އުފާވެރިކަމުގެ ކޮޅެއްނެތެވެ. ހަނދާނާއި ތާރީޚާ ގުޅިލާމެހިފައިވާ ދުވަހެކެވެ. މިއަދަކީ އައްޑޫސިޓީ ހިތަދޫ، ކެމީ، އުސްތާޒު ހަސަން ލަބީބު ދިވެހި ބަސް ކިޔަވައި ދެއްވަން ފެއްޓެވިތާ 50 އަހަރު ފުރި ރަންޔޫބީލް ފާހަގަކުރާ ދުވަހެވެ.
ލަބީބަށް އައްސަރިބަހާއި ސާބަސް ހުއްޓެވެ. ތިޔަ ކޮށްދެއްވަމުން ގެންދަވާ ޚިދުމަތަށް ޝުކުރު ހުއްޓެވެ. ތަހުނިޔާއާއި ހެޔޮއެދުންތައް ހުއްޓެވެ. މިއަދުގެ އުފާވެރިކަން ވައިރޯޅިއާއެކު އޭނާގެ އެކިދުވަސްވަރުގެ ލޮބުވެތި ދަރިވަރުންނާ ހަމައަށް ފޯރުކޮށްދޭ ކަހަލައެވެ. މިއުފާވެރި ޚަބަރު އެ ދަރިވަރިވަރުންނަށް ލިބޭހިނދު ލިބިގެންދާނޭ އުފާވެރިކަމެއްގެ ބޮޑު ކަމާއެވެ.
ދިވެހިބަސް ކިޔަވައިދެއްވަން އެންމެ ފުރަތަމަ އޭނާ ކުލާހަކަށް ވެންނެވީ 1968 ވަނަ އަހަރު ޖޫންމަހު 13 ވަނަ ދުވަހުއެވެ. އެއީ އަލްމަރުޙޫމް ސިއްކަގޭ ދޮންމަނިކުފާނު (އަބްދުލްމަޖީދު ސަލީމް) ހިންގެވި ރަހުބަތު-ދިރާސާ ގެ ތިންވަނަ ކުލާހަށެވެ. އެދުވަހު ފެއްޓެވި މަސައްކަތަށް އަދިވެސް ނިމުމެއްނެތެވެ. އަދިވެސް އޮތީ ކުރިއަށެވެ.
ހަމަގައިމުވެސް މިއަދު ލަބީބަށް ލިބިވަޑައިގަންނަވާނެ އެންމެ ބޮޑު އެއް އުފަލަކީ އޭނާ ކިޔަވައި ދެއްވި ދަރިވަރުންގެ ތެރޭގައި ގާބިލް އެތައް ދަރިވަރުންނެއް ތިބުމެވެ. އެކުދިންނަށް ކިޔަވައި ދެއްވި އުފާވެރި މާޒީއާއި އެ ހަނދާންތައް މިއަދު އޭނާ އައުކުރައްވާނެވެ. އޭނާގެ އަދުގެ ދަރިވަރުންގެ ކުރިމަތީގައި ހިނިމޫނަކާ އެކުގައެވެ.
މިހާރު ވެސް އޭނާ ގެންދަވަނީ ގްރޭޑް 3 އިން 12 އާ ދެމެދުގެ ދަރިވަރުންނަށް ދިވެހި ބަސް އުގަންނަވައި ދެއްވަމުންނެވެ. އެޑިޔުކޭޝަން މިނިސްޓްރީގައި ރަޖިސްޓްރީކުރައްވައިގެން ގޭގައި ހިންގަވާ "އަދަބީ ހިޔާ" ގައެވެ. އެ ހިޔަލުން ދަރިވަރުން ހޯދަމުންދާ ފިނިކަމުގެ ތެރެއިން ނުކުންނާނެ "ނިރު" ތަކުގެ ގިނަކަމާއެވެ.
ލަބީބުގެ އުމުރުން މިހާރު ގާތްގަނޑަކަށް 69 އަހަރުވީއެވެ. އޭނާއަކީ އަޖައިބެއް ފަދަ މޮޅު ޅެންވެރިއެކެވެ. ކުޅަދާނަ ލިޔުންތެރިއެކެވެ. ބަސް މޮށުންތެރިއެކެވެ. އިހުތިރާމާއި ގަދަރު ލިބިގެން ހުންނެވި އުސްތާޒެކެވެ. ގާތް އެކުވެރިއެކެވެ. ހިތްހެޔޮ އޯގާތެރި ބައްޕައެކެވެ.
އޭނާގެ ޅެންވެރިކަމުގެ ވާހަކަ ބާއްވަމާ ހިނގާށެވެ. ކޮންމެ މައުޟޫއަކަށް ވެސް އޭނާގެ ޚިޔާލު ވިރުވައި އަޅުއްވައިލައްވަނީ ފެންތައްޓެއް ބަންޑުން ކޮށްލާހާ ފަސޭހަކަމާއެކުގައެވެ. އޭނާވަނީ މިހާތަނަށް 190 އަށްވުރެ ގިނަ މީހުންނަށް ޅެން ހަދަން ދަސްކޮށްދެއްވައިފައެވެ. އަގުނުކުރެވޭ ވަރުގެ ޚިދުމަތެކެވެ.
ދިވެހި ބަހަށްދޭ ސަމާލުކަން ކުޑަވެ ބަހަށް އިހާނެތިކޮށް ހިތަމުންދާ ޒަމާނެއްގައި ދިވެހި ބަސް ދިރުވައި އާލާކުރެއްވުމަށް އެކުރައްވާ މަސައްކަތަކީ ހިތާއި ސިކުނޑިން ބަލައިގަންނަންޖެހޭ ޚިދުމަތެކެވެ. ފަރުދީ ފެންވަރުގައެވެ. ރަށު ފެންވަރުގައެވެ. ސިޓީގެ ފެންވަރުގައެވެ. ގައުމީ ފެންވަރުގައެވެ.
މި ފަސްގަނޑުގައި ﷲ އޭނާ ލަހައްޓަވައި ހެލިފެލިވެ އުޅޭވޭނެވަރު މިންވަރު ކުރައްވައިފައިވާހާ ހިނދަކު އޭނާގެ ޚިދުމަތަށް އިރުއޮއްސުމެއްނެތެވެ. ލަބީބަށް އުފާވެރިކަމާއި ފާގަތިކަން މިންވަރު ކުރައްވާށި.
