ޝައިޚް އާދަމް ނިޝާން ޕޮލިހަށް ހާޒިރުވާން އަންގައިފިއެވެ.
އޭނާ ޕޮލިހަށް ހާޒިރު މި ކުރަނީ ޔޯގާ ހުއްޓުވި ދުވަހު ހަމަނުޖެހުން ހިންގި މައްސަލައިގާ އޭނާގެ އަޑުގެ ސާމްޕަލް ނެގުމަށެވެ. އަދި އޭނާ ހާޒިރު ކުރަނީ ކޯޓު އަމުރެއްގެ ދަށުން ކަމަށް ޝައިޚް ނިޝާން ވަނީ ވިދާޅުވެފަ އެވެ.
މި މައްސަލައިގާ މި އަހަރުގެ ޖޫން 22 ވަނަ ދުވަހު ކޯޓު އަމުރެއްގެ ދަށުން ޝައިޚް ނިޝާން ހައްޔަރުކުރުމަށްފަހު، ދޫކޮށްލީ ޝަރުތު ތަކަކާއެކުގަ އެވެ. އެއީ މިދިޔަ އޯގަސްޓް މަހުގެ ހަތްވަނަ ދުވަހުގަ އެވެ.
މީގެ އިތުރުން މާލެއިން ބޭރަށް ވަޑައިނުގަތުމާއި، ފޯނު ނަންބަރު ބަދަލުވެއްޖެނަމަ އެންގެވުމާއި، ފުލުހުންގެ ތަހުގީގަށް ހާޒިރުވާން އަންގައިފިނަމަ ހާޒިރުވެވަޑައިގަތުމަށް ވެސް ވަނީ ޝަރުތުކޮށްފަ އެވެ.
ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ޔޯގާ ހަރަކާތް ހިންގިދުވަހު ހިންގި ހަމަނުޖެހުންތަކުގައި ނިޝާން އިސްކޮށް އުޅުނުކަމަށް ތުހުމަތުކުރެވޭ ކޮންމެވެސް މިންވަރަކަށް ހެކި ލިބިފައިވާ ކަމަށް ފުލުހުން ބުނެފައިވެއެވެ.
އެގޮތުން ހަމަނުޖެހުން ހިންގި މީހުންނާ މުއާމަލާތްކޮށް އެކަމަށް ހިތްވަރު ދިނުމަށް ސޯޝަލްމީޑިއާގައި މަސައްކަތްކުރި ކަމުގެ ހެކިތައް ލިބިފައިވާ ކަމަށް ދައުލަތުންނާއި ފުލުހުން ވެސް ހައިކޯޓުގައި ބުނެފައިވެއެވެ.
