ރައީސުލްޖުމްހޫރިއްޔާ އަބްދުﷲ ޔާމީންގެ ދެކަނބަލުން މިއަދުގެ ވަގުތެއްގައި ޗައިނާއަށް ފުރާވަޑައިގެންފިއެވެ.
ރައީސްގެ ދެކަނބަލުންގެ މި ދަތުރުފުޅަކީ ޗައިނާގެ ރައީސްގެ ދައުވަތަކަށް ކުރައްވާ ދަތުރުފުޅެކެވެ. ސަރުކާރުގެ ބަޔެއް ވަޒީރުންވެސް ބައިވެރިވެވަޑައިގެންނެވި މިދަތުރުފުޅުގައި ޗައިނާ އާއި ރާއްޖެއާ ދެމެދު ވެވޭ މުހިންމު ބަޔެއް އެއްބަސްވުން ތަކުގައި ދެގައުމުގެ އިސްވެރިންނާއި ވަޒީރުން ސޮއި ކުރެއްވުމަށްވެސް ވަނީ ހަމަޖެހިފައެވެ.
ޗައިނާ ދަތުރުފުޅަށް ފަހު ރައީސްގެ ދެކަނބަލުން އެނބުރި މާލެ ވަޑައިގަންނަވަން ހަމަޖެހިފައި ވަނީ އަންނަ ހޮނިހިރު ދުވަހުއެވެ. މިދަތުރުފުޅު ރައީސް ޗައިނާއަށް ކުރެއްވިއިރު ރާއްޖެއިން ވަނީ ޗައިނާއާއެކު މިނިވަން ވިޔަފާރީގެ އެއްބަސްވުމެއްގައި ސޮއި ކުރަން ނިންމާފައެވެ. އަދި އެކަމަށް ރައްޔިތުންގެ މަޖިލީހުން ވަނީ ރުހުން ދީފައެވެ.
އިދިކޮޅު ފަރާތްތަކާއި ސަރުކާރާމެދު މި އެއްބަސްވުމާމެދު ޚިޔާލު ތަފާތުވެ، އަރައިރުން ބޮޑުވެފައިވާ މިދަނޑިވަޅުގައި ޗައިނާއަށް ރައީސް ކުރައްވާ ދަތުރުފުޅުގައި މިކަމާމެދު އެއްބަސްވުމެއްގައި ސޮއި ކުރެއްވުން އޮތްކަން ނުވަތަ ނޫންކަން އަދި ކަށަވަރު ނުވެއެވެ.
