ދައުރުން ބޭރުގައި މާދަމާ ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއަށް "އެއްކަލަ ބާރަ މެންބަރުންނަށް ނުވަދެވޭނެ" ކަމަށް ޕީޕީއެމްގެ ޗީފް ސްޕޯކްސް ޕާސަން އަދި ކެލާ ދާއިރާގެ މަޖިލިސް މެންބަރު އަލީ އާރިފް ވިދާޅުވެއްޖެއެވެ.
މަޖިލީހަށް ނުވަދެވޭނެ ކަމަށް އެވިދާޅުވަނީ އެބޭފުޅުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅައިފައިވާ 12 މެންބަރެކެވެ. އެހެންނަމަވެސް އެބޭފުޅުންގެ ގޮނޑި ނުގެއްލޭ ކަމަށް ފެބްރުއަރީ އެކެއްގައި ސްޕްރީމް ކޯޓުން ނެރުނު ހުކުމުގައި ވިދާޅުވެފައިވެއެވެ. އެ ހުކުމަށްފަހު އެބޭފުޅުންނަށް މަޖިލީހަށް ވަދެވޭނެ ކަމަށް މަޖިލީހުގެ އޭރުގެ އަމީން އާންމުވަނީ ހަމަޖައްސަވައިފައެވެ.
އެހެންނަމަވެސް ސްޕްރީމް ކޯޓުން މިރޭ ނެރުނު އަމުރަށްފަހު މަޖިލީހަށް ވަނުމުގެ ދޮރު އަނެއްކާވެސް އެބޭފުޅުންނަށް ވަނީ ބަންދުވެފައި ކަމަށް އާރިފް ވިދާޅުވިއެވެ.
"މިރޭ އަޑު އިވިގެން މިދިޔައީ އެންމެ ފުރަތަމަ އެކެއް ފެބުރުއަރީގައި ނެރުނު އަމުރުގައި ނަމްބަރު އެކެއްގައި ހިމެނޭ ފްލޯ ކްރޮސިންގެ މައްސަލައާއި، އަދި ހަތަރުވަނަ ނަންބަރުގައި ހިމެނޭ މައްސަލައާއި ދެ މައްސަލަ ބާތިލްކޮށްފައި މިވަނީ. ނުވަތަ ވަގުތީ ގޮތުން އަމަލު ކުރުން ހުއްޓާލައިފައި މިވަނީ. އޭގެ މާނައަކީ އެއްކަލަ 12 މެންބަރުންނަށް މަޖިލީހަށް ނުވަދެވޭނެޔޭ މާދަމާއަކު،" އަލީ އާރިފް ވިދާޅުވިއެވެ.
އެހެންވީމާ އެ 12 މެންބަރުން މާދަމާގެ ޖަލްސާއަށް ވަނުމަށް އެއްވެސް ސައްހަކަމެއް އަދި ހުއްޖަތެއްވެސްނެތް ކަމަށް އޭނާ ވިދާޅުވިއެވެ. "އެބޭފުޅުންނަށް އެއްވެސް ސައްހަކަމެއް ނޯންނާނެ، އެއްވެސް ހުއްޖަތެއް ނުދެއްކޭނެ، އެއްވެސް ހާލެއްގައި މާދަމާގެ ޖަލްސާއަކަށް އެ ބޭފުޅުންނަށް ނުވަދެވޭނެ،" އޭނާ ވިދާޅުވިއެވެ.
މާދަމާގެ ޖަލްސާއަށް ވަޑައިގެންނެވުމުގެ ދައުވަތު ރައްޔިތުންގެ މަޖިލީހުގެ އިދާރާއިން އެ 12 ބޭފުޅުންނަށްވެސް ކުރިންވަނީ ދީފައެވެ. އެ ގޮތަށް ދައުވަތު ދެއްވީ އޭރު ސްޕްރީމް ކޯޓުން އަމުރު ނެރެފައިނުވާތީއެވެ.
ސްޕްރީމް ކޯޓުން މިރޭ ނެރުނު އަމުރަކީ ސީދާ އިލެކްޝަންސް ކޮމިޝަނާއި ރައްޔިތުންގެ މަޖިލީހަށް ރައްދުވާ އަމުރެއް ކަމަށްވެސް އާރިފް ވިދާޅުވިއެވެ. އެ ދެ މުއައްސަސާއިން އެއަމުރަށް ފުރިހަމައަށް ތާބާވެއްޖެ ކަމަށްވާނަމަ "އެއްކަލަ ބާރަ މެންބަރުންނަށް" މަޖިލީހަށް ވަދެވޭނެ ގޮތެއްނޯންނާނެ ކަމަށް އޭނާ ވިދާޅުވިއެވެ.
"އެބޭފުޅުންނަށް (12 މެންބަރުންނަށް) ކުރިން ދައުވަތު ދިނީ ސްޕްރީމްލޯޓުގެ އަމުރެއް އޭރުނެތުމުން. މިހާރު އެއޮތީ ވަގުތީ އަމުރު. މި އަމުރު ރައްދުވަނީ ރައްޔިތުންގެ މަޖިލީހާއި އިލެކްޝަންސް ކޮމިޝަން. އެހެންކަމުން އެދެތަނުންވެސް ގާނޫނޫ ނަމްނަރު 144 އާއި 145 ގައި އެބުނާ ބާރުލިބިގެންވަނީ ސްޕްރީމް ކޯޓަށް ކަމަށްވާތީ މިދެންނެވި ދެ މުއައްސަސާއިން މި އަމުރަށް ފުރިހައަށް ތަބާވާންޖެހޭނެ. ފުރިހައަށް ތަބާވާ ކަމަށްވާނަމަ އެއްކަލަ 12 މެންބަރުންނަށް މަޖިލީހަށް ވަދެވޭނެ ގޮތެއް ނޯންނާނެ" އަލީ އާރިފް ޗެނަލް 13 ގައި ވާހަކަ ދައްކަވަމުން މިރޭ ވިދާޅުވިއެވެ.
