އެއްފަހަރު ބޭނުންކޮށްފައި އުކާލާ ޕްލާސްޓިކް ކޮތަޅު މަދުކޮށް، ބާޒާރުކުރާއިރު ފޮތިކޮތަޅު ބޭނުންކުރުން އިތުރުކުރުމުގެ މަޤުޞަދުގައި އެސްޓީއޯ އިން ޚާއްސަ ކެމްޕެއިނެއް ފަށައިފިއެވެ.
" ޕްލާސްޓިކް ނޫން ގޮތެއް ރިވާޑްސް"ގެ ނަމުގައި ފެށި މި ކެމްޕެއިނަކީ ފޮތި ކޮތަޅު ބޭނުންކޮށްގެން އެސްޓީއޯ ޕީޕަލްސް ޗޮއިސްއިން ބާޒާރުކުރުމުން ހަދިޔާ ލިބޭ ކެންޕެއިނެކެވެ.
މި ކެންޕެއިންގެ ދަށުން މޯލްޑިވްސް އޮތެންޓިކް ކްރާފްސްޓް ކޯޕަރޭޓިވް ސޮސައިޓީ، ޖީއީއެފް ސްމޯލް ގްރާންޓްސް ޕްރޮގްރާމް ފަންޑިންގ ގެ ދަށުން، ޔޫއެންޑީޕީގެ އެހީތެރިކަމާއިއެކު ހިންގާ ހަރަކާތެއްކަމަށް އެސްޓީއޯއިން ބުނެއެވެ.
އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވީ ޕްލާސްޓިކް ނޫންގޮތެއް ހޯދަން ޖެހިފައިވާއިރު، އެސްޓީއޯއިން މިދިޔަ އަހަރުވެސް ޕްލާސްޓިކާއި ދެކޮޅަށް އެ ކުންފުނީގެ ހުރިހާ ފާމަސީތަކެއްގައި ޕްލާސްޓިކް ކޮތަޅު ބޭނުންކުރުން ހުއްޓާލާފައިވާކަމަށެވެ.
"މިކަމުގެ ސަބަބުން އަހަރެއްގެ މައްޗަށް ބޭނުންކުރާ ޕްލާސްޓިކް ކޮތަޅުގެ އެއް މިލިއަން ކޮތަޅު ސަލާމަތްކުރެވުނު. އެ ސަލާމަތްކުރެވުނީ އަޅުގަނޑުމެންނަށް އެއް މިލިއަން ބޭގްސް އަހަރަކު ކަނޑަށް ފޮނުވާނުލައި. އެސްޓީއޯ ޕީޕަލްސް ޗޮއިސްގައިވެސް އަހަރަކު އެއް މިލިއަން ކޮތަޅު އަޅުގަނޑުމެން އެބަ ބޭނުންކުރަން. އެހެންވީމަ އަޅުގަނޑުމެން ޕްލާސްޓިކް ބޭގްސް މި ދެތަނުން ހުއްޓާލިއަސް އެއީ އަހަރަކު ދެ މިލިއަން ޕްލާސްޓިކް ކޮތަޅު އަޅުގަނޑުމެންނަށް ރާއްޖެއަށް އެތެރެކުރުން އެ މަދުކުރެވުނީ" އަމްރު ވިދާޅުވިއެވެ.
މި ކެމްޕެއިނުގެ ދަށުން 500 ފޮތި ކޮތަޅު ހިލޭ ބެހުމަށް ނިންމާފައިވާއިރު، ޕީޕަލްސް ޗޮއިސްއިން މި ކޮތަޅު ބޭނުންކޮށްގެން ވިޔަފާރިކުރުމުން މޯބައިލް އެޕްލިކޭޝަނެއް މެދުވެރިކޮށް ކަސްޓަމަރުންނަށް ޕޮއިންޓްސް ލިބޭނެއެވެ. އަދި ވަކި ވަރަކަށް ވިޔަފާރިކުރުމުން ލިބޭ ޕޮއިންޓްތައް ރިވާޑްސް ނުވަތަ ހަދިޔާއަށް ބަދަލުވާނެއެވެ.
