުއިރުވެސް އަބްދުﷲ ސައީދު ހުކުމުން ސަލާމަތްވާ ގޮތެއް ނުވިއެވެ. ސުޕްރީމް ކޯޓުގެ ފަނޑިޔާރުގެ މަގާމުގައި ހުންނެވި އަލީ ހަމީދުގެ މައްޗަށް ވެސް ޖިނާއީ ކުށެއް ސާބިތުވެ، މަގާމްވަނީ ގެއްލިފައެވެ.