އަތޮޅު ތެރޭގެ ރަށްރަށުގައި މާލެއަށްވުރެ އެތައް ތަނެއް ބޮޑުކޮށް މީގެކުރިން ނަގަމުން އައި ކަރަންޓާއި ފެން ރިޔާސީ އިންތިޚާބު ކައިރިވެފައި ވަނިކޮށް ސަރުކާރުން މިއަދު އަގުހެޔޮކުރަން ނިންމީ ސަރުކާރުގައި އިޚްލާސްތެރި ކަމެއް އޮވެގެން ނޫން ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވިދާޅުވެއްޖެއެވެ.
ޝާހިދު އަމިއްލަފުޅު ފޭސްބުކް ޕޭޖުގައި ވިދާޅުވެފައި ވަނީ އަތޮޅު ތެރެއާއި މާލެ އާއި ޓެކްސް ދެއްކުމުގައި ހަމަހަމަ ކަމަށާއި އިންތިޚާބާ ދިމާކޮށް ކަރަންޓާއި ފެން އަގުހެޔޮ ކުރީ އިޚްލާސްތެރި ކަމެއް އޮވެގެން ނޫންކަމަށެވެ. އެންމެ ފަހުން އޮތް ލޯކަލް ކައުންސިލް އިންތިޚާބާ ދިމާކޮށްވެސް ކަރަންޓުގެ އަގު ހެޔޮކުރި ކަމަށާއި ނަމަވެސް އިންތިޚާބު ނިމުމާއެކު އަނެއްކާވެސް ކަރަންޓުގެ އަގު ބޮޑުކުރި ހަނދާން ރައްޔިތުން ނުނެތޭނެ ކަމަށްވެސް ޝާހިދު ވިދާޅުވިއެވެ.
"ރައްޔިތުންގެ ލޮލުގައި އަނދުނެއް ނޭޅުވޭނެ" ޝާހިދު ވިދާޅުވެފައިވެއެވެ.
ސަރުކާރުގެ ފަރާތުން އެނާޖީއާބެހޭ ވަޒީރު ތޯރިގް އިބްރާހިމް މިއަދު ވިދާޅުވީ މާލެއާއި ރާއްޖޭގެ ހުރިހާ ރަށެއްގައި އަންނަ މާޗު މަހުން ފެށިގެން ކަރަންޓާއި ފެނަށް ނަގާނީ މާލޭގައިވެސް ނަގާ އަދަދަށް ކަމަށެވެ.
މިނިސްޓަރު ވިދާޅުވީ މީގެކުރިން ކަރަންޓާއި ފެނަށް މާލެއިން ނަގަމުން އައި އަގުތަކަށްވުރެ އަތޮޅުތެރޭގެ ރަށްރަށުގައި ނަގަމުން އައި އަގު ވަރަށް ބޮޑެވެ. އަދ އަތޮޅު ތެރޭގެ އެކި ހިސާބުގައިވެސް އަގުގެ ތަފާތުތަކެއް ހުރިކަމަށް ވިދާޅުވިއެވެ. އެހެންކަމުން ސަރުކާރުން މަސައްކަތް ކުރަމުން އައީ މާލެއާއި އަތޮޅު ތެރޭގެ ފަރަގު ކުޑަކުރެވޭތޯ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މާލެއާ އެއްއަގަކަށް އަތޮޅުތެރޭގެ ކަރަންޓުގެ އަގު ތިރިކޮށްލުމުން އަތޮޅުތެރޭގެ ރަށްރަށުގައި މީގެކުރިން ކަރަންޓް ބިލަށް ދައްކަމުން އައި މިންވަރު 80 ޕަސެންޓް ހެޔޮވެގެން ދާނެކަމަށެވެ. 400 ޔުނިޓް ބޭނުން ކުރަމުން މިހާރު އަންނަ ގެއަކުން ނަމަ ކަރަންޓް ބިލުން 400 ރުފިޔާ ކުޑަވާނެ ކަމަށްވެސް ތޯރިގް ވިދާޅުވިއެވެ.
ކަރަންޓުގެ އަގު މާލެއެކޭ އެއްވަރަށް ހުރިހާ ރަށެއް ބަދަލު ކޮށްލުމުން މާޗު މަހުން ފެށިގެން 100 ޔުނިޓާ ހަމައަށް ނަގާނީ 1.50 ރ އެވެ. 100 ޔުނިޓުން ފެށިގެން 200 ޔުނިޓާ ހަމައަށް ނަގާނީ 1.70 ރ އެވެ. 200 ޔުނިޓުން މަތި، 300 ޔުނިޓާ ހަމައަށް ނަގާނީ 2.15 ރ އެވެ. 300 ޔުނިޓުން މަތި، 400 ޔުނިޓާ ހަމައަށް ނަގާނީ 2.50 ރ އެވެ.
