ޚިޔާލު ތަފާތުވުމަކީ ސަރަޙައްދީ ގޮތުން ކުރިޔަށް ދިޔުމުގައި ހުރަހެއް ކަމަށް ނުހެދުމަށް ގޮވާލައްވައިފި

ޖަޢުފަރު ރަޝީދު
9 ޑިސެމްބަރު 2017 (ހޮނިހިރު) - 13:00 ރާއްޖޭގެ ޚަބަރު 0
The President of Afghanistan Ashraf Ghani (L), the Prime Minister of Bangladesh Sheikh Hasina (2L), the Prime Minister of Bhutan Tshering Tobgay (3L), the Prime Minister of India Narendra Modi (4L), the President of Maldives Abdulla Yameen (4R), the Prime Minister of Nepal Sushil Koirala (3R), the Prime Minister of Pakistan Nawaz Sharif (2R), and the President of Sri Lanka Mahinda Rajapaksa (R) stand at the start of the 18th South Asian Association for Regional Cooperation (SAARC) summit in Kathmandu on November 26, 2014. Afghanistan's new President Ashraf Ghani said November 26 he would not allow anyone to conduct a proxy war in his country after warnings that the rivalry between India and Pakistan could spill across the border. AFP PHOTO/POOL/Narendra Shrestha

ޚިޔާލު ތަފާތުވެ ފިކުރު އެއްގޮތްނުވުމަކީ ސަރަހައްދީގޮތުން ހާސިލްކުރަން ބޭނުންވާ ލަނޑުދަނޑިތައް ހާސިލުކުރުމުގައި އޮތް ހުރަހެއްކަމުގައި ނުހެދުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ގޮވާލައްވައިފިއެވެ.

ރައީސުލްޖުމްހޫރިއްޔާ މިކަމަށް ގޮވާލެއްވީ، ‏މިއަދު ފާހަގަކުރަމުންދާ 33 ވަނަ "ސާކް ޗާޓަރ ޑޭ"ގެ މުނާސަބަތުގައި ފޮނުއްވި މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި، މި ސަރަހައްދަކީ ފެތުރިފައިވާ ބައިބޯ އާބާދީއެއް ހިމެނޭ ސަރަހައްދެއް ކަމަށާއި މިސަރަހައްދަކީ ދިރިއުޅުމުގެ ވައްޓަފާޅިއާއި ޘަޤާފީގޮތުން ތަފާތުތަކެއް ހިމެނޭ ބަޔަކު ދިރިއުޅޭ ސަރަހައްދެއްކަން ފާހަގަކުރައްވާފައިވެއެވެ. އަދި ފަހަކަށް އައިސް ސާކް ސަރަހައްދުގައި ސިޔާސީ ހަމަނުޖެހުންތައް އިތުރުވެފައިވީ ނަމަވެސް ލިބެމުންދާ ފަހި ފުރުޞަތުތަކުގެ ތެރެއިން ސާކް ގެ ޤައުމުތައް ކުރިއެރުންތައް ހޯދަމުންދާކަމަށް އެމަނިކުފާނުގެ މެސެޖުގައި ފާހަގަކުރައްވާފައިވެއެވެ.

މިސަރަހައްދުގެ ތަޢުލީމީ ޤާބިލްކަން އިތުރު ކުރުމުގެ މުހިންމު ކަމުގެ މައްޗަށް އަލިއަޅުއްވާލައްވަމުން އެމަނިކުފާނުގެ މެސެޖުގައި، ފެންވަރު ރަނގަޅު ތަޢުލީމީ ފުރުސަތުތައް ފަހިކޮށްދިނުމަކީ ފަޤީރުކަން ނައްތާލުމާއި ދެމެހެއްޓެނިވި ތަރައްޤީއަށް ލިބިގެންދާނެ އެހީތެރިކަމެއް ކަމުގައި ވިދާޅުވެފައިވެއެވެ. އަދި 2030 ގެ އެޖެންޑާގައި ހިމެނޭ ލަނޑުދަނޑިތައް ހާސިލުކުރުމަށްޓަކައި އެއްވެސް ކުއްޖަކު ބާކީނުވާގޮތަށް ޒަމާނީ ވަސީލަތްތަކާއެކު ތަޢުލީމީ ޤާބިލުކަން އިތުރުކޮށް ފެންވަރު ރަނގަޅު ތަޢުލީމެއް ލިބޭނެ މަގު ފަހިކޮށްދިނުމުގެ މުހިންމު ކަމުގެ މައްޗަށް ރައީސުލްޖުމްހޫރިއްޔާގެ މެސެޖުގައި އަލިއަޅުއްވާލައްވާފައި ވެއެވެ.

ސާކް ސަރަހައްދުގެ ޤައުމުތަކަކީވެސް މޫސުމަށް އަންނަ ބަދަލުތަކާއި، ޓެރަރިޒަމްގެ ނުރައްކަލާއި ޤުދުރަތީ ކާރިސާތައް ފަދަ ދުނިޔޭގެ ކަންކޮޅުތަކަށް އަންނަ ނުރައްކާތަކާ ކުރިމަތިލާން ނުޖެހޭ ސަރަހައްދެއް ނޫންކަން ހާމަކުރައްވަމުން، މިފަދަ ކަންކަމުން ލިބޭ ގެއްލުންތައް ކުޑަކޮށް ސަލާމަތްވެ ތިބުމަށްޓަކައި އެއްޤައުމުން އަނެއް ޤައުމަށް އެހީތެރިކަން ފޯރުކޮށްދިނުމާއި އެއްބައިވަންތަކަމުގައި ދެމިތިބުމަކީ މުހިންމު ކަމެއްކަމުގައި ރައީސުލްޖުމްހޫރިއްޔާގެ މެސެޖްގައި ފާހަގަ ކުރައްވާފައިވެއެވެ.

ރައީސުލްޖުމްހޫރިއްޔާގެ މެސެޖުގައި ސާކްގެ މެންބަރު ޤައުމުތަކުގެ މެދުގައި މިހާރު އޮތް ގުޅުން އިތުރަށް ބަދަހިކޮށް ވަރުގަދަކުރުމަށް ދިވެހިރާއްޖެއިން ސާކްގެ މެންބަރު ޤައުމުތަކަށް ފުރިހަމަ އެއްބާރުލުމާއި އެހީތެރިކަން ދެއްވާނެކަން ކަށަވަރު ކޮށްދެއްވާފައިވެއެވެ. އަދި ދިވެހިރާއްޖެއިން އަބަދުވެސް މި ސަރަހައްދުގެ އިޖުތިމާޢީ އަދި އިޤުތިޞާދީ ކުރިއެރުމާއި ސަލާމަތާއި ހަމަޖެހުން ޤާއިމްކުރުމަށް އެއްބާރުލުން ދެއްވާނެ ކަމަށްވެސް ރައީސުލްޖުމްހޫރިއްޔާގެ މެސެޖްގައި ހާމަކުރައްވާފައިވެއެވެ.

 

ޖަޢުފަރު ރަޝީދު
ޖަޢުފަރު ރަޝީދަކީ ކުޅިވަރުގެ ލިޔުންތަކާއި ޚަބަރުތައް ލިޔުމުގެ ދާއިރާއިން މަޝްހޫރުވީ ލިޔުންތެރިއެކެވެ. އާފަތިހުގައި ވަރަށް ގިނަ ދުވަހު ޚިދުމަތް ކުރެއްވި އަދި މިހާރުވެސް ޚަބަރާއި ރިޕޯޓު ލިޔުއްވަމުން ގެންދަވާ ލިޔުންތެރިއެކެވެ.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.