ރާއްޖޭގެ މިހާރުގެ ހާލަތާބެހޭ މައުލޫމާތު ރާއްޖެއަށް ޒިޔާރަތްކުރި އދ. ގެ ވަފުދަށް ސަރުކާރުން ދެއްވައިފިއެވެ.
އެ ވަފުދުގައި ހިމެނިވަޑައިގަންނަވަނީ ޗީފް އޮފް ދަ ރޫލް އޮފް ލޯ، އީކުއަލިޓީ އެންޑް ނޮން ޑިސްކްރިމިނޭޝަން ބްރާންޗް އޮފް ދަ ޔުނައިޓެޑް ނޭޝަންސް އޮފީސް އޮފް ދަ ހައި ކޮމިޝަން ފޮރ ހިއުމަން ރައިޓްސް، މިސް މޯނާ ރިޝްމާވީ އާއި، ރެޒިޑެންޓް ކޯޑިނޭޓަރ ފޮރ ދަ ޔުނައިޓެޑް ނޭޝަންސް އިން މޯލްޑިވްސް، މިސް ޝޯކޯ ނޯޑާ އެވެ.
ރާއްޖޭގެ މިނިސްޓީރިއަލް ކޮމިޓީގެ އިސްވެރިޔަކަށް ހުންނެވީ އެޑިއުކޭޝަން މިނިސްޓަރ ޑޮކްޓަރ އާއިޝަތު ޝިހާމްއެވެ. މިކޮމިޓީގައި ހިމެނިވަޑައިގެންނެވި އިތުރު ބޭފުޅުންގެ ތެރޭގައި މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމާއި، މިނިސްޓަރ އޮފް އެންވަޔަރަންމަންޓް އެންޑް އެނަރޖީ ތޯރިޤް އިބްރާހީމާއި، މިނިސްޓަރ އޮފް ހެލްތު އަބްދުﷲ ނާޒިމް އިބްރާހީމާއި، މިނިސްޓަރ އޮފް ހައުސިން އެންޑް އިންފްރާސްޓްރަކްޗަރ ޑޮކްޓަރ މުޙައްމަދު މުޢިއްޒު ހިމެނިވަޑައިގަންނަވައެވެ. މީގެ އިތުރުން މި ކޮމިޓީއަށް ޓެކްނިކަލް އެހީތެރިކަން ފޯރުކޮށްދިނުމުގެ ގޮތުން ދިވެހިރާއްޖޭގެ ފޮރިން ސެކްރެޓަރީ އަޙްމަދު ސަރީރުވެސް މި ބައްދަލުކުރެއްވުމުގައި ބައިވެރިވެ ވަޑައިގެންނެވިއެވެ.
އެބޭފުޅުންނާ ސަރުކާރުގެ ފަރާތުން ބައްދަލުކުރެއްވީ ދިވެހިރާއްޖޭގެ މިނިސްޓީރިއަލް ކޮމިޓީގެ ބޭފުޅުންނެވެ. އެ ބައްދަލު ކުރެއްވުމުގައި ރާއްޖޭގެ ޙާލަތާއިބެހޭ އެންމެ ފަހުގެ މަޢުލޫމާތު، ކުރިއެކޭވެސް އެއްފަދައިން ދެފުށްފެންނަގޮތަށް، ބޭރުގެ ފަރާތްތަކަށް ފޯރުކޮށްދެމުން ގެންދަވާނެކަމުގެ ޔަގީންކަން ޔޫ.އެންގެ ފަރާތުން ރާއްޖެއަށް ޒިޔާރަތްކުރައްވަމުން ގެންދަވާ ވަފްދަށް ރާއްޖޭގެ މިނިސްޓީރިއަލް ކޮމިޓީއިން ވަނީ ދެއްވާފައި ކަމަށް ރައީސް އޮފީހުން ވިދާޅުވިއެވެ.
ޔޫ.އެން ވަފްދުގެ ބޭފުޅުން ބޭނުންފުޅުވާ ނުވަތަ ސާފުކުރައްވަން ބޭނުންފުޅުވާ އެއްވެސް މައުލޫމާތެއް ވާނަމަ އެ މައުލޫމާތެއް މިނިސްޓީރިއަލް ކޮމިޓީއިން އެބޭފުޅުންނަށް ފޯރުކޮށްދެއްވާނެކަމަށާއި، ރާއްޖޭގެ ހާލަތު މިވަގުތު ނާޒުކު ފައްތަރެއްގައި ވީނަމަވެސް، ޔޫ.އެން ވަފްދުގެ ބޭފުޅުން ބޭނުންފުޅުވެއްޖެ ހިނދެއްގައި، ސަރުކާރުގެ ކޮންމެ މުއައްސަސާއަކުންވިއަސް، ކުއްލި ނުރައްކަލުގެ ހާލަތު އިއުލާނު ކުރެއްވުމާއި ގުޅިގެން އޭގެ އަސަރު ނުކުރާ ކޮންމެ ފަރާތަކާ ބައްދަލުކުރައްވައި މަޢުލޫމާތު ހޯއްދެވުމުގެ ފުރިހަމަ އިޚްތިޔާރު ޔޫ.އެންގެ ވަފްދަށް އޮތްކަމުގައިވެސް މިނިސްޓީރިއަލް ކޮމިޓީއިން ވިދާޅުވި ކަމަށް ރައީސް އޮފީހުން ވިދާޅުވެފައިވެއެވެ.
މިއަދުގެ ބައްދަލުކުރެއްވުމުގައި، ޔޫ.އެންގެ ފަރާތުން ރާއްޖެއަށް ޒިޔާރަތްކުރައްވަމުންގެންދަވާ ވަފްދުގެ ބޭފުޅުންނާއެކު ރާއްޖޭގެ މިނިސްޓީރިއަލް ކޮމިޓީއިން ވަނީ 1 ފެބުރުވަރީ 2018 ވަނަ ދުވަހު ރާއްޖޭގެ ސުޕްރީމް ކޯޓުން ނެރުނު އަމުރާއި ގުޅިގެން ރާއްޖޭގެ މަސްރަޙަށް އައި ބަދަލުތަކާބެހޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ. މިގޮތުން ރާއްޖޭގައި ކުއްލި ނުރައްކަލުގެ ހާލަތު އިއުލާނުކުރެވުނު ސަބަބުތަކާއި ބެހޭގޮތުންވެސް މަޝްވަރާކުރެއްވި ކަމަށްވެސް ރައީސް އޮފީހުން ވިދާޅުވިއެވެ. ކުއްލި ނުރައްކަލުގެ ހާލަތު އިއުލާނުކުރެވުނީ ގައުމީ ސަލާމަތީ ކައުންސިލުގެ ލަފާފުޅުގެމަތިން ޑިމޮކްރަސީއާ ރާއްޖޭގެ ގާނޫނު އަސާސީގެ ހިމާޔަތުގާ ރައީސުލްޖުމްހޫރިއްޔާ އަޅުއްވަން ޖެހިވަޑައިގަންނަވާ އެންމެފަހު ފިޔަވަޅުގެ ގޮތުގައިކަން މިނިސްޓީރިއަލް ކޮމިޓީއިން ފާހަގަކުރެއްވި ކަމަށްވެސް ރައީސް އޮފީހުން ވިދާޅުވިއެވެ.
މީގެ އިތުރުން މިބައްދަލު ކުރެއްވުމުގައި މިނިސްޓީރިއަލް ކޮމިޓީއިން ވަނީ ގާނޫނު ނަގަހައްޓާނެ ކަމުގެ ޔަގީންކަން ޔޫ.އެން ވަފްދުގެ ބޭފުޅުންނަށް އަރުވާފައެވެ. އެހެންނަމަވެސް މިހާރު ކުރެވެމުންދާ ކޮރަޕްޝަން ފަދަ މައްސަލަތަކުގެ ތަހުގީގުތަކަށް ހުރަސްއެޅުނަ ނުދިނުމުގެ ގޮތުން ގާނޫނީ ގޮތުން ބައެއްކަންކަން ހިފެހެއްޓިފައިވާ ކަމުގައި މިނިސްޓީރިއަލް ކޮމިޓީއިން ވަނީ ވިދާޅުވެފައެވެ. އަދި ޝަރުއީ ދާއިރާގެ ކަންކަން ކުރިއަށް ގެންދިއުމުގައި ހަމަހަމަކަން ދެމެހެއްޓުމާއެކު ތަހުގީގު ހިނގަމުންދާއިރު ގާނޫނާ އެއްގޮތަށް ހުރިހާ ހައްގެއް ލިބިދެވޭނެ ކަމުގެ ޔަގީންކަން ވެސް ވަނީ މިނިސްޓީރިއަލް ކޮމިޓީއިން ޔޫ.އެން ވަފްދަށް އަރުވާފައެވެ.
މިނިސްޓީރިއަލް ކޮމިޓީއިން އިތުރަށް ދެއްކެވި ވާހަކަފުޅުގައި ވިދާޅުވިގޮތުގައި، ބޭރުގެ ބައެއް ފަރާތްތަކުން ނެރެމުންދާ ދޮގު ބަޔާން ތަކުގެ ސަބަބުން ކަންބޮޑުވުން ފާޅުކުރައްވާކަމަށާއި، އިދިކޮޅު ސިޔާސީ ލީޑަރުން ދޮގު މައުލޫމާތު ހިއްސާކޮށް ހަގީގަތާ ޚިލާފަށް ވާހަކަތައް ފެތުރުމުގެ ސަބަބުން ދިވެހި ރައްޔިތުންނަށާއި، ވިޔަފާރިވެރިންނަށް ހުއްޓުމެއްނެތި ތަފާތު އެކި އުނދަގޫތައް ކުރިމަތިވަމުން ދާ ކަމުގައި ވަނީ ވިދާޅުވެފައެވެ.
މިނިސްޓީރިއަލް ކޮމިޓީއިން ވަނީ ޔޫ.އެން އިން ވަރަށް ގާތުން ސަރުކާރާއެކު ވަރަށް ޒިންމާދާރު ކަމާއެކީ މިކަން ހައްލުކޮށްދެއްވުމަށް މަސައްކަތްކުރައްވާނެކަމަށް އުންމީދު .ކުރައްވާކަމުގައި ވެސް ވިދާޅުވެފައެވެ
ޔޫ.އެންގެ ވަފްދުގެ ބޭފުޅުން ވަނީ ދިވެހި ސަރުކާރުން ޔޫ.އެންއާއިއެކު މިކަމާ ގުޅޭގޮތުން މަޝްވަރާކުރެއްވުމުންނާއި ދިވެހި ސަރުކާރުން ދިވެހި ރައްޔިތުންނާ މެދު ބަހައްޓަވާ އަޅާލުމާއި ޖަލުގައި ތިބި މީހުންގެ ހައްގުތައް ރައްކާތެރިކުރަމުން ގެންދާތީ ދިވެހި ސަރުކާރަށް ތައުރީފުކުރައްވައި މަރުހަބާ ވިދާޅުވެފައެވެ.
