ޚިޔާނާތުގެ 42 މައްސަލައެއްގެ ދައުވާ ކޮށްފައިވާ ސީލައިފް ގްލޯބަލްގެ މެނޭޖިންގ ޑިރެކްޓަރ އަހުމަދު މޫސާ (އައްމަޓީ) ގެ މައްސަލަ ހައިކޯޓުން ބޭރުކޮށްލައިފިއެވެ.
ހައިކޯޓުން ކުރި ހުކުމްގައި ވަނީ، ކްރިމިނަލް ކޯޓުން އަންމަޓީ ދޫކޮށްލީ ހުސްވި މާޗް މަހުގެ 20 ވަނަ ދުވަހު ކަމަށްވާ އިރު، އެ މައްސަލަ ކޯޓުގައި އިސްތިއުނާފު ކޮށްފައިވަނީ 48 ގަޑިއިރު ފާއިތުވެ ގޮސް، މާޗް 23 ވަނަ ދުވަހު ކަމަށެވެ. އަދި އެ މުއްދަތުގައި އެއްވެސް ބަންދު ދުވަހެއް ނާންނަ ކަމަށްވެސް ހުކުމުގައި ފާހަގަކޮށްފައިވެއެވެ.
އައްމަޓީ ބަންދުން ދޫކޮށްލަން ކުރިމިނަލް ކޯޓުން މިދިޔަ މާރޗު މަހުގެ 20 ވަނަ ދުވަހު ހުކުމް ކުރުމުންޕްރޮސެކިއުޓަރ ޖެނެރަލް (ޕީޖީ) ގެ ފަރާތުން އެ މައްސަލަ އިސްތިއުނާފަށް ހައިކޯޓަށް ހުށަހެޅީ އެމަހުގެ 23 ވަނަ ދުވަހުއެވެ.
ޝަރީއަތް ނިމެންދެން ބަންދުކުރުމަށްފަހު ކުރިން ދެ ފަހަރެއްގެ މަތިން ވެސް ކުރިމިނަލް ކޯޓުން އަންމަޓީ ދޫކޮށްލިއެވެ. އަދި އޭނާ ދޫކޮށްލާ ކޮންމެ ފަހަރަކު ދައުލަތުގެ ފަރާތުން އެ މައްސަލަ ހައިކޯޓަށް ހުށަހެޅުމުން ކޮންމެ ފަހަރަކު ވެސް ކްރިމިނަލް ކޯޓުގެ ނިންމުން ބާތިލުކޮށް، އޭނާ ބަންދުކުރަން ހައިކޯޓުން ވަނީ އަމުރު ކޮށްފައެވެ.
އައްމަޓީ އެންމެ ފަހުން ބަންދުކުރަން ހައިކޯޓުން އަމުރު ކުރީ، 15 ނޮވެމްބަރު 2021 ގައެވެ. އެއީ އެފަހަރު ކަފާލާތުގެ ދަށުން ކުރިމިނަލް ކޯޓުން އޭނާ ދޫކޮށްލުމުންނެވެ. އެފަހަރު އައްމަޓީ ދޫކޮށްލީ، އޭނާގެ އަންހެން ދައްތައާއި ކޮއްކޮ ޖާމިނުވާ ގޮތަށެވެ.
އެގޮތުން ތިންވަނަ ފަހަރަށް އައްމަޓީ ދޫކޮށްލައިގެން ހައިކޯޓަށް ހުށަހެޅި މައްސަލަ އެކޯޓުން ބޭރުކޮށްލީ، އިޖުރާއީ ގޮތުން އެ މައްސަލަ ބެލެން ނެތްކަމަށް ކަނޑައަޅައެވެ. ހައިކޯޓުން އެގޮތަށް ނިންމީ، ދައުލަތުން އެ މައްސަލަ އިސްތިއުނާފު ކުރަންޖެހޭ ވަގުތު ފާއިތުވި ފަހުން އިސްތިއުނާފު ކުރުމުންނެވެ.
ކޯޓުން ކުރާ އަމުރެއް އިސްތިއުނާފުކުރަން ދައުލަތަށް ލިބެނީ 48 ގަޑިއިރެވެ.
