ވިހަ ތީރު (3)

(9 ޖުލައި 2024 ގައި ޝާއިޢުކުރި ބަޔާގުޅޭ )

( އެކަމަކުވެސް ، ދޭތެރެޔަކުން މެހެމަލް ، އެގެޔަށް އެބަ އާދެއެވެ. މެހެމަލް އެގެޔަށް އައުމަކީ ، އެއްގޮތަކަށްވެސް ކުލްސޫމް އެދޭކަމެއް ނޫނެވެ. މެހެމަލް އެގެޔަށް ނުވައްދައިފިއްޔާ ، ބޭރުންވެސް އެދެމީހުންނަށް ބައްދަލު ކުރެވިދާނެކަން ، ކުލްސޫމުގެ ވިސްނުމަކަށް ނާދެއެވެ. )

މެހެމަލް ކައިވެނިކުރީ އޭނާގެ ބޮޑުބޭބެގެ ދަރިއަކާއެވެ. ހައިދަރުދެކެ އެހާލޯބިވާނަމަ ، އެކައިވެންޏެއް މެހެމަލް އެއް ނުކުރާނެއެވެ. ހައިދަރުގެ މަންމަގެ ކަންބޮޑުވުމަކީ އެއީއެވެ. އެމީހުންގެ ގަނޑުވަރެއްފަދަ ބޮޑުގޭގައި އެއްވެސް ރޫޙެއް ނެތެވެ. އެގޭތެރެއިން އަޑެއްބަޑެއްވެސް ނީވެއެވެ. މަންމަގެ ބަލިޙާލަތަށް ހައިދަރުވެސް ކަންބޮޑު ވެއެވެ. ކައިވެންޏެއްކުރަން ބޭނުންވިޔަސް ، ގަޔާވާކަހަލަ ކުއްޖަކު އަދި ނުފެނެއެވެ. އެ ނަޒަރިއްޔާއިން ، ހައިދަރަށް އެއްވެސް ކުއްޖަކާދިމާލަށް ބަލައެއްވެސް ނުލެވެއެވެ. އޭނާގެ ސިކުނޑިޔަށް ސަވާރުވެފައި އޮންނަނީ ، މެހެމަލްގެ ހަނދާންތަކެވެ. މަންމަޔަށްޓަކައިވެސް ، އެކަން ކުރަން ހައިދަރަށް އެބަ މަޖުބޫރު ވެއެވެ. އޭނާ ގަޔާވާކަހަލަ ކުއްޖަކު ފެނިއްޖިއްޔާ ، މަންމަގާތު އެވާހަކަ ބުނެ ، ކައިވެންޏެއް ކުރަން ހައިދަރު ނިންމިއެވެ. އަދި މަންމަގެ ބޮލުގައި އަތްލުމަށްފަހު ، އޭނާ އެކަންކުރާނެކަމަށް ވަޢުދުވެސް ވިއެވެ.

ހުރިހާ ވާހަކައެއް އަޑުއަހަން ހުރެފައި ، ދޮރުން އެތެރެޔަށް މެހެމަލް ވަނެވެ. އަދި ހައިދަރުގެ އެނިންމުމަށް މަރުޙަބާ ކިޔެވެ. ހައިދަރަށް ލިބުނު ޙައިރާންކަން ފޮރުވުމަށް މަސައްކަތް ކުރަމުން ، މެހެމަލްއަށް ސަލާމް ގޮވައިލިއެވެ.

" މަލްއެވެ ! އުފާވެރި އުފަން ދުވަހެކެވެ. " ހައިދަރު ބުންޏެވެ.

ހައިދަރުގެ ހިތުގައި އަދިވެސް ، މެހެމަލްގެ އުފަންދުވަސް ހަނދާން އެބަހުރިކަން އަންގައިލިއެވެ. މެހެމަލްއަށް ލިބުނު އުފާވެރިކަން އޭނާގެ މޫނުމަތިން ، ހިނިތުންވުމެއްގެ ސިފައިގާ ފާޅުވިއެވެ. އަދި ، އެދުވަސް ، ހައިދަރުގެ ހަނދާނުގައި ހުރިކަމަށްޓަކައި ޝުކުރު އަދާކުރިއެވެ. އެކަމަކު ، ދެން އެދުވަސް ، ހައިދަރުގެ ހަނދާނަކު ނުހުންނާނެއެވެ. ހައިދަރު އެއުޅެނީ ކައިވެންޏެއްކުރަންކަމަށް ބުނެ ، މެހެމަލްއަށް ލިބުނު އުފާވެރިކަން ކިލަނބުކޮށްލަން ، ކުލްސޫމް މަސައްކަތް ކުރިއެވެ. އަދި ، ހައިދަރު ހުންނާނީ ވަރަށް ވަރުބަލިވެފައި ކަމަށްބުނެ ، ކޮޓަރިޔަށް ފޮނުވައިލާފައި ، މެހެމަލްއާ ވާހަކަ ދައްކާލަން ބޭނުންވިއެވެ.

ހައިދަރު ތެދުވެގެންދަމުން ، ކަތި ނަޒަރަކުން މެހެމަލްއާ ދިމާއަށް ބަލަމުން ދިޔައެވެ. ހައިދަރުގެ ލޮލުން ފާޅުވަމުންދިޔަ ލޯބީގެ ސިގްނަލްތައް މެހެމަލްއަށްވެސް ލިބުނެވެ. ކުޑަވަގުތުކޮޅަކަށް ، މެހެމަލްވެސް އެ ޖަޒުބާތުގެ ތެރެޔަށް ގެއްލިގެން ދިޔައެވެ. ހައިދަރުގޮސް ކޮޓަރިޔަށް ވަންނަންދެން ކަޅިޖަހައިނުލާ ބަލަހައްޓައިގެންހުރި މެހެމަލް ، ސިއްސުވައިލީ ކުލްސޫމެވެ. ކުލްސޫމުގެ ފިރިމީހާ ކިހިނެއްތޯ އަހައިލައިގެންނެވެ. ކުލްސޫމް އެކުރި ސުއާލަކީ ، ވަކި ބޭނުމެއް އޮވެގެން ކުރި ސުއާލެކެވެ. މެހެމަލްއާއި އޭނާގެ ފިރިމީހާގެ ގުޅުން ރަނގަޅުނަމަ ، ފިރިމީހާ ދޫކޮށްލާފައި ، މެހެމަލްގެ އުފަންދުވަހު ، އެގެޔަށް އަންނާކަށް ނުޖެހޭނެއެވެ. އެދެމަފިރިން ތިބޭނީ ، ކޮންމެވެސް ޕާޓީއެއްގައި އެކުގައެވެ.

މެހެމަލް އެގެޔަށް އެއައީ ، ހައިދަރުގެ މަންމަޔަކީ އޭނާގެވެސް މަންމަކަމަށް ބެލި  ދުވަސްކޮޅެއްގެ މަތިން ހަނދާންވެ ، ކުލްސޫމުގެ ހެޔޮދުޢާ ލިބިގަތުމަށެވެ. ކުލްސޫމުގެ މަސައްކަތުން ، މެހެމަލް އިތުރަށް ހައިދަރާ ބައްދަލުކުރިޔަކަ ނުދިނެވެ. މެހެމަލްއަށް އެންމެފަހުން ޖެހުނީ ، ކުލްސޫމުގެ ފައިމޮޑެދޭން އިރުކޮޅަކު އިނުމަށްފަހު ، ހުސްއަތާ ނުކުންނާށެވެ. މެހެމަލް އެއައީ ، ހައިދަރާއެކީ ދުއްވާލަން ދާށެވެ. އެކަމަކު ، ކުލްސޫމަށް ވެގެންވިއްޔާ މެހެމަލް ، އެފުރުޞަތު ހޯދިޔަކަ ނުދޭނެއެވެ.

ކުލްސޫމު އެނބުރި ގެޔަށް އައިއިރު ، އަންސަރު ގެޔަކު ނެތެވެ. ދަރިފުޅުގެ ކޮޓަރިޔަށް ދިޔައިރު އެކުއްޖާފުޅަށް އޮތީ ނިދިފައެވެ. ގެންގުޅޭ ކުއްޖާ ، މާރިއާ އަމިއްލަޔަށް ބޭސް ހޯދައިގެން ބޭސްދީ  އޭނާގެ ދަރިފުޅު އޮތީ ނިންދަވާފައެވެ.

ކުލްސޫމް އޭނާގެ ސޫރަޔަށް ލޯގަނޑު ކައިރީ ހުއްޓިލައިގެންހުރެ މާރިއާއަށް ގޮވައިލިއެވެ. އޭނާ ރީތިތޯ ސުއާލު ކުރިއެވެ. ގެންގުޅޭ ކުއްޖާވެސް ދިނީ ، މެހެމަލް އެންމެ ހިތްހަމަޖެހޭ ޖަވާބެވެ. މެހެމަލް އަކީ ، އިންތިހާއަށްރީތި އަންހެނެކެވެ. އޭނާއަށްވެސް ، މެހެމަލް ރީތިކަމުން ، ބަލަހައްޓައިގެން ހުރެވެއެވެ. އެކަމަކު ، މެހެމަލްއަށް ހީވާގޮތުގައި މިހާރު އޭނާއަކީ އެހާ ރީތިމީހެއްނޫނެވެ. އޭނާގެ ފިރިމީހާވެސް ، ދުވަހަކުވެސް އެވާހަކައެއް ނުބުނެއެވެ. މިހާރުވެސް އޭނާއަކާ އަޅައެއް ނުލައެވެ. މިރޭ ހައިދަރުގެޔަށް ދިޔައިމަ ، ހައިދަރުވެސް ، އެކަހަލަ އެއްވެސް އެއްޗެކޭ ނުބުނެއެވެ. ގެޔަށް އައިސް ވަނީމަ އެގޭތެރެއިންވެސް އޭނާއަށް އޮތީ އެކަނިވެރިކަމެވެ. އެއޮއް ޚާއްޞަ ރޭވެސް އޭނާގެ ގާތުގައި އެއްވެސްމީހަކު ނެތެވެ. އެންމެފަހުން ، ހައިދަރަށް މެސެޖެއް ފޮނުވައިލިއެވެ.

" އަބަދުވެސް ، އަހަރެންގެ އުފަންދުވަސް ހަނދާން ބަހައްޓާ ފަދައިން ، މިހާރުވެސް އެދުވަސް ހަނދާންކުރާތީ ، ވަރަށް އުފާ ވެއްޖެއެވެ. ވަރަށްބޮޑަށް ޝުކުރިއްޔާއެވެ ! " ހައިދަރަށް ފޮނުވި މެސެޖްގައި މެހެމަލް ލިޔެލިއެވެ.

މެހެމަލްގެ މެސެޖަށް ޖަވާބުދޭކަށް ހައިދަރު ބޭނުމެއް ނުވިއެވެ. ހައިދަރަކީ މެހެމަލްއަށް އެހާ މުހިންމު މީހެއްނޫނެވެ. އޭނާއާ ކައިވެނިވާން ތައްޔާރުވަމުންދިޔަ މެހެމަލް ، އެހެންމީހަކާ އެންގޭޖްވެފަ ، އެންގޭޖްމަންޓް އަނގޮޓި އޭނާއަށް ދައްކައިލި ރޭގެމަތިން ހައިދަރު ހަނދާންކޮށްލިއެވެ. ބޭރުން އައިސް ހައިދަރު ގެޔަށް ވަތްތަނުން ، މެހެމަލް އޭނާގެ އަތްދިއްކޮށްލައި ، ވަރަށް އަގުބޮޑު އަނގޮޓިއެއް ދައްކާލައި އެއީ އޭނާގެ އެންގޭޖްމަންޓް އަނގޮޓިކަމަށް ބުނި ހަނދާން ، ހައިދަރުގެ ޚިޔާލަށް އައެވެ. އޭނާއާ ކައިވެނިކުރަން ހަމަޖެހިފައިއޮއްވައި ، އެހެންމީހަކާ އެންގޭޖްވެގެން މެހެމަލް އޭނާއަށް އެދިނީ ލަނޑެއްކަމަށް ހައިދަރަށް ބުނެވުނެވެ. މެހެމަލް ދެކެ ، ހައިދަރުލޯބިވާކަންވެސް މެހެމަލްއަށް ރަނގަޅަށް އެނގޭނެއެވެ. މެހެމަލް ދެން އެބުނި ވާހަކަޔަކުން ، ހައިދަރުގެ ހިތަށްވީ ތަދު ވަކިން ބޮޑުވިއެވެ.

" ހައިދަރު އަހަރެންދެކެ ލޯބިވާކަން އެނގެއެވެ. އެކަމަކު ، އަހަރެން އެކަން ބަލައެއް ނުގަންނަމެވެ. " މެހެމަލް ބުންޏެވެ.

ހައިދަރުގެ ކޮއްކޮ ސާރާގެ ފިރިމީހާގެގޭގައި އޮތް ކައިވެންޏގުޅޭ ރަސްމިއްޔާތަކަށް ކުލްސޫމު ދިޔައީ ، ހައިދަރު ގޮވައިގެންނެވެ. އެތާ އޮތީ ހުސް އަންހެނުންނެވެ. އަންހެނުންތަކެއް އެއްވެފައި އޮތްތާކަށް ހައިދަރު ގެނައީތީ ، އޭނާހުރީ ފޫހިވެފައެވެ. ކުލްސޫމުގެ މަޤްޞަދަކީ ، އެތާ އެއުޅޭ އަންހެންކުދިންތަކުގެ ތެރެއިން ކުއްޖެއްގެ ގައިގާ ، ހައިދަރު އަޅައިގަތުމެވެ. ހުރިހާ ކުދިންވެސް ލަވަކިޔަމުން ނަށަމުން ދުވެ ، މަޖާކުރަމުން ގެންދިޔައެވެ. އެއިން ކުއްޖަކާ ދިމާލަށް ބަލައިލާކަށް ހައިދަރެއް ނޫޅެއެވެ.

ކުރީދުވަހު ، ރިދާއަތުން ހެދުމެއް އަތުލައިގެން ދިލްނަޝީން ދާން އުޅުނު ޕާޓީއަކީވެސް އެއީއެވެ. ދިލްނަޝީންވެސް އެޕާޓީގެ ތެރޭގައި މަޖާކޮށްކޮށްފައި އެބަ އުޅެއެވެ. ހައިދަރު އެއްލި ވައްކަޅިޔަކުން ދިލްނަޝީން ފެނުނެވެ. ދިލްނަޝީންގެ މޫނުމަތީގައިވާ އުފާވެރި ހިނިތުންވުމުން ، ހައިދަރަށް ކޮންމެވެސް އަސަރެއް ކުރިއެވެ. އެއީ މާބޮޑު ކަމަކަށް ނުހެދިނަމަވެސް ، އިރުއިރުކޮޅުން ، ދިލްނަޝީނާ ދިމާލަށް ހައިދަރަށް ބަލައިލެވެއެވެ. ދިލްނަޝީންގެ މޫނުގައި ކުލަހާކަންވެގެން ، ފަހަތުން ދުވަމުން ސާރާ އާދެއެވެ. އެމަންޒަރަކީ އެތާ އެއްވެތިބި އެންމެންނަށްވެސް މަޖާކަމަކަށް ވިއެވެ. ހައިދަރުގެ މަންމަވެސް ، ދިލލްނަޝީންގެ އެ ހިތްގައިމު ޙަރަކާތްތަކުގައި އަޅައިގަތެވެ. އަދި ، އެއީ ކޮންތާކުއުޅޭ ކާކުގެ ދަރިއެއްތޯ ބަލައި ، ދިލްނަޝީނާބެހޭ މަޢުލޫމާތު އެއްކުރިއެވެ.

ދިލްނަޝީން ، ދުވަމުންދުވަމުންގޮސް ، ހައިދަރުގެ ގައިގާ އަޅައިގަތެވެ. ހައިދަރަށްވެސް ، ދިލްނަޝީނާ ދިމާލަށް ބަލަހައްޓައިގެން އެތައް އިރެއްވަންދެން ހުރެވުނެވެ. ދިލްނަޝީނަށް ހުރެވުނީ އެކުރެވުނު ކަމަކުން ، ލަދުގަނެ ހައިދަރާދިމާއަށް ބަލަހައްޓައިގެންނެވެ. ދިލްނަޝީނުގެ މަންމައަށްވެސް ، ދިލްނަޝީން އެކުރިކަމަކުން އުނދަގޫވިއެވެ. ސާރާއަށް ފުރުޞަތު ލިބުމާއެކީ ، ދިލްނަޝީންގެ ގައިގާ ކުލަތައް ހާކައިގަތްގަތީނުންގޮސް ، އޭނާގެ މުޅިހެދުން ޚަރާބުވެ ، ލައިގެންހުރި ހެދުން ބަދަލުކުރަން ޖެހުނެވެ.

ހައިދަރަށް ފޯނެއް އައުމާއެކީ ، އެތަނުގައި އަޑުގަދަކަމުން ، ބޭރަށް ނުކުންނަން ހިނގައިގަތްތަނުން ، ޢާޞިމް އައިސް އޭނާ ހުށްޓުވައި ގޭގެ މަތީބުރީގައިހުރި ކޮޓަރިޔަކަށްގޮސް ، ހަމަޖެހިލައިގެން އިނދެ ފޯނުކުރެވޭނެކަމަށް ބުނެ ، އެކޮޓަރިޔަށް ހައިދަރު ފޮނުވައިލިއެވެ. ކަންދިމާކުރިގޮތުން ، އެކޮޓަރިޔަކީ ، ހެދުން ބަދަލުކުރުމަށްޓަކައި ދިލްނަޝީން އައިސް ވަތްކޮޓަރިއެވެ. ހައިދަރަށް ވަދެވުނުއިރު ، ދިލްނަޝީން އުޅެނީ ހެދުން ބަދަލުކުރަން ފާޚާނާ ތެރޭގައެވެ.

ހައިދަރު އައިސް ، އެނދުގައި ޖައްސާލައި ފޯނުން ވާހަކަ ދައްކަމުން ގެންދިޔައެވެ. ދިލްނަޝީން ފާޚާނާއިން ނުކުތްއިރު ، އެކޮޓަރީގައި މީހަކު ހުރިތަން ފެނިފައި ބިރުގަތެވެ. އަދި ، އެނދުމަތީ އޮތް ދޮޕައްޓާ ނަގައި އަވަސްއަވަހަށް ކޮޓަރިން ނުކުންނަން ހިނގައިގަތެވެ. ތަޅުގައި ހިފައިހިފައި ، އަތްގަނޑު ގުޑައެއްނުލިއެވެ. ދިލްނަޝީން ހީކުރީ ، ފޯނުން އެވާހަކަ ދައްކާމީހާ އެ ކޮޓަރިޔަށް ވަދެފައި ދޮރު ތަޅުލީ ކަމަށެވެ. ރޮމުންރޮމުން އެވާހަކަ ހައިދަރުގާތު ބުނުމުން އެކަމާ ހައިދަރު އަޖައިބުވިއެވެ. އޭނާ ދޮރުތަޅުލަންވީ އެއްވެސް ސަބަބެއް ނެތެވެ. ހައިދަރުގޮސް ތަޅުގައި ހިފައިލިއެވެ. ތަޅުހުރީ އެތެރެއިން ތާށިވެ ، ހަލާކު ވެފައެވެ.

ދޮރުހުޅުވޭނެ ހަމައެކަނި ގޮތަކީ ބޭރުން އައިސް މީހަކު ދޮރުހުޅުވުމެވެ. ހައިދަރު އޭނާގެ ކޮއްކޮ ، ސާރާއަށް ގުޅައިގެން ގެންނަން ފޯނުކޮށްކޮށް ސާރާ ، ފޯނެއްނުނެގިއެވެ. ދޮރުހުޅުވާތަނަށް މާގިނަމީހުން އައިސް ދޮރުހުޅުވުމަކީ ، ދިލްނަޝީން އެދޭކަމެއްނޫނެވެ. ދިލްނަޝީން ކަންބޮޑުވަނީ ކީއްވެގެންކަން ހައިދަރަށް އެނގެއެވެ. އެކަމަކު އެއީ 1940 ގެ އަހަރުތަކެއްނޫނެވެ. އޭރު ކަންބޮޑުކުރާގޮތަށް މިހާރަކު މީހުން ކަންބޮޑެއް ނުކުރާނެއެވެ. މިހާރު އުޅޭނީ ތަޢުލީމީޔާފްތާގެ ޒުވާނުންނެވެ. ދެމީހަކު އެއްކޮޓަރިއެއްގެ ތެރޭގައި ތިބުމަކީ ، މިހާރުގެ ޒުވާނުންނަށް އެހާބޮޑު ކަމެއްނޫނެވެ. އެހެނަސް އެއީ ، ދިލްނަޝީނަށް ވަރަށް ބޮޑުކަމެކެވެ.

ދިލްނަޝީނާއެކީ ، ބަންދު ކޮޓަރިއެއްގައި ފިރިހެނަކު ހުރިތަން ފެނިއްޖެނަމަ ، އެތައް ވާހަކައެއް މީހުން ދައްކާނެއެވެ. މަންމަގެ ކަންތައް އަދިވަކިން ބޮޑުވާނެއެވެ. ބޭރުން ދޮރުހުޅުވަން އެއްވެސްމީހަކު ގެންނަނަމަ ، އިތުރުމީހަކާނުލައި ، އެމީހަކު އެކަނި ގެނައުމަށް ދިލްނަޝީން އެދުނެވެ. ހައިދަރުވެސް އެކަމަށް  އެއްބަސް ވިއެވެ. ދިލްނަޝީނަށް ރޮވޭވަރުންނާއި ، ގެންފައިހުރި ބިރެއްގެ ސަބަބުން ހައިދަރުހުރީ ކަންބޮޑުވެފައެވެ. ޢާޞިމްވެސް ފޯނެއް ނުނަގައެވެ.

ދިލްނަޝީނުގެ އަތުގައި ހުރިބާރެއްލާފައި ދޮރުފަތުގައި ތަޅަން ފެށްޓިއެވެ. އެގޮތަށް ތަޅަނިކޮށް މީހަކު އައިސް ދޮރުހުޅުވައިފިނަމަ ، ހައިދަރުގެ އަގުވެއްޓޭނެކަން ، ދިލްނަޝީނަށް ހައިދަރު ހަނދާން ކޮށްދިނެވެ. ދިލްނަޝީނުގެ އަބުރު ގެއްލިދާނެތީ އެވާހަކަ ބުނީމަ 1940 ގެ އަހަރުތަކުގެމަތިން ހައިދަރު ހަނދާންކޮށްދީފައި ، ހައިދަރުގެ އަބުރާ ޖެހުނީމާ 1940 ގެ މަތިން ހަނދާނެއް ނުވިއެވެ. އެއީ ކޮންކަހަލަ މީހާގަނޑެއްބާއޭ ދިލްނަޝީންގެ ހިތަށް އެރިއެވެ. އެންމެފަހުން ، ހައިދަރު އޭނާގެ މަންމައާ ގުޅިއެވެ. ހައިދަރާއި އަންހެންކުއްޖަކު އެއްކޮޓަރިއެއްގައި ބަންދުވެފައި ތިބިކަން އެނގުނީމަ ، ކުލްސޫމް ގަޔާވާގޮތްވިއެވެ. ޢާޞިމްގާތު ބުނެގެން ދޮރުހުޅުވަން ދިޔައިރު ، ހައިދަރާއި ދިލްނަޝީން ކޮޓަރިތެރޭގައި ތިއްބެވެ. ޢާޞިމް އައިސް ހައިދަރުގެ ކިބައިން މަޢާފަށް އެދުނެވެ. އެދޮރުގެ ތަޅު ހަލާކުވެފައި ހުންނަތާ ދެދުވަހެއް ވެއްޖެއެވެ. ދިލްނަޝީން ގެންފައި ހުރިބިރަކާހުރެ ، އެންމެންވެސް ތިބީ ޙައިރާން ވެފައެވެ. ހައިދަރު އެކޮޓަރިން ނުކުމެގެން ދިޔައީ ދިލްނަޝީނާ ދިމާއަށް ބަލަހައްޓައިގެން ހުރެއެވެ. އޭނާގެމޫނުމަތިން ، ރަކި ހިނިތުންވުމެއް ފާޅުވާން ހުށްޓެވެ. ހިތުން ފިލުވައިލަން ފަސޭހަނޫން އެތައްކަމެއް ދިލްނަޝީނާއެކު މިއަދު އޭނާއަށް އެވަނީ ތަޖުރިބާ ކުރެވިފައެވެ. އަޅައިގަންނަ ގޮތެއް ހުންނަ ރީތި ކުއްޖެކެވެ. ހައިދަރުގެ ކޮއްކޮ ސާރާގެވެސް ރައްޓެއްސެކެވެ. މުޅިޔަކުން ގޯހެއްނޫނެވެ. ދިލްނަޝީނާމެދު ވިސްނައިލަން ، ހައިދަރަށް މަޖުބޫރުވި އެތައްކަމެއް މިއަދު އެއޮތީ ހިނގާފައެވެ.

ދިލްނަޝީނަށް މިއަދު އެކުރެވުނު ކަމެއްގެ ކަންތައް ލައިގަތީ ، ގެޔަށް ދިޔަފަހުންނެވެ. މަންމަގެ އެތައް ޝަކުވާއަކާ ދިލްނަޝީނަށް ކުރިމަތިލާން ޖެހުނެވެ. އަމިއްލަޔަށް ފިރިހެނަކާއެކީ ކޮޓަރިޔެއްގައި ބަންދުވެފައި ހުރުމަކީ ، އަންހެންކުދިންނަށް ކިހާ ނުރައްކާތެރި ކަމެއްކަން ، އަނީސާ އޭނާގެ ދަރިފުޅަށް ހަނދާން ކޮށްދިނެވެ. މިހާރު އުޅޭ ފިރިހެނުން އެކަހަލަ ފުރުޞަތުގެ ބޭނުން ހިފާނީ އެންމެ ގޯސް ގޮތަށެވެ. އެކަހަލަ ކަމެއް މީހަކު ކުރިޔަސް ، ދިލްނަޝީނަށް އެއްވެސް މީހެއްގާތު ބުނާކަށް ނުކެރޭނެއެވެ. އޭނާގެ އަބުރު ގެއްލި އަގުވެއްޓިދާނެތީއެވެ. އެކަހަލަ ވާހަކައެއް ، ހަމްޒާއަށް އިވިއްޖިއްޔާ ނިމުނީއެވެ. އެކަންކުރި މީހަކު މަރައިލާކަށްވެސް ހަމްޒާ ފަހަކަށް ނުޖެހޭނެއެވެ. އެހާވެސް ، ދިލްނަޝީން ދެކެ ހަމްޒާ ލޯބިވެއެވެ.

ދިލްނަޝީނާއި ހައިދަރު ކޮޓަރިތެރެއިން ނުކުތްތަން ފެނުމުން ، ދުރުގައިތިބި އަންހެނުންތައް ސިއްރުސިއްރުން ތުކިތުކި ލެއްވިތަން ، އަނީސާއަށް އޮތީ ފެނިފައެވެ. ވާހަކަ ހަދާމީހުން ތިބޭނީ އެކަހަލަ ތަނެއް ނުފެނިފައެވެ. ނަޞީބަކުން ދިލްނަޝީނަކަށް އެމީހުން ދެއްކި އެއްވެސް ވާހަކައެއްގެ އަޑެއް ނީވެއެވެ. އެހެނަސް ، އެވާހަކަތައް އިވިފައި އަނީސާހުރީ ކަންބޮޑުވެފައެވެ. އެމީހުން އެދެއްކި ވާހަކަތައް އެއީ ، ދިލްނަޝީންގާތު ބުނަންވެސް އަނީސާއަށް ލަދު ވާހަކަ ތަކެކެވެ.  އެކަހަލަ ތަންތަނަށްގޮސް ދިލްނަޝީން އުޅޭގޮތުން އަނީސާ ވަރަށް ކަންބޮޑުވެއެވެ. ސަމާސާއަކީ ވިހަވެސްވާ އެއްޗެކެވެ. ދިލްނަޝީންގެ ސަކަ އަދި ސަމާސާ މިޒާޖުން އެއުޅޭގޮތުން ކޮންމެފަދަ ކަމެއްވެސް ވެދާނެއެވެ. ތަންތަނަށް ގޮސްއުޅޭއިރު ، އެކަހަލަ ކަންކަމާ ތަންކޮޅެއްބޮޑަށް ވިސްނައިގެން އުޅުމަށް އަނީސާ އޭނާގެ ދަރިފުޅަށް ނަޞޭޙަތްތެރިވިއެވެ. ތުކިތުކި ލެއްވި މީހުން ބަލައިގެން އެތިބެނީ ، އެމީހާއާ ދިލްނަޝީނާ ދެމީހުންގެ މެދުގައި ގުޅުމެއް އޮންނަނީ ކަމަށެވެ.

ދިލްނަޝީން ، މަންމައާ ދިމާއަށް ލޯއަޅައިގަތެވެ. މަންމަ އެބުނީ ދިލްނަޝީން އިތުރަށް ކަންބޮޑުވާނެ ކަމެއްގެ ވާހަކައެވެ. އެކަހަލަ ގުޅުމެއް ބާއްވަން އެބޭބެ ނޫންމީހަކު އޭނާއަށް ނުވާނެތޯ ، މަންމައާ ސުއާލު ކުރިއެވެ. ދިލްނަޝީންގެ މިޒާޖާ އެއްގޮތަށް އޭނާއަކީ ސަމާސާވެސް ކުރާ ކުއްޖެކެވެ. ބުނާކަށް ބުނާކަށް އެއްޗެއް ނޯންނާނެއެވެ. އަނީސާއަށް ފެނުނުގޮތުގައި އެއީ ، ވަރަށް ނަލަ އަދި ހައިބަތުހުރި ފިރިހެނެކެވެ. ބޭބެއެއް ނޫނެވެ.

" އެހެންވިއްޔާ ، އަހަރެންގެ މަންމަ ބޭނުންވަނީ ، އެ ފިރިހެންކުއްޖާއާ އަހަރެން  ރައްޓެހިވާން ތާއެވެ . " ދިލްނަޝީން އޭނާގެ މަންމައާ ސަމާސާ ކޮށްލިއެވެ. އަދި އަޑުގެ ނެތްތަނަށް ހީގަތެވެ. ( ނުނިމޭ )