މި ސަރުކާރުގެ ބޯހިޔާވަހި ކަމުގެ މަޝްރޫއުގެ ދަށުން ހުޅުމާލޭގައި ދާދިފަހުން ދޫކުރި ފްލެޓުތައް ލިބުނު ފަރާތްތައް ނޫން އެހެން ފަރާތްތަށް ދިރިއުޅެން ކުއްޔަށް ދޭ ފްލެޓުތައް އެ ފްލެޓުތައް ލިބުނު މީހުން އަތުން އަތުލައްވާނެ ކަމަށް ހައުސިންގ މިނިސްޓަރ ޑރ މުޙަންމަދު މުއިއްޒު ވިދާޅުވެއްޖެއެވެ.
ފަނަރަ ހާސް މީހުން ކުރިމަތިލި 600 ފްލެޓް ލިބުނު ފަރާތްތަކަށް ހުސްވި މަހުގެ ފަހުކޮޅު ފްލެޓު ހަވާލު ކޮށްފައިވާއިރު އެ ތަންތަނުން ބަޔެއް ފްލެޓު މިހާރު ވަނީ ކުއްޔަށްދީފައި ކަމަށް ވެއެވެ. އެހެންކަމުން ފްލެޓް ލިބުނު ފަރާތްތަކާއެކު މިނިސްޓަރީން ހެދި އެއްބަސްވުމާ ޚިލާފުވާ ފަރާތްތަކުގެ އަތުން ފްލެޓް ވަކިކުރެވޭނެ ކަމަށް މިނިސްޓަރު ވިދާޅުވިއެވެ.
"އިޖުތިމާއީ ބޯހިޔާވަހިކަން ޙައްލު ކުރަންދޭ ފްލެޓް، އެގްރީމެންޓާ ޚިލާފަށް ކުއްޔަށް ދޭނަމަ އެފްލެޓް އެފަރާތްތަކުން ވަކިކުރެވޭނެ" މިނިސްޓަރ މުއިއްޒު ކުރެއްވި ޓްވީޓެއްގައި ވިދާޅުވިއެވެ.
ފްލެޓުތައް ހަވާލުކުރިއިރު ވެފައިވާ އެއްބަސްވުމުގައި ވާގޮތުން ތިން ކޮޓަރީގެ ފްލެޓުން ކުއްޔަށް ދެވޭނީ ގިނަވެގެން 1 ކޮޓަރިއެވެ. އަނެއް ދެ ކޮޓަރީގައި އުޅެން ޖެހޭނީ ފްލެޓް ލިބުނު ފަރާތުގެ އާއިލާއެވެ. މިއިން ފްލެޓެއްގެ ކުއްޔަކީ 6000 ރ އެވެ. ނަމަވެސް މެއިންޓަނެންސް ސާވިސްއާއެކު ޖުމްލަ 7000 ރ ސަރުކާރަށް ދައްކަން ޖެހެއެވެ. ފްލެޓު ލިބުނު ބަޔެއް މީހުން ފްލެޓުގައި ދިރިއުޅުމުގެ ބަދަލުގައި ބޮޑު އަގުގައި ފްލެޓުތައް ކުއްޔަށް ދިނުމުގެ މައްސަލަ މިހާރު ވަނީ ފެންމަތި ވެފައެވެ.
