ބާރަ އަހަރުގެ ޖަލު ޙުކުމެއް އިއްވާފައިވާ ޖުމްހޫރީ ޕާޓީގެ ލީޑަރ ގާސިމް އިބްރާހިމް ގިނަ ދުވަސް ތަކަކަށް ފަހު ޖަރުމަނު ވިލާތުގައި ހުންނަވައި ޓްވީޓެއް ކުރައްވައިފިއެވެ.
މިއީ ޖަލު ޙުކުމް ގާސިމްގެ މައްޗަށް އިއްވި ފަހުން ސަރުކާރަށް އަމާޒު ކުރައްވައި ގާސިމް އެއްޗެއް ވިދާޅުވި ފުރަތަމަ ފަހަރެވެ. ސިންގަޕޫރަށް ބޭސްފަރުވާއަށް ވަޑައިގަތުމަށް ފަހު ހިތްޕުޅުގެ އާލާސްކަންފުޅެއްގައި އޮޕަރޭޝަން ކުރައްވައި، މިހާރު ޖަރުމަނުގައި ހުންނެވި ގާސިމް ދުވަސް ތަކަކަށް ފަހު ކުރެއްވި ފުރަތަމަ ޓްވީޓުގައިވެސް ވަނީ ރައީސް އަބްދުﷲ ޔާމީންގެ ސަރުކާރުގެ "އަނިޔާވެރި ކަމުން" ސަލާމަތް ކޮށްދެއްވުން އެދި ވީހާ ގިނަބަޔަކު ދުއާ ކޮށްދެއްވުމަށް އެދިވަޑައިގެންފައެވެ.
ގާސިމް މި ޓްވީޓް ކުރެއްވީ ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫންގެ ދަރިކަލުން ފާރިޝް މައުމޫން ހުކުމަކާއި ނުލައި ޖަލުގައި ބަންދު ކުރައްވާފައި ހުންނަތާ 150 ދުވަސް ވުމާއި ގުޅުވައިގެންނެވެ.
"ބިސްމިﷲ. މިއަދަކީ ފާރިޝް ކުށަކާނުލައި ބޭއިންސާފުން ޖަލު ބަންދުގައި ބަހައްޓާފައި ހުންނަތާ 150 ވަނަ ދުވަސް، މި ބޮޑު އަނިޔާއިން ސަލާމަތް ކޮށްދެއްވުން އެދި ހުރިހާ ބޭފުޅުންވެސް ދުއާ ކޮށްދެއްވުން އެދެން،" ގާސިމް ކުރެއްވި ފުރަތަމަ ޓްވީޓުގައި ވިދާޅުވިއެވެ.
މިއަދު ގާސިމް ކުރެއްވި ދެވަނަ ޓްވީޓުގައި ވިދާޅުވީ އަނިޔާވެރިންގެ ކިބައިން ހުރިހާ ދިވެހިންނާއި، ދިވެހި ގައުމު ސަލާމަތް ކޮށްދެއްވައި، ހިތްހަމަޖެހުމާއި އުފާވެރިކަން މިންވަރު ކޮށްދެއްވުން އެދިވަޑައިގަންނަވާ ކަމަށެވެ. މިއީ ސިންގަޕޫރަށް ބޭސްފަރުވާއަށް ފުރާވަޑައިގެންނެވި ފަހުން ސަރުކާރަށް އަމާޒު ކުރައްވައި ގާސިމް ކުރެއްވި ފުރަތަމަ ޓްވީޓު ތަކެވެ.
