ހެލްމެޓު ނާޅާ ކާރު ދުއްވައިގެން އިންޑިއާގެ މީހަކު 200 ރުޕީސް އިން ޖުރުމާނާ ކޮށްފިއެވެ. އެއީ އުމުރުން 23 އަހަރުގެ ޥިޝްނޫ ޝަރްމާ ނަމަކަށް ކިޔާ ޒުވާނެކެވެ. ޑިސެންބަރު މަހުގެ 1 ވަނަ ދުވަހު، އޭނާ ދިޔައީ އޭނާގެ މަރޫޓީ މަރުކާގެ ވޭނުގައި އާގްރާއިން ޖެއިޕޫރަށް ދާން އޮންނަ "ހައިވޭ" ގައި ދުއްވާފައެވެ. ފުލުހުންގެ މީހާ އޭނާ ހުއްޓުވާފައި ޗިޓެއް ދިނީ ހެލްމެޓު ނާޅާ ކާރު ދުއްވި ކަމަށް ލިޔެފައެވެ. ފުލުސްމީހާ ފަހުން ބުނެފައި ވަނީ އޭނާ އުޅުނީ ސީޓުބެލްޓު ނާޅާ ދުއްވި ވާހަކަ ކަމަށެވެ. އެކަމަކު އޮޅިގެން ހެލްމެޓޭ ލިޔެވުނީއެވެ.
ވިޝްނޫ ބުނާ ގޮތުގައި އޭނާ މިހާރު ކާރު ދުއްވަނީ ހެލްމެޓު އަޅައިގެންނެވެ. އެއީ ދެވަނަ ފަހަރަށް ޖުރުމާނާވާން ބޭނުން ނުވާތީއެވެ. އޭނާ ޖުރުމާނާ ކުރި ދުވަހު ހުރީ ސީޓުބެލްޓުއަޅައިގެން ކަމަށްވެސް އޭނާ ބުނެއެވެ. (މަޢުލޫމާތު: ދަ ހިންދުސްތާން ޓައިމްސް)
