" ބްރިކްސް " އަކީ ، ޖީ -7 ، ޖީ -20 އަދި ޖީ 77 ފަދަ ، ދުނިޔޭގެ ގިނަ ޤައުމުތަކެއް ގުޅިގެން އުދެއްދުމަށް މަސައްކަތްކުރާ ބައިނަލްއަޤްވާމީ ޖަމާޢަތެކެވެ. " ބްރިކްސް " މިނަން ނިސްބަތްވަނީ ، އެޖަމާޢަތް އުފެއްދުމަށް އިސްވެ މަސައްކަތްކުރާ ޤައުމުތަކަށެވެ. އެއީ ބްރެޒީލް ، ރަޝިއާ ، އިންޑިއާ ، ޗައިނާ އަދި ސައުތު އެފްރިކާ ، މި ފަސް ޤައުމެވެ. " ބްރިކްސް " އަކީ މި ފަސްޤައުމަށް ނިސްބަތްވެގެން ހެދިފައިވާ ނަމެއްނަމަވެސް ، ދުނިޔޭގެ އިތުރު ފަސް ޤައުމަކުން ، މިދިޔަމަހު ، " ބްރިކްސް " ގައިވަނީ ބައިވެރިވެފައެވެ. އެއީ ، ސުޢޫދީ ޢަރަބިއްޔާ އާއި ، އިތިއޯޕިއާ ، ޔޫއޭއީ އަދި އާޖެންޓިނާއެވެ. މީގެ އިތުރަށް ، ދުނިޔޭގެ އިތުރު ސާޅީސްއަށް ޤައުމަކުން ، " ބްރިކްސް " ގައި ބައިވެރިވުމުގެ ޝަޢުޤުވެރިކަންވަނީ ފާޅުކޮށްފައެވެ. އަދި އިތުރު އެތައް ޤައުމެއް ، މިޖަމާޢަތާ ގުޅޭނެކަމަށް އަންނަނީ ބެލެވެމުންނެވެ.
" ބްރިކްސް " އަކީ ، ދުނިޔޭގެ ކުރިއަރަމުން އަންނަ މުހިންމު ޤައުމުތައް އެއްވިސްނުމެއްގައި މަސައްކަތްކުރުމަށް އުފައްދާ ޖަމާޢަތެކެވެ. މިޖަމާޢަތުގެ މަޤްޞަދަކީ ، އުތުރު އެމެރިކާގެ މުއްސަނދި ޤައުމުތަކާއި ހުޅަނގު ޔޫރަޕްގެ ޤައުމުތަކާ ވާދަކޮށް ، އެ ޤައުމުތަކުން ދުނިޔޭގެ މައްޗަށް ހިންގަމުންގެންދާ ، އިޤްތިޞާދީ އަދި ސިޔާސީ ބާރު ކަނޑުވައިލުމެވެ. " ބްރިކްސް " ގައި ޗައިނާއާއި އިންޑިއާ އަދި ރަޝިއާ ފަދަ ދުނިޔޭގެ ބޮޑެތި އިޤްތިޞާދީ ބާރުތައް މިހާރުވަނީ ބައިވެރިވެފައެވެ. އަދި ، ދުނިޔޭގެ އެކިބައްރުތަކުގައި ، ސަރަޙައްދީ ނުފޫޒު ކޮންޓްރޯލް ކުރާ ބްރެޒީލާއި ދެކުނު އެފްރިކާ އަދި އީރާންފަދަ ޤައުމުތައް ހިމެނެއެވެ.
ދުނިޔޭގެ އާބާދީގެ 45 އިންސައްތަ ނުވަތަ 3.5 ބިލިއަންގެ އާބާދީއެއް މިހާރުވެސް ، " ބްރިކްސް " ގައި ހިމެނެއެވެ. ދުނިޔޭގެ އިޤްތިޞާދުގެ 28 އިންސައްތަ ނުވަތަ 28.5 ޓްރިލިއަންގެ މުއްސަނދިކަމެއް މިހާރުވެސް ލިބިގެން ވެއެވެ. އީރާނާއި ސުޢޫދީ ޢަރަބިއްޔާ އަދި ޔޫއޭއީން އެކަނިވެސް ، ދުނިޔޭގެ ތެލުގެ 44 އިންސައްތަ މިހާރުވެސް " ބްރިކްސް " އިން ކޮންޓްރޯލް ކުރެއެވެ.
" ބްރިކްސް " އިން ދެކޭގޮތުގައި އައި އެމް އެފާއި ވޯލްޑް ބޭންކުން ، ދުނިޔޭގެ އިޤްތިޞާދު ކޮންޓްރޯލް ކުރުމުގައި ، ދުނިޔޭގެ އެއްޤައުމުން އަނެއްޤައުމަށް ފައިސާގެ މުޢާމަލާތު ހިންގުމުގައި ، ބޭނުންގޮތެއް ހަމަދުން ގެންދާއިރު ، ދުނިޔޭގެ ކުރިއަރަމުން އަންނަ އިޤްތިޞާދުތަކުގެ ބަހާއި ބައިވެރިވުން ، އެމުޢާމަލާތުތަކުގައި ޝާމިލްވާން ޖެހެއެވެ.
" ބްރިކްސް " ގައި ބައިވެރިވެ ، ދުނިޔޭގެ ޤައުމުތަކުގެ މައްޗަށް ބާރާއި ނުފޫޒު ފެތުރުމަށް ޗައިނާއިން ބޭނުން ވެއެވެ. ޚާއްޞަކޮށް އެފްރިކާ ބައްރަށް ނުފޫޒު ފޯރުވަން ބޭނުން ވެއެވެ. ދުނިޔޭގެ ދެކުނުބިތަށް ބަސްކިޔައި ނުފޫޒު ފޯރުވުމަކީ ، ޗައިނާއިން " ބްރިކްސް " ގައި ބައިވެރިވުމުގެ އެއް މަޤްޞަދެވެ. " ބްރިކްސް " ގެ އެހެން ޤައުމުތަކުން ، އެބައިމީހުންގެ އަމިއްލަ އެހެން އެޖެންޑާތައްވަނީ ކަށަވަރުކޮށްފައެވެ. ތަފާތު މަޤްޞަދުތައްވަނީ ކަނޑައަޅާފައެވެ.
" ބްރިކްސް " ގައި ރަޝިއާއިން ބައިވެރިވުމުގެ އެންމެ މުހިންމު މަޤްޞަދަކީ ، ހުޅަނގުގެ ނުފޫޒުން ސަލާމަތްވުމަށް ، އެޤައުމުން ކުރަމުންގެންދާ ހަނގުރާމަ ފަތަޙަ ކުރުމެވެ. ރަޝިއާއިން ޔުކްރޭނަށް އެރުމާގުޅިގެން ، ހުޅަނގުގެ ޤައުމުތަކުން އަޅާފައިވާ ދަތިކުރުމުގެ ފިޔަވަޅުތަކުން ސަލާމަތް ވުމެވެ. އީރާނުގެ މަޤްޞަދަކީވެސް ، އެޤައުމުގެ މައްޗަށް އޮންނަ ، ހުޅަނގުގެ ނުފޫޒާއި ބާރުން ސަލާމަތް ވުމެވެ.
" ބްރިކްސް " އިން ބޭނުންވަނީ ، ދުނިޔޭގެ މައްޗަށް ، ވަކިވަކި ޤައުމުތަކުން މ ޚާއްޞަކޮށް ހުޅަނގުގެ ޤައުމުތަކުން ޤާއިމްކޮށްފައިވާ ނުފޫޒާއި ބާރު ހަމަހަމަ ކުރުމެވެ. ވަކިބައެއްގެ އަތުގައި އެބާރުތައް އޮތުމުން ، ދުނިޔޭގެ ޤައުމުތަކަށް ކުރިމަތިވާ އުނދަގޫތަކުން އެ ޤައުމުތައް ސަލާމަތް ކުރުމެވެ. " ބްރިކްސް " އަކީ ޚާއްޞަކޮށް ، އެމެރިކާއަށް އޮތް ބިރެކެވެ. ދުނިޔޭގެ އެންމެ ބާރުގަދަ ޤައުމުގެ ގޮތުގައި އެމެރިކާ އޮތުމަށް ، " ބްރިކްސް " އިން ހުރަސްއަޅާނެއެވެ.
ދުނިޔޭގެ އެއްޤައުމުން އަނެއްޤައުމަށް ފައިސާ ފޮނުވުމުގައި ޢާންމުކޮށް ބޭނުންކުރަނީ ، އެމެރިކާ ޑޮލަރެވެ. " ބްރިކްސް " ގެ އަމިއްލަ ފައިސާއެއް އުފައްދައި ، އެމެރިކާ ޑޮލަރު ދުނިޔޭގެ މައްޗަށް ހޯދާފައިވާ ނުފޫޒާއި ބާރު ކަނޑުވައިލުމަށް ، ބްރެޒީލާއި ރަޝިއާއިން ބޭނުންވެއެވެ. އެހެންނަމަވެސް ، " ބްރިކްސް " ގެ ޤައުމުތަކުގެ އިޤްތިޞާދު ބިނާވެފައި އޮތްގޮތުން ، އިޤްތިޞާދީ ތަފާތުތަކާހުރެ ، އެއީ އެކަށީގެންވާކަމެއް ނޫންކަމަށް ބައެއް ޤައުމުތަކުން ޚިޔާލު ފާޅުކޮށްފައިވިޔަސް ، އެއީ ނުވާނެކަމެއްނޫނެވެ.
" ބްރިކްސް " އުފެއްދުން ނާކާމިޔާބު ކޮށްލުމަށްޓަކައި ، އެމެރިކާއިން އަންނަނީ މަސައްކަތް ކުރަމުންނެވެ. އެހެންނަމަވެސް ، ދުނިޔޭގެ އިޤްތިޞާދުގައި ނަގާކިޔާ ޤައުމުތަކުން ، އެމެރިކާއަށްވުރެ ގިނަ ، ތެދުވެރި ރަޙުމަތްތެރިން ރަޝިއާއަށް ލިބިފައިވާކަމަށް ރަޝިއާއިން ދެކެއެވެ. އަދި ، އެމެރިކާގެ ބާރާއި ނުފޫޒުން ސަލާމަތްވުމަށް ބޭނުންވާ އެތައް ޤައުމެއް އެބަ އުޅެއެވެ.
ޗައިނާއާއި ރަޝިއާއިން ގެންދަނީ " ބްރިކްސް " އަށް ޤައުމުތައް ވެއްދުމަށް މަސައްކަތް ކުރަމުންނެވެ. އެ ދެޤައުމުގެވެސް އެންމެ ބޮޑު އަމާޒަކީ ، ދުނިޔޭގެ މުއްސަނދި އިޤްތިޞާދުތަކުގެ މައްޗަށް އޮންނަ އެމެރިކާގެ ނުފޫޒާއި ބާރު ކަނޑުވައިލުމެވެ. އެފަދަ ބައެއްޤައުމުތަކުން ، އެމެރިކާގެ ނުފޫޒާއި ބާރާ ދުރަށްދިއުމަށް ބޭނުންވެފައި އޮންނަ އޮތުމަކީވެސް ، " ބްރިކްސް " ގެ މުސްތަޤްބަލަށް އޮތް ހެޔޮ ފާލެކެވެ.
ޗައިނާއަކީ ، ހުރިހާގޮތަކުން ބެލިނަމަވެސް ، " ބްރިކްސް " ގެ އެންމެ ނުފޫޒުގަދަ ޤައުމެވެ. ޗައިނާއަކީ މި ގްރޫޕްގައި އެންމެ އުފެއްދުންތެރި އަދި އެންމެ ގިނައިން މުދާ އުފައްދައި އެހެން ޤައުމުތަކަށް އެކްސްޕޯޓް ކުރާ ޤައުމެވެ. މި ގްރޫޕްގެ ޤައުމުތަކުން އެއްފައިސާއެއް ބޭނުންކުރަން ފުރުޞަތު ލިބިއްޖެނަމަ ، އެހެން ހުރިހާ ޤައުމަކަށްވުރެ ބޮޑަށް ޗައިނާއަށް ފައިދާ ބޮޑުވާނެއެވެ. މިހުރިހާ ޤައުމަކުން ޑޮލަރުގެ ބަދަލުގައި އެހެން ފައިސާއެއް ބޭނުންކުރުމަށް އޮތް ފުރުޞަތުތަކާމެދު މިހާރުދަނީ މަޝްވަރާ ކުރަމުންނެވެ. މިހާތަނަށް ނިންމާފައި އޮތްގޮތުގައި ، މުދާ އިމްޕޯޓްކޮށް އެކްސްޕޯޓް ކުރުމުގައި ، އެމެރިކާ ޑޮލަރުގެ ބަދަލުގައި " ބްރިކްސް " ގެ ޤައުމުތަކުން ބޭނުންކުރާނީ ، އެޤައުމެއްގެ އަމިއްލަ ފައިސާއެވެ. އެކަން އެހެންވިޔަސް ، އޭގެ އެންމެ ބޮޑު ފައިދާއެއް އޮތީ ޗައިނާއަށެވެ. " ބްރިކްސް " އިން ނިންމާފައި އޮތްގޮތަށް އިމްޕޯޓް އެކްސްޕޯޓްގައި އެޤައުމެއްގެ އަމިއްލަ ފައިސާ ބޭނުންކުރާނަމަ ، ފައިދާ ބޮޑުވާނީ ގިނައިން މުދާ އެކްސްޕޯޓްކުރާ ޤައުމަކަށެވެ. ނުވަތަ އިމްޕޯޓް އެކްސްޕޯޓް އެއްހަމައެއްގައި އޮންނަ ޤައުމު ތަކަށެވެ. އަދި ޓޫރިޒަމްފަދަ ފުޅާދާއިރާއެއްގެ ޚިދުމަތް ފޯރުކޮށްދެވޭ ޤައުމުތަކަށްވެސް އޭގެފައިދާ ބޮޑުވާނެއެވެ. ދިވެހިރާއްޖެޔަކީވެސް ، އެފަދަ ފުރުޞަތަކުން ވަރަށްބޮޑު ފައިދާއެއް " ބްރިކްސް " އިން ހޯދިދާނެ ޤައުމެކެވެ. އެހެންނަމަވެސް ، މިކަންކަމުގެ ފުރިހަމަ މަޢުލޫމާތު ލިބިގެންދާނީ ، މިކަމާބެހޭގޮތުން ޤައުމުތަކުގެ މެދުގައި މިހާރު ކުރެވޭ މަޝްވަރާތަކާއި މަސައްކަތްތައް ވިލަރެސްކޮށް ނިމުމުންނެވެ.
ކޮންމެ އާފެށުމެއްގައި ދިމާވާކަންކަމުގައި ޚިލާފުތައް ހުންނާނެއެވެ. " ބްރިކްސް " ގެ ޤައުމުތަކުގެ މެދުގައިވެސް ވަރަށްގިނަ މައްސަލަތައް އެބަހުށްޓެވެ. ޚާއްޞަކޮށް ޗައިނާއާއި އިންޑިއާއާ ދެމެދުގައެވެ. މި ދެޤައުމުން ކޮންމެ ޤައުމެއްގައިވެސް ދޮޅުބިލިއަނެއްހާ އާބާދީއެއް އެބައޮތެވެ. އިންޑިއާއާއި ޗައިނާއަކީ އޭޝިއާގައި ވާދަވެރި ދެ ޤައުމެވެ. ޙިމާލިޔާއާ ގުޅިފައިވާ ސަރަޙައްދީ މައްސަލައިގައި ދެ ޤައުމުން އެއްގަލަކަށް ނޭރެއެވެ. އިންޑިއާ ކަނޑުގެ ބާރަށް ދެޤައުމުންވެސް އަތްގަދަކުރުމަށް މަސައްކަތް ކުރެއެވެ. ދުނިޔޭގެ ދެކުނުބިތުގެ ބާރަކަށްވުމަށް ދެޤައުމުންވެސް މަސައްކަތް ކުރަމުން ގެންދެއެވެ. އިންޑިއާއަކީ ، އިންޑޯ ޕެސިފިކްގައި ޗައިނާގެ ބާރު ކަނޑުވައިލުމަށް އިއްތިޙާދުވެފައިވާ ، އެމެރިކާއާއި ޖަޕާން އަދި އޮސްޓްރޭލިއާ ހިމެނޭ ޖަމާޢަތުގެ މެންބަރެކެވެ. ޗައިނާއާއި ރަޝިއާއަކީ އދ ގެ ސަލާމަތީ މަޖިލީހުގެ ދާއިމީ މެންބަރުގެ ޢަދަދު އިތުރުކުރުމަށް ދެކޮޅުހަދަމުން ގެންދާ ދެ ޤައުމެވެ. އިންޑިއާއާއި ބްރެޒީލް އަދި ދެކުނު އެފްރިކާއިން އަންނަނީ ، ސަލާމަތީ މަޖިލީހުގެ ދާއިމީ މެންބަރުކަން ހޯދުމަށް މަސައްކަތް ކުރަމުންނެވެ.
" ބްރިކްސް " ގެ ލީޑަރުން އަންނަނީ ، މިފަދަ ޚިޔާލުތަފާތުވުންތައް ނައްތާލައި ، " ބްރިކްސް " އުފެއްދުމުގެ އަޞްލު މަޤްޞަދު ޙާޞިލްކުރެވޭނެގޮތްތަކަށް އިސްކަންދިނުމަށް މަސައްކަތް ކުރަމުންނެވެ. އެއީ ހުޅަގާއި އެމެރިކާގެ ބާރު ދުނިޔެއިން ކަނޑުވައިލުމެވެ. " ބްރިކްސް " ގެ ތަޞައްވުރަކީ ، ދޭދޭ ޤައުމުތަކުގެ މެދުގައި އޮތް ޚިލާފުތަކާއެކުވެސް ، ދުނިޔެއަކީ މިހާރަށްވުރެ ހަމަހަމަ އަދި އިންސާފުވެރި ތަނަކަށް ހެދުމެވެ. ވަކި ޤައުމަކުން ބޭނުންހައިގޮތަކަށް ދުނިޔެ އެނބުރުމަށް ފުރުޞަތު ނުދީ ، އިޤްތިޞާދީ ތަރައްޤީގައި މިނިވަން އަދި އިންސާފުވެރި މާޙައުލެއް ދުނިޔޭގައި ޤާއިމް ކުރުމެވެ. " ބްރިކްސް " ގެ އެންމެ ބާރުގަދަ ޤައުމުކަމުގައިވާ ، ޗައިނާއިންވެސް އަންނަނީ ، ޗައިނާގެ އަމިއްލަ ވިސްނުން ދޫކޮށް ، " ބްރިކްސް " ގެ ތަޞައްވުރާއި މަޤްޞަދު ޙާޞިލްކުރެވޭނެ ގޮތްތަކަށް ދޫދީގެން މަސައްކަތް ކުރަމުންނެވެ.
" ބްރިކްސް " އުފެއްދުމުގައި އިސްނެގި ޤައުމުތަކުގެ ތެރޭގައި ދުނިޔޭގެ ބާރުގަދަ ޤައުމުތަކުގެ ލިސްޓްގައި ނަންހިމެނޭ ޤައުމުތަކެއް އެބަހުށްޓެވެ. ޗައިނާއަކީ ، ދުނިޔޭގެ އެންމެ ބޮޑު އިޤްތިޞާދެވެ. އިންޑިއާއާ އެއްފަދަ ، ދުނިޔޭޣެ ދެވަނަޔަށް އެންމެ ބޮޑު އާބާދީއެވެ. ރަޝިއާއަކީ ، ދުނިޔޭގެ ނިއުކުލިއަރ އެންމެ ބޮޑު ބާރެވެ. އިންޑިއާއަކީ ، ދުނިޔޭގެ އެންމެބޮޑު އާބާދީއެވެ. ބްރެޒީލަކީ ލެޓިން އެމެރިކާގެ ސަރަޙާއްދީ ބާރެކެވެ. މިއިން ކޮންމެ ޤައުމަކީވެސް ، ދުނިޔޭގެ އިޤްތިޞާދުގައި ބަރުދަންހުރި މުހިންމު ޤައުމުތަކެވެ. " ބްރިކްސް " ގެ އުފެދުމުގައިވެސް ، ލެޓިން އެމެރިކާ ، މެދުއިރުމަތި ، އެފްރިކާ އަދި އޭޝިއާފަދަ ، ދުނިޔޭގެ މުހިންމު އެތައް ބައްރެއް ހިމެނެއެވެ. ހަމައެއާއެކު ، ސުޢޫދީ ޢަރަބިއްޔާ އާއި އީރާންފަދަ ދެކޮޅުވެރި ދެޤައުމުވެސް " ބްރިކްސް " ގައި އެބަހިމެނެއެވެ. އެ ދެޤައުމަކީވެސް ، އެ ދެޤައުމު އެއްބައިކުރުމަށް ، ޗައިނާއިން މީގެކުރިން ކޮށްފައިވާ މަސައްކަތަށް އެއްބަސްވެފައި ނެތް ދެޤައުމެކެވެ.
" ބްރިކްސް " ގައި ބައިވެރިވުމުގެ ޝަޢުޤުވެރިކަން ، ދުނިޔޭގެ 34 ޤައުމަކުން މިހާތަނަށް ފާޅުކޮށްފައި ވެއެވެ. 24 ވަރަކަށް ޤައުމުން މިހާރުވެސް ، " ބްރިކްސް " ގައި ބައިވެރިވުމަށް އެދިފައި ވެއެވެ. އަލްޖީރިއާ ، އާޒަރުބައިޖާން ، ބަޙްރެއިން ، ބަންގްލަދޭޝް ، ބެލޫރަސް ، ބޮލީވިއާ ، ކިއުބާ ، ކަޒަކިސްތާން ، މުޔަންމާރ ، ނައިޖީރިއާ ، ޕާކިސްތާން ، ސެނެގޯލް ، ތައިލޭންޑް ، ވެނެޒުއޭލާ އަދި ވިއެޓްނާމް ފަދަ ޤައުމުތައް އޭގެތެރޭގައި ހިމެނެއެވެ. އިންޑޮނީޝިއާއިންވެސް މިހާރު އަންނަނީ " ބްރިކްސް " ގައި ބައިވެރިވުމާމެދު އަލުން ވިސްނަމުންނެވެ. އިންޑޮނީޝިއާއިންވަނީ ، " ބްރިކްސް " ގައި މީގެކުރިންވެސް ބައިވެރިވެ ، އެޖަމާޢަތުން ވަކިވެފައެވެ. އިންޑޮނީޝިއާ " ބްރިކްސް " އަށް ވަދެއްޖެނަމަ ، ދުނިޔޭގެ އާބާދީގެ ބޮޑުބައެއް " ބްރިކްސް " ގެ ތެރެޔަށް ވަދެގެންދާނެއެވެ. ތުރުކީވިލާތުންވެސް މިހާރުވަނީ ، " ބްރިކްސް " ގައި ބައިވެރިވުމަށް އެދިފައެވެ. ތުރުކީއަކީ ނޭޓޯގެވެސް މެންބަރު ޤައުމެކެވެ. އެހެންކަމުން ، " ބްރިކްސް " ފުޅާވެ ، ހުޅަނގާއި އެމެރިކާއަށް ބިރަކަށްވުމަކީ މާދުރުގައި އޮތްކަމެއްނޫނެވެ.
" ބްރިކްސް " ސަމިޓް 2024 ގެ ނިންމުންތައް
" ބްރިކްސް " ގެ އެންމެ ފަހު ސަމިޓް ބޭއްވުނީ ރޫސީވިލާތުގެ ކަޒާންގައި މިދިޔަ އޮކްޓޯބަރ މަހުގެ 22 އިން 24 އަށެވެ. " ބްރިކްސް " އުފެދުމުގައި އިއްތިޙާދުވި މުހިންމު ޤައުމުތަކުގެ އިސްވެރިން ، މިސަމިޓްގައި ބައިވެރިވެވަޑައިގަތެވެ. އދ ގެ ސެކްރެޓަރީ ޖެނެރަލް ، އެންޓޯނިއޯ ގްޓްރަސްވެސް މިސަމިޓްގައި ބައިވެރިވެވަޑައިގަތެވެ. އަދި މުހިންމު ނިންމުންތަކެއްވެސް ، މިސަމިޓުގައި ނިންމުނެވެ.
އެންމެ މުހިންމު އެއްނިންމުމަކީ ، ޔުކްރޭނާއި ރަޝިއާގެ ހަނގުރާމަ ނިންމައި ޞުލްޙަވެރިވުމަށް ، ޗައިނާއާއި ބްރެޒީލުން ހުށަހެޅި ހުށަހެޅުމެވެ. މިމައްސަލަވަނީ ، ސަމިޓްގައި މަޝްވަރާ ކުރެވިފައެވެ. ރަޝިއާއިންވެސް މި މަޝްވަރާތަކުގައި ޢަމަލީގޮތުން ބައިވެރިވިއެވެ. 23 ވަނަ އިންޑިއާ – ރަޝިއާ އެނުއަލް ސަމިޓްގައި ބައިވެރިވެވަޑައިގަތުމަށް ، އިންޑިއާގެ ބޮޑުވަޒީރު ނަރެންދުރަ މޯދީ ، ޕުޓިންއަށް ދަޢުވަތު ދެއްވިއެވެ. މިސަމިޓް އޮންނަނީ އަންނައަހަރުއެވެ.
ތަރައްޤީއާއި ކުރިއެރުމުގެ ޙަރަކާތްތަކުގައި ، އެއްޤައުމުން އަނެއްޤައުމުގައި ، " ބްރިކްސް " ގައި ހިމެނޭ ޤައުމުތަކުގެ އަމިއްލަ ފައިސާ ދައުރުކޮށް ، އެމެރިކާ ޑޮލަރު ބޭނުންކުރުން މަދުކުރުމަށް ، ކަޒާން ސަމިޓްގައި ނިންމުނެވެ. އަދި ދުނިޔޭގެ މާލީ ނިޒާމް މިނިވަންކުރުމަށްވެސް ނިންމުނެވެ. ޗައިނާއާއި އިންޑިއާއާ ދެމެދުގައި އެކި މައްސަލަތަކުގައި އުފެދިފައިވާ ދެބަސްވުންތަކާއި ޚިލާފުތައް ނައްތާލައި ، އެއްވިސްނުމެއްގައި ކުރިޔަށްދިއުމަށް ދެޤައުމުންވެސް ނިންމިއެވެ. 2020 ވަނައަހަރުގެ ތެރޭގައި އުފެދުނު ސަރަޙައްދީ އިމުގެ މައްސަލަވެސް އޭގެ ތެރޭގައި ހިމެނެއެވެ. އެއްޤައުމު އަނެއްޤައުމަށް އިޙްތިރާމްކޮށް އިތުބާރު އުފެއްދުމަށް މަސައްކަތް ކުރުމަށްވެސް ނިންމުނެވެ. ދުނިޔޭގެ ދެކުނުބިތުގެ އަޑު އުފުލައި ، ޙައްޤު މަޤާމާއި ދަރަޖަ ހޯދުމަށް މަސައްކަތް ކުރުމަށްވެސް ނިންމުނެވެ. " ބްރިކްސް " ގެ ޤައުމުތަކުގެ މެދުގައި ކާބޯތަކެތީގެ ރައްކާތެރިކަން ކަށަވަރުކުރުމަށް ، ޚާއްޞަ މަސައްކަތްތަކެއް ކުރުމަށް ނިންމުނެވެ. ބައިނަލްއަޤްވާމީ ޤާނޫނުތައް ނަގަހައްޓައި ދެމެހެއްޓުމަށް ، ޚާއްޞަކޮށް އެމެރިކާގެ ނުފޫޒު އެކަންކަމުން ކަނޑުވައިލުމަށް މަސައްކަތްކުރުމަށް ނިންމުނެވެ. މެދުއިރުމަތީގެ މަޝްރަޙުގައި އެމެރިކާއާއި ހުޅަނގުން އެއްބައިވެ ، އިޒްރޭލް ދިފާޢުކޮށް ، ނަސްލެއް ނައްތައިލުމަށް އިޒްރޭލުން ކުރަމުންގެންދާ އުދުވާނީ ހަނގުރާމައިގައި އެމެރިކާގެ ބޭއިންސާފު ޢަމަލުތައް ކުށްވެރިކުރުމާއެކު ، ދުނިޔޭގެ ޞުލްޙަ ދެމެހެއްޓުމަށްޓަކައި ، އެމެރިކާގެމައްޗަށް ބާރުވެރިވުމަށްވެސް " ބްރިކްސް " ގެ އެންމެ ފަހު ސަމިޓްގައި ނިންމުނެވެ.
ކުރީގެ ދުނިޔެ ނިމުމަކަށް އަންނަނީއެވެ. އަދި ، "ބްރިކްސް " އާއެކީ މުޅިންއާ ދުވަހަކަށް ، އާފަތިހަކަށް ދުނިޔެ އަލިވިލެނީއެވެ.
