ކުރީގެ އަރަބިއްޔާ ސްކޫލް ހުރި ތަނާއި ގާކޮށީގައި ހަދާފައިވާ ފްލެޓް ތަކުގެ ތެރެއިން އެޗްޑީސީން ދާދިފަހުން ވިއްކަން ނިންމައި ފުރުޞަތު ހުޅުވާލި ފްލެޓްތައް ވިއްކުން ކުއްލި ގޮތަކަށް މަޑުޖައްސާލަން ހައުސިން މިނިސްޓްރީން މިރޭ ނިންމައިފިއެވެ.
އެޗްޑީސީގެ އިއުލާނާއި ގުޅިގެން ފްލެޓް ގަތުމަށް ބޭނުންވާ ދުއިސައްތައެއްހާ މީހުން މިރޭ ހުޅުމާލޭ ޣާޒީ ސްކޫލް ކައިރީގައި ކިޔު ޖެއްސުމާއި ގުޅިގެން ފްލެޓް ވިއްކުން މަޑުޖައްސާލެއްވިކަން ހާމަކުރައްވަމުން ހައުސިން މިނިސްޓަރ ޑރ މުޙަންމަދު މުއިއްޒު ކުރެއްވި ޓްވީޓެއްގައި ވިދާޅުވީ އެޗްޑީސީން ވިއްކަން ކަނޑައެޅި ފްލެޓްތައް ގަތުމަށް ރައްޔިތުން ކިޔު ހަދަންޖެހުމަކީ ސަރުކާރުން ގަބޫލުކުރާ ކަމެއް ނޫން ކަމަށެވެ.
މިނިސްޓަރު ވިދާޅުވީ ފްލެޓް ގަންނަން ބޭނުންވާ ފަރާތްތަކަށް އެއަށްވުރެ ފަސޭހަ ގޮތެއް ހަމަޖެއްސުމަށްޓަކައި މި ފްލެޓްތައް ވިއްކުން މަޑުޖައްސާލެއްވީ ކަމަށެވެ.
އެޗްޑީސީން ވިއްކަން ކަނޑައެޅި 105 ފްލެޓަށް ފޯމް ހުށަހަޅަން ގިނަބަޔަކު ގޮސް މިއަދު އިރުއޮއްސުމާއެކު ވަނީ ކިޔުގައި ޖައްސާފައެވެ. ނަމަވެސް މި ފްލެޓްތައް ވިއްކަން ފޯމު ދޫކުރަން އެޗްޑީސީން ނިންމާފައި ވަނީ އަންނަ ހޯމަ ދުވަހު ހެނދުނުއެވެ. އެޗްޑީސީން އިއުލާން ކޮށްފައިވާ ގޮތުން ފްލެޓް ވިއްކާނީ ފޯމު ހުށަހަޅާ ތަރުތީބުންނެވެ. އެޗްޑީސީން ބުނެފައި ވަނީ ދޫކުރާނީވެސް ޖުމްލަ 105 ފޯމެވެ. ފްލެޓް ގަންނަން އެދޭ ފޯމު ދޫކުރަނީވެސް 100،000 ރުފިޔާގެ ބޭންކް ގެރެންޓީ ހިފައިގެންދާ ފަރާތްތަކަށް އެކަންޏެވެ. މިއީ ތިން ކޮޓަރީގެ ފްލެޓް ތަކެކެވެ.
