ޕްރިންސް ހެރީ އާއި މެގަން މާކެލް އެންގޭޖްވެ ވަޑައިގަތް ފަހުން މެގަންގެ ފުރަތަމަ ރަސްމީ ހަރަކާތުގައި އޭނާ ބައިވެރިވެވަޑައިގެންފިއެވެ. ބުރާސްފަތި ދުވަހުގެ ރޭ ލަންޑަންގައި އެންޑީވަރ އެވޯޑްސް ހަވާލުކުރުމަށް ބޭއްވި ހަރަކާތުގައި މެގަން ވަނީ އޭނާގެ ފުރަތަމަ ޝާހީ ސްޕީޗް ވެސް ދެއްވައިފައެވެެ. މީޑިއާގައި ރިޕޯޓްކޮށްފައިވާ ގޮތުގައި މެގަން ވަނީ މި ހަރަކާތުގައި ބައިވެރިވެވަޑައިގަތުމަކީ އޭނާއަށް ލިބިވަޑައިގަތް ވަރަށް ބޮޑު ޝަރަފެއް ކަމަށް ވިދާޅުވެފައެވެ. އަދި އޭނާ ވަނީ އެވޯޑް ލިބުނު ބައެއް ފަރާތްތަކަށް އެވޯޑް ހަވާލުކޮށްދެއްވައިފައެވެ.
ހެރީވެސް ވަނީ ބައެއް ފަރާތްތަކަށް އެވޯޑް ހަވާލުކޮށްދެއްވައިފައެވެ.
މެގަން އަކީ މަޝްހޫރު ޓީވީ ސިލްސިލާއެއް ކަމަށްވާ ސޫޓް އިން ބެލުންތެރީންގެ މަގްބޫލުކަން ހޯދައިފައިވާ ތަރިއެކެވެ. އެހެންނަމަވެސް އޭނާ ވަނީ މިހާރު އެ ސިލްސިލާއިން ވަކިވެވަޑައިގެންފައެވެ. ރޭގެ ރަސްމިއްޔާތަށް އޭނާ ވަޑައިގެންނެވީ ވެސް ސޫޓެއް ތުރުކުރައްވައިގެންނެވެ.
ޕްރިންސް ހެރީ އާއި މެގަން މާކެލް އެންގޭޖްވެ ވަޑައިގަތް ކަން އިއުލާން ކުރެއްވީ މިދިޔަ ނޮވެންބަރު މަހު އެވެ. އަދި މި އަަހަރުގެ މޭ މަހުގެ 19 ވަނަ ދުވަހު ކައިވެނި ކުރައްވާނެ ކަމަށް ޝާހީ ގަނޑުވަރުންވަނީ އިއުލާން ކުރައްވައިފައެވެ.
