އިދިކޮޅުގައި ތިއްބެވި ސިޔާސީ ލީޑަރުންނަކީ އަމިއްލަ އެޖެންޑާއެއް ހިއްޕަވައިގެން ތިއްބެވި ބޭފުޅުން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ކ. ގުރައިދޫގެ ފެނުގެ ނިޒާމާއި އެރަށުގެ ބަނދަރު ހުޅުވައި ދެއްވުމުގެ ރަސްމިއްޔާތުގައި މިއަދު ހަވީރު ވާހަކަފުޅު ދައްކަވަމުން ރައީސް ވިދާޅުވީ އިދިކޮޅު ސިޔާސީ ބޭފުޅުން ގެންގުޅުއްވަނީ އަމިއްލަ އެޖެންޑާއެއްކަން އެގިވަޑައިގަންނަވަނީ އެބޭފުޅުންގެ މާޒީއާއި ފަހަކަށް އައިސް ދައްކަވަމުން ގެންދަވާ ކަންތައްތަކުން ކަމަށެވެ.
"ރައްޔިތުންގެ މަސްލަހަތާއި ރައްޔިތުންނަށް ލޯބިކޮށްގެން އެބޭފުޅުން ދައްކުވައިދެއްވައިފައިހުރި މިންވަރު ގަބޫލުކުރެވެނީ އެބޭފުޅުންނަކީ އަމިއްލަ އެޖެންޑާތަކެއް ހިއްޕަވައިގެން އުޅުއްވާ ބޭފުޅުންކަން،" ރައީސް ވިދާޅުވިއެވެ.
އެބޭފުޅުން ގައުމަށް ނުވަތަ ރަށްރަށަށް ކޮށްދެއްވަން އުޅުއްވާކަމެއް އެބޭފުޅުންގެ މެނިފެސްޓޯއަކުން ނުފެންނަ ކަމަށާއި އޭގެ ބަދަލުގައި ހައްތާވެސް ފެންނަމުންދަނީ މުޅިން "އެހެންކަހަލަ ކަންތައްތަކެއް" ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ ކުރިން ހީފުޅު ކުރެއްވީ ރިޔާސީ އިންތިޚާބުގައި އެއްކޮޅުގައި ހުންނެވީ އެމަނިކުފާނު ގިނިކަންޏާ ކަމަށެވެ. "އެހެންނަވެސް ﷲގެ މަގުގައި އަޅުގަނޑަށް މަސައްކަތް ކުރެވޭކަން އަޅުގަނޑަށް ގަބޫލުކުރެވޭ، ރައްޔިތުންގެ ތާއީދު އަޅުގަނޑަށް އޮތްކަން ގަބޫލުކުރެވޭ. އެހެންވީމާ އެކަނިވެސް މި ހަނގުރާމަ ކުރަން ތައްޔާރަށް ތިބީ. އޭރު އަޅުގަނޑު ދުށީ އަޅުގަނޑު ހުރިކޮޅު ނޫން އަނެއްކޮޅުގައި އެތައް ބައިވަރު ސިޔާސީ ލީޑަރުން ތިއްބެވިކަން. އެކަމަކު މިއަދު އެނގިގެން މިދިޔައީ ނޫނެކޭ އެބޭފުޅުންވެސް އެތިއްބެވީ ހަމަ އެކަނި. އެހެންވީމާ އެކަނިމާ އެކަނިކުރާ މުގާބަލާއެއް (ހަނގުރާމައެއް) މިއީ،" ރައީސް ވިދާޅުވިއެވެ.
އިދިކޮޅު ސިޔާސީ ލީޑަރުންގެ މެދުގައި ކިތަންމެ ވާހަކައެއް ދެއްކެވިޔަސް ކޭކުފަޅާ ހިސާބަށް (ވެރިކަމާ ހިސާބަށް) ދިޔުމުން ކޮންމެ ބޭފުޅަކުވެސް ބޭނުންވީ ކޭކު ނުފަޅައި މުޅި ކޭކު ކަމަށް އެމަނިކުފާނު ވިދާޅުވިއެވެ. އެހެން ކަމުން ޕީޕީއެމުން ނިންމެވީ ކޭކު ނުފަޅައި މިހާރުގެ ޒައާމަތަށް "ކޭކު" އެއްކޮށް ދެއްވަން ކަމަށް ރައީސް ވިދާޅުވިއެވެ.
ޕީޕީއެމުން އެގޮތަށް ނިންމެވީ މިހާރު ދެކެމުންދާ ސުލްހަވެރިކަމާއި އާމާން އޮމާންކަން ދަމަހައްޓައި ޑިމޮކްރަސީއަކީ ކޯއްޗެއްކަން ދައްކުވައި ދެއްވުމަށް ކަމަށް ރައީސް ވިދާޅުވިއެވެ.
"މިއަދު ޑިމޮކްރަސީ ކަމުނުގޮސްގެން މިއުޅެނީ އެބޭފުޅުންގެ ޒާތީ ކަންކަމުގައާއި، އެބޭފުޅުން އެދިވަޑައިގަންނަވާ ސިޔާސީ ކަންކަމުގައި އެބޭފުޅުން ބޭނުންވާ ހުކުމްތައް އެކި ކޯޓުތަކުން ނުނެރެވިގެން. ދައުލަތް ބަދުނާމު ކުރުމާއި ސަރުކާރުން ކަންކަމާބެހޭ ވާހަކަ އެދައްކަވަނީ. ނޫން. ސަރުކާރުން މިދެންނެވި ކަހަލަ އެއްވެސް ކަމެއްގައި ކޯޓަކަށް ނުފޫޒެއް ނުފޯރުވާނެ. އެކަމަކު ކޯޓަށް ނުފޫޒު ފޯރުވި މީހުން އެތިއްބެވީ ހާމަކަން ބޮޑުގޮތަކަށް ފަޟީހަތްވެފައި،" ރައީސް ވިދާޅުވިއެވެ.
ރައީސް ވިދާޅުވީ ޑިމޮކްރަސީއަކީ ނިޒާމްތަކެއް ކަމަށެވެ. އެ ނިޒާމްތަކާ އެއްގޮތަށް އުޅެން ދަސްކުރާ ކުރުމަކީވެސް ޑިމޮކްރަސީ ކަމަށް ވިދާޅުވިއެވެ. އެކަމަކު ވަކިބައެއްގެ ވަކިކަހަލަ ހައްގުތަކާ ހަމައަށް ދިޔައިމައި އެއްކަލަ ނިޒާމުން ބޭރުން ކަންކަން ކުރަންވީ ކަމަށާއި އެނިޒާމުން ބޭރުން ކަންތައްތައް ނުކުރެވޭ ކަމަށް ވާނަމަ ނިޒާމް ހިފަހައްޓަން މަސައްކަތްކުރާ މީހާ (އެބޭފުޚުންގެ ނަޒަރުގައި) ޚުދުމުޚުތާރު ވެރިއަކަށް ވާކަމަށް ވެސް ރައީސް ވިދާޅުވިއެވެ.
