"ސައުފު އައްޑޫ އަފިރިންގެ އައްޑޫ" ގެ ނަމުގައި ސާފުކުރުމުގެ ޕްރޮގްރާމެއް އައްޑޫސިޓީގައި މިއަދު ފަށައިފިއެވެ.
މިއީ އައްޑޫސިޓީގައި މަސައްކަތްކުރާ ސަރުކާރުގެ މުއައްސަސާތައް ގުޅިގެން ފެށި ހަރަކާތެކެވެ. މި ޕްރޮގްރާމުގެ ދަށުން މިއަދު ވަނީ އައްޑޫ ސިޓީ ހިތަދޫ ސްވިމިން ޓްރެކް ސަރަހައްދާއި، މީހުން އާންމުކޮށް ޕިކްނިކް ގޮސް އުޅޭ ސަރަހައްދު ކަމަށްވާ ހަންކެޑެ ސަރަހައްދު ސާފު ކޮށްފައެވެ.
މިހަރަކާތުގައި ހައުސިން މިނިސްޓްރީއާއި، ވެމްކޯއާއި، އެމްޕީއެލްއާއި، ހިތަދޫ ރީޖަނަލް ހޮސްޕިޓަލާއި، ޔޫތު މިނިސްޓްރީއާއި، އެމްއެންޑީއެފްއާއި، އެމްއާރުޑީސީއާއި، އައްޑޫ ހައިސްކޫލުން ބައިވެރިވެފައިވެއެވެ. އަދިވެސް އިތުރު ތަންތަނުން ބައިވެރިވެފައިވެއެވެ. ސާފުކުރުމުގެ އިތުރަށް ހައުސިން މިނިސްޓްރީން ވަނީ އެ ސަރަހައްދުތަކުގައި ޑަސްބިން ތަކެއްވެސް ބަހައްޓައިފައެވެ.
މިހަރަކާތާ ބެހޭ ގޮތުން މައުލޫމާތު ދެއްވަމުން ހައުސިން މިނިސްޓްރީގެ ކޯޑިނޭޓަރު އަހުމަދު އަމަން އަލީ (ޓޮމް) ވިދާޅުވީ މިއީ ފެށުމެއް ކަމަށެވެ. ކުރިއަށް އޮތްތަނުގައި މި ޕްރޮގްރާމުގެ ދަށުން އިތުރު ތަންތަން ސާފުކުރުމުގެ މަސައްކަތްކޮށް އިތުރު ތަންތަނުގައި ޑަސްބިން ބަހައްޓަވާނެ ކަމަށެވެ.
އަމަން ވިދާޅުވީ މިއަދުގެ ހަރަކާތް ކުރިއަށް ދިޔައިރު ޓްރެކް ސަރަހައްދުގައިތިބި އާންމުންވެސް ހަރަކާތުގައި ބައިވެރިވެ އެއްބާރުލުން ދީފައިވާ ކަމަށެވެ. އެކަމަށްޓަކައި އެމީހުންނަށް ވަރަށްބޮޑަށް ޝުކުރު ދަންނަވާ ކަމަށްވެސް ވިދާޅުވިއެވެ.
އޭނާ ވިދާޅުވީ އައްޑޫ ސިޓީއަކީ ފަތުރުވެރި ތަރައްގީވަމުން އަންނަ ސިޓީއަކަށްވާތީ މި ސިޓީ ރީތިކޮށް ބޭއްވުމަކީ އަދުގެ ސަރުކާރުން ވަރަށް އިސްކަމެއް ދެއްވާ ކަމެއް ކަމަށެވެ.
