ވެރިރަށް މާލޭގައި އޮތް އިޖުތިމާއީ ބޯހިޔާވަހި ކަމުގެ ދަތިކަން ޙައްލު ކުރުމަށް ޓަކައި ސަރުކާރުން އެންމެ ފަހުން ހުޅުމާލޭގައި ދޫކުރި 600 ފްލެޓް ލިބުނު މީހުންނަށް މަރުޙަބާއެވެ.
ހުސްވި މަހުގެ ފަހުގެ ފަހުކޮޅު އެފަރާތްތަކަށް ސަރުކާރުން ފްލެޓް ތަކުގެ ތަޅުދަނޑި ހަވާލުކުރީ ވަރުގަދަ އެއްބަސްވުމެއްގައި ސޮއި ކުރުވުމަށް ފަހުއެވެ. 15000 މީހުން މި 600 ފްލެޓަށް އެދި ފޯމުލާފައި ވަނިކޮށް ތިން ކޮޓަރީގެ މި ފްލެޓްތައް ލިބުނު ފަރާތްތަކަކީ ހަގީގަތުގައިވެސް ވަރަށް ނަސީބުވެރި ބަޔެކެވެ. ބޯހިޔާވަހިކަން މުހިންމު މީހަކަށް އެއީ އުފަލުގެ ކޮޅެއް ނެތްވަރުގެ ނަސީބެކެވެ.
ނަމަވެސް މައްސަލަ ހިލިގަތީ ސަރުކާރުން ފްލެޓްގެ ތަޅުދަނޑި ހަވާލު ކުރިއިރަށް ތިމާއަށް ލިބުނު ތިން ކޮޓަރީގެ ފްލެޓް ބޮޑު އަގުގައި ކުއްޔަށް ދިނުމަށް ބަޔެއް މީހުން ތެޅިފޮޅިގަތް ހިސާބުންނެވެ. މާލޭގައި ވަރަށް ދަތި ޙާލުގައި ކުދިކުދި ތަންތަންކޮޅު ބޮޑު ކުލީގައި ހިފައިގެން އަނބިދަރިންނާއެކު ދިރިއުޅެމުން އައި އެއްބަޔަކު ފްލެޓް ލިބުނުއިރަށް އެތިކޮޅު ޕެކްކޮށްގެން ލިބުނު ތިން ކޮޓަރީގެ ފްލެޓަށް ބަދަލުވުމަށް އަވަސް އަރުވާލިއިރު ފްލެޓް ލިބުނު ބަޔެއް މީހުންގެ ވިސްނުމުގައި އޮތީ އަވަހަށް ފްލެޓް ކުއްޔަށް ދިނުމުގެ ވިސްނުމެވެ.
އެހެންވެ އައިބޭ އާއި އެތަން މިތަނުގައި ފްލެޓް ކުއްޔަށް ދޭ ވާހަކަ ޖަހައި 15000 މީހުން ކުރިމަތި ލާފައި އޮއްވައި ލިބުނު ފްލެޓުން ބޮޑު އާންމުދަނީއެއް ހޯދުމަށް އަވަސް އަރުވާލިއެވެ. ސަރުކާރުން ދިން ފްލެޓަށް އަމިއްލަ ދިރިއުޅުން ބަދަލު ކުރުމުގެ ކުޑަވެސް ވިސްނުމެއް ބަޔެއް މީހުންގެ ނެތެވެ. ފްލެޓް ލިބުނުއިރުވެސް އެކަށީގެންވާ ރަނގަޅު ފެންވަރުގެ އަމިއްލަ ބޯހިޔާވަހި ކަމެއް ލިބިފައި އޮތުމުންނެވެ. ނުވަތަ އެވަރުގެ ތަނަވަސް ކަމެއް ލިބިފައި އޮތުމުންނެވެ. އެހެންކަމުން ފްލެޓަށް އެދި މިނިސްޓްރީއަށް ފޯމު ހުށަހެޅި އިރާއި ފަހުން ދިރިއުޅުމުގެ ޙާލަތު ބަލަން މިނިސްޓްރީގެ ޓީމުތައް ދިޔުމުންވެސް ކަނޑައެޅިގެން ތަކުރާރުކޮށް ހައުސިންގ މިނިސްޓަރީއަށް ދޮގު މައުލޫމާތުދީ މަކަރާއި ހީލަތުން ފްލެޓް ހޯދުމުގެ ތުހުމަތު ބޮޑު އަގުގައި ފްލެޓުތައް ކުއްޔަށް ދެމުންދާ ފަރާތްތަކަށް ގިނަބަޔަކު ދަނީ ކުރަމުންނެވެ.
ތިން ކޮޓަރި ލިބުނު މީހުންނާއެކު ސަރުކާރުން ހެދި އެއްބަސްވުމުގައިވާ ގޮތުން ތިން ކޮޓަރީގެ ތެރެއިން ދެ ކޮޓަރީގައި ދިރިއުޅެން ވާނީ ފްލެޓް ލިބުނު މީހާގެ އާއިލާއެވެ. ފްލެޓް ލިބުނު މީހާގެ އާއިލާއަކީ ކޮބައިކަންވެސް ވަރަށް ސާފުކޮށް ލިޔެފައި އޮތެވެ. އާއިލާއަށް ކަމަށް ބަލައި ފްލެޓުގައި ދިރިއުޅެވޭނީ ކޮންބަޔަކަށް ކަން އޮތީ ހާމައަށް ފެންނާށެވެ. ދެން އެއްކޮޓަރި ފްލެޓް ލިބުނު މީހާ ބޭނުން މީހަކަށް ކުއްޔަށް ދެވިދާނެ ކަމަށްވެސް ބުނެފައި އޮތެވެ. ލިޔެފައި އޮތްއެއްޗެއް ގަބޫލުކޮށް ސޮއި ކޮށްލަން އޮތް އެއްބަސްވުމުގައި ސޮއިކޮށް އިނގިލީގެ ނިޝާން ޖަހާފައި ނުކުތުމުގެ ކުރިންވެސް ބަޔެއް މީހުން ތިން ކޮޓަރީގެ މުޅި ފްލެޓް ކުއްޔަށް ދިނުމަށް ބަޔެއް މީހުންނާއެކު އޮތީ މަޝްވަރާ ކޮށްފައި ކަމަށްވެސް ވެއެވެ. ނަމަވެސް މިނިސްޓްރީން ދެއްކި ހުރިހާ އެއްޗެއްގައި ސޮއިކޮށް އިނގިލީގެ ނިޝާން ޖަހާފައި ނުކުތްއިރު 15000 މީހުންގެ ތެރޭގައި ބޯހިޔާވަހިކަން އިންތިހާއަށް ބޭނުން ވެފައިތިބި މީހުން ތިބިކަން ކުޑަކޮށްވެސް ވިސްނާނުލައެވެ.
ރައްޓެއްސަކު ކިޔައިދިން ގޮތުގައި މިފަހަރު ފްލެޓް ލިބުނު މީހުންގެ ތެރެއިން މީހަކު ވަނީ ތިން ކޮޓަރީގެ ފްލެޓް އެހެން މީހަކަށް 15000 ރ އަށް ކުއްޔަށް ދީފައެވެ. ފްލެޓް ލިބުނު މީހާ މާލޭގައި ދިރިއުޅެނީވެސް ތިން ކޮޓަރީގެ ފެންވަރު ރަނގަޅު އެޕާޓްމެންޓެއްގައި ކަމަށްވެއެވެ. މި ބުނި ފްލެޓް 15000 ރ އަށް ކުއްޔަށް ދޫކޮށްލުމުން ސަރުކާރަށް ދައްކަންޖެހޭ ޖުމްލަ 7000 ރުފިޔާ ކަނޑާލުމުން އޭނާއަށް ސާފު އާންމުދަނީގެ ގޮތުގައި އެ ފްލެޓުން 8000ރ ލިބެއެވެ. މި ފްލެޓް 15000ރ އަށް ހިފި މީހާވެސް އެތަނުގައި އުޅޭކަށް ބޭނުމެއްނޫނެވެ. އޭނާވެސް ވަނީ އެ ފްލެޓް އެހެން މީހަކަށް ކުއްޔަށް ދީފައެވެ. އޭނާ ދިނީ 25000 ރުފިޔާއަށް ކަމަށް ވެއެވެ. އެހެންކަމުން މި ފްލެޓް ލިބުނު މީހާއަށް 8000 ރުފިޔާގެ ފައިދާއެއް ނުކުތުމުގެ އިތުރުން އެކަމާ ގުޅުންވެސް ނެތް އެހެން މީހަކަށްވެސް މި ފްލެޓުން 10000 ރުފިޔާގެ އާންމުދަނީއެއް ލިބެއެވެ. އެހެންވެ 7000 ރ ސަރުކާރަށް ދައްކަންޖެހޭ ފްލެޓުން ދެމީހަކަށް މިއޮތީ 18000 ރ ގެ ފައިދާއެއް ނުކުމެފައެވެ. މިހާރު އެވަނީ 6000 ރުފިޔާއަށް ސަރުކާރުން ދޫކުރި އިޖުތިމާއީ ބޯހިޔާވަހި ކަމުގެ ފްލެޓުގެ ކުލި 25000 ރ އަށް އަރާފައެވެ. ދެވަނަ މީހާ ފްލެޓް ކުއްޔަށް ދޫކޮށްލި އަދަދަކީ ސަރުކާރުން ފްލެޓް ލިބުނު މީހާގެ އަތުން ޑައުންޕޭމަންޓްގެ ގޮތުގައި ނެގިވަރުގެ އަދަދެކެވެ.
ރައްޓެއްސަކު ކިޔައިދިން ގޮތުގައި މިފަހަރު ފްލެޓް ލިބުނު މީހުންގެ ތެރެއިން އޭނާ ދަންނަ އެހެން މީހަކު ވަނީ އޭނާއަށް ލިބުނު ފްލެޓް ވަރަށް ބޮޑު އެޑްވާންސެއް ނެގުމަށް ފަހު ދިގު މުއްދަތަކަށް ކުއްޔަށް ދީފައެވެ. ލިބުނު މައުލޫމާތުން އެނގުނު ގޮތުގައި ފްލެޓް ކުއްޔަށް ދިން މީހާގެ އަތުން ނެގި އާދަޔާ ޚިލާފު ބޮޑު އެޑްވާންސް ފައިސާއިން އޭނާ ވަނީ ކުޑަވަރެއްގެ ސަފާރީއެއް ގަތުމަށް އެފައިސާ އިންވެސްޓް ކުރަން ނިންމާފައެވެ.
މައުލޫމާތު ލިބިފައިވާ ގޮތުގައި ބަޔެއް މީހުން އެމީހުންނަށް ލިބުނު ފްލެޓް 15000 ރުފިޔާ އާއި 20000 ރ އަދި 25000 ރ އަށްވެސް މިހާރު ވަނީ ކުއްޔަށް ދީފައެވެ. ގިނަ މީހުން ވަރަށް ބޮޑު އެޑްވާންސެއް ނަގަމުން އަންނަ ކަމުގެ ވާހަކަތައްވެސް އުޅެއެވެ. އައިބޭގައި ކުއްޔަށްދޭ ކެޓަގަރީގައިވެސް ތިން ކޮޓަރީގެ ފްލެޓް ހުޅުމާލެއިން ކުއްޔަށް ދޫކުރާ ވާހަކަ އެއޮތީ ފެންނާށެވެ.
ފްލެޓްތައް ލިބުނު މީހުން ތިން ކޮޓަރީގެ ފްލެޓް އެކުގައި ކުއްޔަށް ދޭ މައްސަލަ ފެންމަތިވުމާއެކު ގެދޮރާބެހޭ ވަޒީރު ޑރ މުޙަންމަދު މުއިއްޒު ރޭގައި ވަނީ އެފަރާތްތަކަށް އިންޒާރު ދެއްވާފައެވެ. މިނިސްޓަރ މުއިއްޒު ރޭ ކުރެއްވި ޓްވީޓެއްގައި ވިދާޅުވީ އެއްބަސްވުމާ ޚިލާފުވާ ފަރާތްތަކުގެ އަތުން ފްލެޓް އަތުލައްވާނެ ކަމަށެވެ.
