ރާއްޖޭގައި މިހާރު ހިނގައިގެން އުޅެނީ ބަޣާވާތެއް ނޫންކަމަށް އެމްޑީޕީގެ ޗެއާޕާސަންގެ ނާއިބު އަލީ ނިޔާޒު ވިދާޅުވެއްޖެއެވެ.
އޭނާ ވިދާޅުވީ ބަޣާވާތުގެ ވާހަކައަކީ މިސަރުކާރުން އުފައްދައިގެން ދައްކަވާ ވާހަކައެއް ކަމަށެވެ. އެހެންވީމާ ރައީސް ޔާމީން އިންތިޚާބަކުން ބަލިވެ ވަޑައިގެންފި ކަމަށްވާނަމަ ރައްޔިތުން އެމަނިކުފާނާ ދެކޮޅަށް ބަޣާވާތް ކުރެއްވީ ކަމަށް ވިދާޅުވުމަކީ ދުރުކަމެއް ނޫންކަމަށް ވިދާޅުވިއެވެ.
ތިންބާރު ވަކިވެފައިވާ ވެރިކަމެއްގައި ރައީސުލްޖުމްހޫރިއްޔާ ގާނޫނީ ހަމަތަކުން ބޭރުވާކަމަށްވާނަމަ އެމަނިކުފާނު ހަމަމަގަށް ރުޖޫއަކުރުމުގެ މަސައްކަތް ރައްޔިތުންގެ މަޖިލީހާއި ފަނޑިޔާރު ގެއިން ކުރައްވަންޖެހޭނެ ކަމަށް ނިޔާޒު ވިދާޅުވިއެވެ. އެހެންވީމައި ސްޕްރީމް ކޯޓުން ނެރުއްވި އަމުރަކީ ސައްހަ ނިންމުމެއް ކަމަށް އޭނާ ވިދާޅުވިއެވެ.
"މިއީ ބަޣާވާތެއްނޫން، މިއީ ގާނޫނީ ހަމަތަކުން ހިނގައިދިޔަކަމެއް. ގާނޫނޫގެ ތެރެއިން ރައީސް ހަމަމަގަށް އަޅުވަންއޮތީ ރައްޔިތުންގެ މަޖިލީހާއި، ކޯޓުތަކުން. ކޯޓުން އެކަން ކުރެއްވުމުން އެކަން ވެގެން އެދިޔައީ ބަޣާވަތަކަށް ކަމަށް ސަރުކާރުން އެ ނިންމެވީ،" ނިޔާޒު ވިދާޅުވިއެވެ.
އޭނާ ވިދާޅުވީ ރާއްޖޭގައި މިހާރު ހިނގަމުންދާ ކަންކަން ހަމައަކަށް އެޅުވުމަށް ރައްޔިތުންގެ ދައުރު ވަރަށްބޮޑުކަމަށެވެ. އެހެންކަމުން އެކަން ކުރެއްވުމަށް ރައްޔިތުން ސުލްހަވެރި އެއްވުންތަކަށް ނުކުންނެވުމަށް އޭނާ ގޮވައިލެއްވިއެވެ.
