ރާއްޖޭގައި މަސައްކަތް ކުރައްވާ ސިޔާސީ ލީޑަރުން މިހާރަށްވުރެ ބޮޑަށް ޒިންމާވާން އެބަޖެހޭ ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު އިބްރާހީމް ދީދީ (އައިބީ) ވިދާޅުވެއްޖެއެވެ.
މިއަދު ބޭއްވި މަޖިސް ޖަލްސާގައި ވާހަކަ ދައްކަވަމުން އޭނާ ވިދާޅުވީ ސިޔާސީ ބައެއް ލީޑަރުން ދުވާލަކު ގޮތަކަށް ރާއްޖެއާ ބެހޭގޮތުން ނޭދެވޭ ވާހަކަތައް ބޭރުގެ ގައުމުތަކުގައި ފަތުރަމުން ގެންދާ ކަމަށެވެ. އެއީ ގައުމަށްޓަކައި ކޮށްގެންވާނެ ކަމެއްނޫން ކަމަށްވެސް އޭނާ ވިދާޅުވިއެވެ.
"އަޅުގަނޑުމެން ގަބޫލުކުރަން އެބަޖެހޭ ދުވާލަކު ގޮތަކަށް އެއްރާގަކަށް ތަފާތު ލަވަތައް ބައްޓަން ކޮށްގެން އެކިއެކި މީހުން ކިޔަމުންދާ ގޮތަށް ރާއްޖޭގެ ސިޔާސީ ޕާޓީތަކުގެ ވެރިން ދިވެހިރާއްޖެއާ ބެހޭ ގޮތުން ދުވާލަކު ގޮތަކަށް ވާހަކަ ދައްކަމުންދާ މަންޒަރު. އެއްދުވަހު ބުނެފާނެ މިތަނަށް (ރާއްޖެއަށް) ބޭރުމީހުން އަރާށޭ. އަނެއްދުވަހު ބުނެފާނެ ތިމަންނަ އެހެން ނުބުނަމޭ. އަނެއްދުވަހު ބުނެފާނެ ރައީސް ޔާމީންގެ ވެރިކަން ވައްޓާލާނަމޭ. އަނެއްދުވަހު ބުނެފާނެ ތިމަންނަ އެހެންވެސް ނުބުނަމޭ،" އައިބީ ވިދާޅުވިއެވެ. ބެލޭވޭ ގޮތުގައި އައިބީ އެދެއްކެވީ ކުރީގެ ރައީސް ނަޝީދުގެ ވާހަކައެވެ.
އެގޮތަށް އަމަލު ކުރެއްވުމުގެ ބަދަލުގައި ޒިންމާދާރު ރަނގަޅު ބައެއްގެ ގޮތުގައި މަސައްކަތްކޮށް ގައުމަށް ރަނގަޅުގޮތް ހޯދަން އެބަޖެހޭ ކަމަށް އޭނާ ވިދާޅުވިއެވެ. އެންމެންވެސް ވާންޖެހޭނީ ގައުމާއި، އިސްލާމްދީން ދިފާއު ކުރުމުގެ އިތުރަށް، ރައްޔިތުންގެ ލާބަޔާއި މަންފާއަށް މަސައްކަތްކުރާ ބަޔަކަށް ކަމަށްވެސް އޭނާ ވިދާޅުވިއެވެ.
