ރައްޔިތުންގެ މަޖިލީހުގެ ޖަލްސާތައް ސައިން ލޭންގުއޭޖުން ގެނެސްދޭގޮތަށް ހަމަޖައްސައިފިއެވެ.
އަޑު އިވުމުން މަހުރޫމު ވެފައިވާ މީހުންނަށް އިޝާރާތުގެ ބަހުރުވަ ނުވަތަ ސައިން ލެންގްއޭޖުން ކިޔައިދޭ ގޮތަށް ހަމަޖައްސާފައިވަނީ އަންނަ ހޯމަ ދުވަހުން ފެށިގެންނެވެ. ޖަލްސާތައް ގެނެސްދޭނީ އިންޓަޕްރިޓަރ މަރިޔަމް ފަޒްނީއެވެ.
މިގޮތަށް ހަމަޖައްސާފައި މިވަނީ މަޖިލީހުން ކުރިއަށް ގެންދިޔަ "ޕްރެކްޓިސް ޕާލިއަމެންޓް ފޯ ޔޫތް" ޕްރޮގްރާމްގައި ބައިވެރިވި އިވުމުން މަހުރޫމް ވެފައިވާ ނާއިޝް މަޖިލީހުގައި އެދުމުންނެވެ. ނާއިޝްގެ މިއެދުމަށް މަޖިލިސް ރައީސް މުހައްމަދު ނަޝީދު އެދުވަހު ވިދާޅުވެފައިވަނީ މިކަން ކުރެވޭނެ އިންތިޒާމު ވީހާވެސް އަވަހަށް ހަމަޖައްސަވައި ދެއްވާނެ ކަމަށެވެ.
ދައުލަތުގެ ތިން ބާރުގެ ތެރެއިން އެއްބާރަކީ ރައްޔިތުންގެ މަޖިލީސް ކަމަށްވާއިރު، މަޖިލީހުގެ ޖަލްސާތަކާއި ކޮމެޓީތަކުގައި ކުރެވޭ މަސައްކަތްތަކަކީ މީޑިއާތަކުން ވަގުތުން ގެނެސްދޭ މަސައްކަތްތަކެކެވެ. އެކަމަކު އަޑުއިވުމުން މަހުރޫމްވެފައިވާ ފަރާތްތަކަށް މަޖިލީހުގެ ޖަލްސާތައް ވަގުތުން ކިޔައިދެވޭނެ އިންތިޒާމެއް މިހައިތަނަށް ހަމަޖެހިފައެއް ނުވެއެވެ.
