ރާއްޖޭގެ ކަންކަން ނިންމުމުގެ ފުރިހަމަ އިހުތިސާސް އޮންނަންވާނީ ދިވެހި ރައްޔިތުންގެ އަތުގައިކަމަށް ރައީސް ޔާމީން މިރޭ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕީޕީއެމްގެ އަންހެން މެންބަރުން އިންތިޒާމު ކޮށްގެން މިރޭ ކުރިއަށްދިޔަ ހަރަކާތެއްގައި ބައިވެރިވެ ވަޑައިގެން ދެއްކެވި ވާހަކަފުޅުގައެވެ.
އެމަނިކުފާނު ވިދާޅުވީ ރާއްޖެއަކީ ހުރިހާ ދިވެހިންގެ ގައުމުކަމަށެވެ. ދިވެހި ދައުލަތުގެ ކަރާމާތާއި މުގައްދަސްކަމަކީ ހަމަ ހުރިހާ އެންމެން ހިފަހައްޓަންޖެހޭ ""ގައުމީ ރުކުނެއް" އަދި ވާޖިބެއް ކަމަށްވެސް ވިދާޅުވިއެވެ. ރައީސް ވިދާޅުވީ ވެރިކަމުގެ ކަރާމާތާއި ދިވެހި ބިމަކީ އަދި ފެއްސާ ރަތާ ހުދުގެ ދިދައަކީ ގަނެވޭނެ އެއްޗެއް ނޫންކަމމަށެވެ. އެއީ އެއަށްވުރެ މުގައްދަސް އެއްޗެއް ކަމަށް ރައީސް ވިދާޅުވިއެވެ.
އެ ޖަލްސާގައި ރައީސް ވަނީ ދިވެހި އަންހެނުންގެ ހީވާގިކަމަށް ތައުރީފުކުރައްވައި ވާހަކަފުޅު ދައްކަވައިފައެވެ.
ރާއްޖޭގައި މިހާރު ހިނގަމުންދާ ކަންކަން ހަމައަކަށް އެޅުވުމަށް ކުރީގެ ރައީސް ނަޝީދުވަނީ އިންޑިއާގެ އަސްކަރީ މަދަދަށް އެދިވަޑައިގެންފައެވެ. އެހެންނަމަވެސް ޗައިނާއިން ބުނެފައިވަނީ އެއްވެސް ގައުމަކުން ރާއްޖޭގެ ދާޚިލީ ކަމެއްގެ ތެރެއަށް ވަދެގެންނުވާނެ ކަމަށެވެ. މަޝްވަރާކޮށްގެން ކަންކަން ހައްލުވާނެ ކަމަށް އެގައުމުންވަނީ ބުނެފައެވެ.
