ރާއްޖޭގެ ކުރީގެ ރައީސުލްޖުމްހޫއްރިއްޔާ މުހައްމަދު ނަޝީދު މި ދިވެހިރާއްޖެ ދެކެ ކޯފާވެ ވަޑައިގަންނަވަނީ ކީއްވެ ކަމެއް އެނގިވަޑައި ނުގަންނަވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ޕީއެސްއެމްގެ "އެންމެ ފުރަތަމަ ގައުމު" ޕްރޮގްރާމުގައި ވާހަކަފުޅު ދައްކަވަމުން މިނިސްޓަރ ސައީދު ވިދާޅުވީ "ރައީސް ނަޝީދު މިގައުމުދެކެ އަންނަ ރުޅިއެއް ނޭނގޭ،" ކަމަށެވެ.
އެމަނިކުފާނު ގެންދަވަނީ ކަމެއް ދިމާވާއިރަށް ބޭރުގެ މީހުންގެ އެހީހޯދައި ބޭރުގެ ސިފައިން މިގައުމަށް އަންނަން ގޮވައިލައްވާ ބޭފުޅެއް ކަމަށްވެސް ސައީދު ވިދާޅުވިއެވެ.
ރާއްޖޭގެ ސިޔާސީ މަސްރަހަށް މިހާރުއައިސްފައިވާ ހަލަބޮލިކަމުގެ ތެރެއިންވެސް ރައީސް ނަޝީދު މަސައްކަތް ކުރެއްވީ ބޭރުސިފައިން ރާއްޖެއަށް އަރައި މިކަންކަން ހައްލު ކުރުމަށް ކަމަށް ސައީދު ވިދާޅުވިއެވެ.
މިނިސްޓަރ ވިދާޅުވީ އެފަދަ ހާލަތެއް ރާއްޖެއަށް މެދުވެރިވެރިވިއިރު ވެރިކަމުގައި ރައީސް ޔާމީންފަދަ ކެރިވަޑައިގަންނަވާ ޖެހިލުންކުޑަ ހިތްވަރުގަދަ ވެރިއަކު ހުންނެވީތީ އުފާކުރައްވާ ކަމަށެވެ. ރައީސް ޔާމީމް ރާއްޖޭގެ ވެރިކަމުގައި މިވަގުތު ހުންނެވުމަކީ ނިއުމަތެއް ކަމަށްވެސް މިނިސްޓަރ ވިދާޅުވިއެވެ.
