މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް)ގެ ދައުވަތަކަށް ދިވެހިރާއްޖެއަށް ހަފްތާއެއްގެ ފެމިލިއަރައިޒޭޝަން ދަތުރެއްގައި އައި ނެދަލޭންޑްސްގެ ނޫސްވެރިންގެ ޓީމު ދަތުރު ނިންމާލައިފިއެވެ.
މި ދަތުރު ކުރިއަށްދިޔައީ އޭޕްރިލް މަހުގެ 6 ވަނަ ދުވަހުން 13 އާއި ހަމައަށެވެ.
މި ދަތުރުގައި ރާއްޖެއަށް އައި ޓީމަކީ ނެދަލޭންޑްސްގެ އާންމުންގެ މެދުގައި މަޤުބޫލު އޮންލައިން އަދި ޕްރިންޓް މަޖައްލާތަކާއި، ނޫސްތަކަށް ނިސްބަތްވާ ލިޔުންތެރިން ހިމެނޭ ޓީމެކެވެ. މި ޓީމުގެ ލިޔުންތަކުގެ ރީޗް މިލިއަނުން ގުނާ އަދަދުކުރެވެއެވެ.
މި ފެމިލިއަރައިޒޭޝަން ދަތުރުގައި ބައިވެރިވި މީޑިއާ ޓީމް ހަފްތާއެއް ހޭދަކޮށްފައިވަނީ ޖޯލި ބީންގްގައާއި، ގްރޭންޑް ޕާކް ކޮއްދިއްޕަރު އަދި ކްރޮސްރޯޑްސް މޯލްޑިވްސްގައި ހުރި ތަފާތު ހަރަކާތްތައް ތަޖުރިބާކުރުމުގަ އާއި، ކެއުމުގެ އެކި ޔުނީކް ބާވަތްތައް ތަޖުރިބާކުރުމުގައެވެ.
އެއީ 'ވެލްނަސް' ތީމެއްގެ ދަށުން، ދިވެހިރާއްޖޭގައި އަދި މި ޓީމުގެ ހޯސްޓްކުރި ތިން ރިސޯޓުގައި ލިބެންހުރި ތަފާތު ތަޖުރިބާތަކާއި، ކެއުމުގެ ބާވަތްތަކާއި ބެހޭ އާޓިކަލްތައް ލިޔުމަށެވެ. މި ލިޔުންތައް އަމާޒުކޮށްފައިވަނީ ނެދަލޭންޑްސް މާކެޓްގެ މުއްސަނދި ދަތުރުވެރިންނަށެވެ.
މި ފޭމް ޓްރިޕަކީ ނެދަލޭންޑްސް މާކެޓުގެ ގައުމުތަކުގެ މެދުގައި ރާއްޖޭގެ މަގުބޫލުކަން އިތުރުކުރުމަށް ވިޒިޓް މޯލްޑިވްސްއިން ގެންގުޅޭ ސްޓްރެޓެޖީގެ ދަށުން، ނެދަލޭންޑްސްގެ ފަތުރުވެރިންނަށް ދިވެހިރާއްޖެއަކީ ގުދުރަތީގޮތުން ރައްކާތެރި، އަމާން ޒަޖީރާ މަންޒިލެއްކަން ޔަގީންކޮށްދިނުމަށް ކުރިއަށް ގެންދިޔަ ހަރަކާތެކެވެ.
ދިވެހިރާއްޖޭގެ ހަތަރު ޓޫރިޒަމް ޕްރޮޑަކްޓްކަމުގައިވާ ރިސޯޓް، ގެސްޓްހައުސް، ލިވަބޯޑް، އަދި ހޮޓެލްގެ މައުލޫމާތާއި، ރާއްޖެއަށް ދަތުރުކުރުމަށް އަޅާފައިވާ އެންމެ ފަހުގެ ރައްކާތެރިކަމުގެ ފިޔަވަޅުތަކާއި، ޓްރެވަލް ގައިޑްލައިންތަކުގެ އިތުރުން ދިވެހިރާއްޖެއާ ގުޅޭ އެންމެ ފަހުގެ މައުލޫމާތުވެސް ޕޮޓެންޝަލް ފަތުރުވެރިންނަށް މިޓީމުން ލިޔާ ލިޔުންތަކުގައި އަންގައިދެވޭނެވެ.
މީގެ އިތުރުން، މި ހަރަކާތަކީ ރަޝިއާ-ޔޫކްރެއިން ހަނގުރާމައިގެ ސަބަބުން ހަލުވިކަމާ އެކު ބަދަލުވަމުންދާ ދުނިޔޭގެ ޖިއޯޕޮލިޓިކަލް ހާލަތަށް ބިނާކޮށް، ރާއްޖެ އަންނަ ފަތުރުވެރިންގެ އަދަދަށް ކޮށްފާނެ ނޭދެވޭ އަސަރު ކުޑަކުރުމުގެ ގޮތުން އެމްއެމްޕީއާރުސީއިން އެކުލަވާލައިފައިވާ ޝޯޓް-ޓާރމް ސްޓްރެޓަޖީގެ ދަށުން މުހިންމު މާކެޓްތަކުގައި ހިންގާ ހަރަކާތްތަކުގެތެރޭގައި ހިމެނޭ ހަަރަކާތެކެވެ.
މިއީ މިއަހަރު ނެދަލޭންޑްސް މާކެޓަށް ޙާއްސަކޮށްގެން ކުރިއަށްގެންދިޔަ ފުރަތަމަ ހަރަކާތެވެ. މިނިމުނު ފެމިލިއަރައިޒޭޝަން ދަތުރުގެ ސަބަބުން ރާއްޖެއަށް ނެދަލޭންޑްސްއިން ދަތުރުކުރާ ފަތުރުވެެރިންގެ އަދަދު އިތުރުވެ، ބުކިންގްސް އިތުރުވާނެކަމަށް އަންދާޒާކުރެވެއެވެ. އަދި، މިއަހަރު ކުރިއަށް އޮތްތާންގާވެސް މި މާކެޓަށް އަމާޒުކޮށްގެން ގިނަ ހަރަކާތްތަކެއް ހިންގުމަށް ތާވަލްކޮށްފައިވެއެވެ. މީގެ ތެރޭގައި ޕްރިންޓް އެޑްވަޓައިޒިންގް ކެންޕެއިންތަކާއި، ޑިޖިޓަލް މީޑިއާ މާކެޓިންގްގެ އިތުރުން ސޯޝަލް މީޑިއާ ކެންޕެއިންތައް ހިމެނެއެވެ.