ރައީސުލްޖުމްހޫރިއްޔާ އަޒުލް ކުރަން އިދިކޮޅު ފަރާތްތަކުން ސުޕްރީމް ކޯޓަށް ދިޔައީ ސުޕްރީމް ކޯޓާމެދު އިދިކޮޅަށް އިތުބާރު އޮތުމުން ކަމަށާއި ނަމަވެސް އެއީ ސަރުކާރަށް މާބޮޑު ކަމެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރުމާލު ދޭއް ޖަގަހައިގައި ރޭ އޮތް ޕީޕީއެމްގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ ރައީސް މަގާމުން އަޒުލް ކުރަން އިޚްތިޔާރާއި ބާރު އެބައޮތް ކަމަށާއި، ސުޕްރީމް ކޯޓުވެސް މަގުން ކައްސާލާނަމަ އެ ކޯޓުވެސް ހިނގާކަން ކަށަވަރުކޮށްދޭން ހުންނެވި ބޭފުޅަކީ ރައީސުލްޖުމްހޫރިއްޔާ ކަމަށެވެ.
ރައީސް ވިދާޅުވީ ސަރުކާރު ގޯސް މަގަކުން ހިނގާނަމަ ދާންއޮތް މަގަކުން ދިޔުމުގެ ފުރުޞަތު އިދިކޮޅު ފަރާތްތަކަށްވެސް އޮންނާނެ ކަމަށެވެ. ރައީސްގެ ނުފޫޒު މިނިވަން މިއައްސަސާ ތަކަށް އޮތްކަމަށް ބުނެ އިދިކޮޅު ފަރާތްތަކުން ދައްކާ ވާހަކަ ތަކަށް ރައްދު ދެއްވައި ރައީސް ވިދާޅުވީ އެމްޑީޕީގެ ދުވަސްވަރު މުޅި ފުލުހުންގެ މިނިވަން މުއައްސަސާވެސް ޙިސޯރު ކޮށްފައި އޮތް ކަމަށެވެ.
