ތިން ފުލުހުންނަށް ހަމަލާދިން ދެމީހުން ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން މުއްދަތު ޖަހައިފިއެވެ.
އެ ހާދިސާ ހިނގާފައިވަނީ މަޖީދީމަގު ޔޫރޯ ސްޓޯރު ކުރިމަތިން މި ސެޕްޓެމްބަރ މަހުގެ 9 ވަނަ ދުވަހު މެންދުރު 11:50 ހާއިރުއެވެ. އެ ހާދިސާގައި ހަމަލާ ދީފައިވަނީ ފުލުހުންގެ ޑްރަގް އެންފޯސްމަންޓް ޑިޕާޓްމަންޓަށް ނިސްބަތްވާ ތިން ފުލުހަކަށެވެ.
އެ މައްސަލައާއި ގުޅިގެން ހައްޔަރުކޮށްފައިވަނީ އުމުރުން 18 އަހަރުގެ ފިރިހެނަކާއި 20 އަހަރުގެ ފިރިހެނެކެވެ.
އެ ހަމަލާއާއި ގުޅިގެން ތިން ފުލުހުންނަށް އެކި ވަރުގެ އަނިޔާ ލިބިފައިވާ އިރު، އޭޑީކޭ ހޮސްޕިޓަލުގައި ތިން ފުލުހުންނަށް ފަރުވާ ދެމުންދާ ކަމަށް ވަނީ ބުނެފައެވެ. އެހެން ނަމަވެސް އެ ފުހުންނަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ.
