ސްރީލަންކާގެ ހުޅަނގުގައި އުފެދިފައިވާ ތޫފާނަކަށް ބަދަލުވެ، މޫސުން ކުރިޔަށްވުރެވެސް ގޯސްވެފައިވާތީ ކޮންމެހެންވެސް ކުރަން ޖެހިއްޖެ ދަތުރެއް ފިޔަވައި އެހެން އެއްވެސް ދަތުރެއް ކުރަން ކަނޑު މައްޗަށް ނާރަން ކޯސްޓް ގާޑުން އިލްތިމާސް ކޮށްފިއެވެ.
ކޯސްގާޑުން ބުނީ ރާއްޖޭގެ ހުރިހާ ސަރަހައްދަކަށްވެސް ބޯކޮށް ވާރޭވެހި، ވައި ބާރުވެ، ކަނޑު އާދަޔާ ޚިލާފަށް ގަދަވާނެ ކަމަށް މޫސުމާބެހޭ އިދާރާ އިން ބުނެފައިވުމާއި، މިހާރުވެސް ރާއްޖޭގެ ސަރަހައްދުގައި ދަތުރުފަތުރު ކުރަމުންދާ އުޅަނދު ފަހަރު ފަރަށް އެރުމާއި އަޑިއަށް ދިއުމާއި އަދި ލައްވުމުގެ ތަފާތު ނުރައްކާތެރި ހާދިސާތައް ހިނގަމުން އަންނަ ކަމަށެވެ.
"ދިވެހި ރާއްޖޭގެ އެންމެހާ ރައްޔިތުން މިކަމަށް ޚާއްޞަ ސަމާލުކަމެއް ދެއްވާ މޫސުން ގޯސް، ކަނޑުގަދަ، ވައިބާރު ވަގުތުތަކުގައި ދަތުރުފަތުރު ނުކުރުމަށް އިލްތިމާސް ކުރަމެވެ." ކޯސްޓްގާޑުގެ އިލްތިމާސްގައި ވެއެވެ.
ކޯސްޓްގާޑުން ވަނީ ރަށްރަށުގެ ފަޅުފަޅާއި އަދި ބޭރުގައި އަޅާފައިވާ އުޅަނދު ފަހަރުގެ ސަލާމަތާއި ރައްކާތެރި ކަމަށްޓަކައި އަޅަންޖެހޭ އެންމެހާ ފިޔަވަޅުތައް އެޅުމަށްވެސް އިލްތިމާސް ކޮށްފައެވެ. އަދި ފަޅުގައި އަޅާފައިވާ އުޅަނދު ފަހަރު ކަހާލައި އިތުރު ގެއްލުމެއް ލިބިދާނެކަމަށްޓަކައި ސަލާމަތީ ފިޔަވަޅު އެޅުމަށް ސަމާލުކަން ދިނުމަށްވެސް ވަނީ އަންގާފައެވެ.
އަދި މޫސުމާބެހޭ އެންމެ ފަހުގެ މައުލޫމާތު ހޯދައި، ސަލާމަތާއި ރައްކާތެރިކަމުގެ ފިޔަވަޅު އަޅައިގެން ނޫނީ ދަތުރު ނުކުރުމަށް ވެސް ވަނީ އެދިފައެވެ. އަދި ކަނޑުމަތީގެ އެއްވެސް ހާދިސާއެއް ހިނގައިފިނަމަ ލަސްނުކޮށް އެކަން ކޯސްޓްގާޑުގެ ހިލޭ ގުޅޭ ނަންބަރު 191 އަށް ގުޅުމަށްވެސް ވަނީ ހަނދާން ކޮށްދީފައެވެ.
